October 11, 2006
出世佇台灣（之五）
【藝術上的「FORMOSA時代」】
咱台灣是幸抑不幸，自然資源豐富，雖然物質文明日日那咧進步，可悲的是精神文明煞無通仝齊進步。對即點咱必須愛大聲呼籲，叫醒怹的靈魂。若是hông罵siáu-è，hông叫是食酒醉掠狂，咱也應該勇敢來向家己的理想前進。因為安呢，就算為著故鄉的名譽，咱嘛愛好膽向遐的物質萬能主義者宣戰。無瞭解藝術，毋知也人生精神力量的人民，怹前途是黑暗的。咱的征戰永遠無suah。咱的戰爭抑長遠抑艱苦，為何如此？因為咱的故鄉猶無通有佮咱共事的藝術之子。是啊，以後的發展無通知，但今仔日佇台灣連一位日本畫畫家、一位洋畫家、或者一位工藝美術家攏無。總是，台灣是充滿天賜之美的地上樂土。一旦鄉親peh開目睭，通自由發揮少年人的意氣的時刻來到的時，毫無疑問的，必然會佇即個所在產生偉大的藝術家。咱一面期待即個時刻，同時也努力修養家己，為促進藝術發展來勇敢，大力向故鄉的人喊聲：應當覺醒毋通懶落去。期待藝術上的「FORMOSA」時代來臨，我想這並毋是我的幻夢吧！（終）
...繼續閱讀
出世佇台灣（之四）
【少年的同鄉朋友！】
親愛的朋友！人類的歲壽只有五十年。假使擱加一倍其實嘛是像一目睨仔niā！時鐘的聲音不斷咧消iûN人類的性命，日月的圓缺不也是咧引chhūa咱行入墓裡嗎？光陰如箭，一旦咱陽壽已盡，死期一到，我的肉體腐爛aū做肥料，你的骨頭也宛那碎糊糊。唯宇宙無限的時間來看，人生是無法形容的短，實在若sih-nah。「寄蜉蝣於天地，渺滄海之一粟」蘇東坡的感嘆並毋是無道理。總講一句，盡全力小心謹慎保養的身體，佮一再訓練的頭腦，不斷咧鍛鍊的手腕，就te欲真可憐來化作幾支仔骨骸，tâi入墓埔；人的身體到底並無可靠。像秦始皇或者是漢武帝彼款醉心佇求靈藥的人，總抑是免不了一死。雖然祈神拜佛也難逃死亡。少年人向望不老藥去飲酸牛奶煞引起漏屎，老大人欲返老還童來注射煞顛倒早死。古今中外一概相仝，人類到底無法度保持萬年壽命。會用得永劫不死的方法只有一個，這就是精神上的不朽。例如孔子、釋迦、基督或但丁、米開朗基羅、拉菲爾等人，怹佇肉體已經消失千百年後的今仔日，煞通保持精神上的不死。朋友！請恁毋通擱干旦佇咧追求物質上的快樂，考慮一下仔長生之道吧！後者就是在科學上有所發明，裨益人類，抑是佇哲理有所發現，貢獻人生也會當。就咱的立場來講，只要留下優秀的作品美化人類的生活嘛會使。至少對咱藝術家來講，只要用血汗創作出來的作品猶袂完全hông毀滅以前，咱是袂死的。少年的朋友啊！藝術家實在是袂老、袂死的。有信心的人請來吧！故鄉遮個可惱可恨的千萬富翁沉醉佇眼前的榮華，全無理解精神的重要，以銅臭為芬芳，崇尚肉慾的上流者，怹死了後到底留啥物落來？怹所留的不過是細姨仔那哮那相嚷佮不孝囝孫袂見袂笑爭奪財產。免欣羨怹的財產、權力佮榮華。棄sak一時肉體的享樂，永活的靈魂正會誕生。
...繼續閱讀
出世佇台灣（之三）
【幼稚的藝術】
咱台灣島的天然美景是遮呢仔豐富，但是可悲的是，滯佇遮的大部分人，煞對啥物是súi，一點仔就無了解，所以怹嘛無才調佇這天賜的súi裡，擱再加上人工的súi，美化眾人的生活，提倡高尚優美的精神，有意義來度過人生。本島人完全忽略súi的生活佮趣味的生活。佇半山腰的樹林仔附近，兩三間農舍，hîaN柴的煙滾上天，欲轉去歇睏的做穡人，肩甲頭鋤頭khùe咧，行佇田岸仔路，一爿看對天邊美麗的夕陽。一般人袂當欣賞即類自然風情的寫生畫作，或者是顧牛囡仔騎佇牛的跤脊胼，歡喜咧khoo-si-á，有天真無邪情趣的雕刻，煞tiāN看著酒醉、畫粧畫甲若妖精的人，以及干旦愛烏白亂鬧的憨仔，這到底是為啥物？尤其安呢的現象佇上流社會真chiap khoàiN，我實在為台灣誠煩惱。有一位佇台灣社會地位真koân、千萬富翁的長者，為著家己愛包飼妓女的癖，開大錢毋bat咧睨目睭，一êng辦桌請人的錢，百金千金嘛共結落去，但是一聽講某物知名畫家的油畫，一幅價值五百圓，煞歸身軀隨軟去。會當講，這就是干旦知也物質的重要，煞毋知也精神比物質猶擱較重要的人，所做的代誌。
