婉子的輕狂心事

December 11, 2005

一年一度既「好友聖誕前聚餐」

bearmay 在天空部落發表於22:05:29 | 未分類

一年一度既「好友聖誕前聚餐」响今晚完滿結束！
依一個聚餐係我哋希望每年都搞一次既活動，往年我哋係會分成兩晚舉行，一晚係湯馬既朋友，另一晚係我既朋友。但係因為今年有咗餅碎之後，時間都好似少咗咁，所以唯有精選朋友，响一晚搞掂哂應該兩次既聚餐了！一共有成十個大人，一個細路同一粒餅碎！
今年湯馬一手包辨所有食物，煮咗一個超水準既聖誕鴨餐！佢一共焗咗四隻鴨，餐前湯有鴨湯加蒸蛋粒粒，配鴨就有薯仔團，酸藍椰菜，牛油小黃瓜，同埋焗鴨時响鴨裡既乾果。
因為Niko（湯馬朋友既歲半囝囝）好鬼多手，所以要將相機收起，只可以影到幾張相....

觀看全文...

人氣 () | 回應 (11) | 引用 (0)

December 10, 2005

慕尼黑的聖誕市集

bearmay 在天空部落發表於23:08:26 | 未分類

每年聖誕節前既四個禮拜，响德國都有大大小小既聖誕市集出顕，賣一d聖誕裝飾物，同美味既食物！
今日我哋就去咗慕尼黑市中心既聖誕市集，因為人人都趕著買聖誕禮物，再加上遊客，搞到好鬼迫人，好辛苦先至影到d相，同大家分享一吓！

觀看全文...

人氣 () | 回應 (15) | 引用 (0)

December 9, 2005

終於整好聖誕佈置嘞！

bearmay 在天空部落發表於17:35:05 | 輕狂心事

今年到年尾湯馬先至忙到痴線，搞到我哋响十二月頭都未有時間去買聖誕樹。因為今個星期日係我哋一年一度既「好友聖誕前聚餐」，所以迫住湯馬响午飯時間買到聖誕樹，而响尋晚我哋夾手夾腳一齊整好哂d裝飾，因為聖誕樹嗰陣香味同埋d聖誕裝飾，加上樹上既小燈，令到我哋屋企終於充滿聖誕氣氛啦！

觀看全文...

人氣 () | 回應 (12) | 引用 (0)

December 8, 2005

好易食肥人既芝士火煱

bearmay 在天空部落發表於20:10:38 | Hobbit食誌

依一個係令我哋又愛又恨既芝士火煱，小小既一煱，眼看落去好似好小咁，慢慢食落去就好快飽飽，但係又因為太好食，响好飽既情况下，成日都想死頂食多d！响德國超市可以買到一包包ready-to-eat芝士火煱包，只要放响爐上慢火煮滆就可以食。佢哋只會用法包點嚟食，唔似香港咁有咁多配料，而芝士亦好重酒味。我鍾意煎小小雞胸一齊食，正呀！

人氣 () | 回應 (8) | 引用 (0)

December 7, 2005

港式煲仔菜！

bearmay 在天空部落發表於16:55:37 | Hobbit食誌

唔洗怕，今次唔係我煮，而係我哋去咗應該係全慕尼黑唯一做正宗香港菜既餐館，食我哋每年一煲既「支竹羊腩煲」！
餐館位於一個非常唔顯眼既地方，我哋响唔到一分鐘車程既地方住咗一年，都唔知有間咁正既餐館！佢哋有分「自己友餐牌」同「呃鬼佬餐牌」，自己友餐牌當然有好多港式小炒，點心同炒粉麵、燒味。但係價錢就一d都唔平，點心由三歐羅至五、六歐羅，其他嘢就由十歐羅起。

觀看全文...

人氣 () | 回應 (14) | 引用 (0)

December 6, 2005

我愛死德國的節日了！

bearmay 在天空部落發表於20:15:27 | 輕狂心事

德國人有好多好搞笑既節日，可能因為宗教關係，差唔多每一個月都有節日，只在乎禮物而不問出處既我哋，成日都可以享受假期或者禮物！好似今日咁，又係又一收禮物既節日～St.Nikolaus！
傳說中佢响寒冬俾咗唯一一件外套俾一個窮人，之後唔記得點解要記念佢囉.....！只知道d人每到St.Nikolaus之前一晚，都會叫d小朋友清潔好d鞋，而Nikolaus就會响深夜响乖小朋友鞋度放糖果同小禮物，曳曳小朋友鞋度放一舊碳。簡單嚟講係德國人既聖誕老人！佢個型像同聖誕老人差唔多，但係件衫係藍色既。

我哋今日都收到禮物哦！餅碎得到一對靚靚鞋，咁佢明年就有鞋去收禮物或者碳！湯馬有一支佢最愛既啤莉蘋果烈酒同一盒酒心朱古力！而我.... 我有兩本英書、一個月曆同埋.... Robbie Williams明年响柏林既演唱會飛兩張，仲係坐位呢，唔洗辛苦同人迫！又可以去柏林玩！湯馬話Nikolaus玩佢！因為演唱會响正佢既生日既前一日呢！我同佢講一定係Nikolaus無哂碳，所以用而個方法代替吧！

人氣 () | 回應 (7) | 引用 (0)

December 4, 2005

台式魯肉飯

bearmay 在天空部落發表於18:49:14 | Hobbit食誌

响多耐好耐之前，曾經响香港剛剛興起食台式小食時，食過一碗魯肉飯，小小既一