...繼續閱讀
October 9, 2006
出世佇台灣（之二）
【咱美麗的島嶼】
出世佇即個國家就愛即個國家，出世佇即塊土地就愛即塊土地，這是人真四常的感情。雖然講藝術無國境的分別，在任何所在攏會用得創作，但講到尾矣抑是懷念家己出世的土地。咱台灣是美麗之島，更加令人懷念。總是，從來毋bat去過台灣的內地人（日本人）煞以為台灣是像火燒地獄安呢炎熱的所在，惡疫流行，而且滯真濟比猛獸擱較恐怖的青蕃。濟濟人一想著欲到彼款所在去，非常好玄，總感覺會冒性命的危險。我過去六、七年來滯佇東京，chhiāng-chāi拄著令人憤怒、抑是笑破腹肚皮的怪奇問題。有的人問講：「佇台灣嘛像佇內地仝款食白飯嗎？」或著是：「你的祖先嘛bat割過人頭嗎？」等等誠正經咧問，予我若欲講是憤慨，不如講是可憐怹的無知。有一位我的日本朋友予我看伊的家傳寶刀，講：「我後個月中旬欲去台中拜訪親戚，想欲chah即支刀護身。」歸面看著若像下決心準備大冒險的表情。我雖然感覺足好笑，總是幾仔擺一直共澄清，台灣並不是四界攏有青蕃，而且，就算講佇有青蕃的所在，也絕對毋是像遐呢可怕。我不斷共怹提醒，最後正好親像有理解的模樣。內地人總是想講，只要到台灣庄跤就會pōng著青蕃，但是，台灣三百五十萬人的人口內底，青蕃干旦佔七、八萬人，而且是佇罕得有人行踏的深山林內。總講一句，內地人對台灣的知識恐驚仔非常欠缺，就算是有相當地位的日本知識份子，也有相當錯誤的觀念，自安呢會當推斷，一般人對台灣的無知佮誤會，是比咱所想的擱較嚴重。
...繼續閱讀
October 3, 2006
出世佇台灣（之一）
【踏話頭】
世間的人chhiāng-chāi批評藝術家是怪人。身為藝術家的一份子，我也定定家己細膩，毋通hông講是怪人，但抑是四常去予朋友講，你是有淡薄仔怪怪的人，袂曉佮人交際。總是，擱較安怎講，雕刻是造形藝術中，上介困難的khang-khùe（仝一個程度的作品，日本畫愛開一工來完成者，油畫愛一禮拜，雕刻就愛一個月左右）一件作品往往需要一、兩個月甚至到五、六個月，略仔複雜的，就愛費一、兩年甚至三、四年。較罕得khoàiN的，嘛有十偌年，或者是透世（sì）人干旦完成一件作品。古早人咧講人生七十古來稀，人類的歲壽，長嘛不過七十左右，即七十年食透了後，即仙貴重的身體，也就hông送去淒涼的墓仔埔，放咧予爛臭生蟲。人的歲壽其實足短，根本無夠七十歲，實際上一般情形的人生，食甲五十誠普遍，佛教嘛有五十年為一輪迴的講法，可見人類的平均年齡連五十就無夠。我家己毋知也幾歲的時陣會離開世間，假使人生死有命的話，我也已經活過一半較ke的歲矣。chhun的的性命中，到底通完成啥物款的作品咧？雕刻家的重要使命，是佇咧創造出優良的作品，予目前人類的生活更加美化。就算是完成一件會當達成即個重大任務的作品，亦毋是容易的代誌。只要一想著即點，我就無辦法像其他的人安呢，食菸、踅街，抑是飲酒開講到半暝，寶貴的時間袂當浪費。
...繼續閱讀
July 2, 2006
我隨意，你盡量 gua sui-i3, li cin3-liong7
◎王昭華 唸讀
十幾年前拄到淡水無偌久，有一回，對朋友去食拜拜，朋友的仝班同學滯佇往北新庄仔的大溪橋附近。經過遮濟年，煞毋bat斟酌去找過到底是佗一庄。印象中，彼工的辦桌是請暗時，暗挲挲的小路彎來斡去，正咧懷疑敢會行毋著路，結果，遠遠看著電火泡仔光siak-siak，荒郊野外的山窟仔內面，竟然鬧熱滾滾……
即馬想起來，彼擺食的桌，應該是淡水八庄大道公的大拜拜吧。
遮濟年過去，袂記得的早就袂記得了了矣，毋拘，即句「我隨意，你盡量」煞親像刻字佇樹仔頂仝款，到旦擱tiau5佇頭殼壁。
一般咱咧飲酒、勸酒，攏是講「我乾杯，你隨意」——但是彼擺hoong5請，仝桌的歐吉桑誠熱情，敬酒，講怹淡水遐的人毋是安呢講，怹攏講「我隨意，你盡量」——我隨意，我的意就是愛予礁啦〜正有夠意思，啊若朋友你咧，你盡你的量就好矣，無要求無勉強……
...繼續閱讀
十幾年前拄到淡水無偌久，有一回，對朋友去食拜拜，朋友的仝班同學滯佇往北新庄仔的大溪橋附近。經過遮濟年，煞毋bat斟酌去找過到底是佗一庄。印象中，彼工的辦桌是請暗時，暗挲挲的小路彎來斡去，正咧懷疑敢會行毋著路，結果，遠遠看著電火泡仔光siak-siak，荒郊野外的山窟仔內面，竟然鬧熱滾滾……
即馬想起來，彼擺食的桌，應該是淡水八庄大道公的大拜拜吧。
遮濟年過去，袂記得的早就袂記得了了矣，毋拘，即句「我隨意，你盡量」煞親像刻字佇樹仔頂仝款，到旦擱tiau5佇頭殼壁。
一般咱咧飲酒、勸酒，攏是講「我乾杯，你隨意」——但是彼擺hoong5請，仝桌的歐吉桑誠熱情，敬酒，講怹淡水遐的人毋是安呢講，怹攏講「我隨意，你盡量」——我隨意，我的意就是愛予礁啦〜正有夠意思，啊若朋友你咧，你盡你的量就好矣，無要求無勉強……
...繼續閱讀
June 29, 2006
thun2
June 19, 2006
蓮霧樹，歹剃頭 len-bu7-chiu7, phainn thi2-thau5
June 16, 2006
May 14, 2006
回望 綠的海平線，有聽聲~~
May 9, 2006
走找1915年消失的淡水河舢舨
——想著林吉崇醫師的兩本書 ◎王昭華 唸讀
阿亮是一個學電影的人，毋是一個研究台灣史的專家，《綠的海平線》的「線索」，是對伊的前一支紀錄片《走找1946年消失的日本飛行機》牽來也。
囡仔時代的阿亮，捌聽阿公咧講，講戰後無偌久的時，去共報廢的日本飛行機買落來，提飛行機的a-lu-mih做ue仔鼎仔去賣，自安呢賺著錢，發展起來，形成後來的家族企業。大漢的阿亮，對即段家族故事非常好奇，發心欲用攝影機共箍轉來，就是紀錄片《走找1946年消失的日本飛行機》。
即款尋根溯源的精神，佇歷史斷層真普遍的台灣，特別可貴。
唯家己的家族史走找起，到後來，找出一綰人的故事——佇我所熟似的朋友裡，除了阿亮，予我嘛真感動的一位長輩，就是林吉崇醫師。
...繼續閱讀
囡仔時代的阿亮，捌聽阿公咧講，講戰後無偌久的時，去共報廢的日本飛行機買落來，提飛行機的a-lu-mih做ue仔鼎仔去賣，自安呢賺著錢，發展起來，形成後來的家族企業。大漢的阿亮，對即段家族故事非常好奇，發心欲用攝影機共箍轉來，就是紀錄片《走找1946年消失的日本飛行機》。
即款尋根溯源的精神，佇歷史斷層真普遍的台灣，特別可貴。
唯家己的家族史走找起，到後來，找出一綰人的故事——佇我所熟似的朋友裡，除了阿亮，予我嘛真感動的一位長輩，就是林吉崇醫師。
...繼續閱讀
![[Syndicate this site]](http://pics.yamedia.tw/images/rss2.gif "Syndicate RSS feed")
![[Syndicate this site]](http://pics.yamedia.tw/images/atom.gif "Syndicate ATOM feed")
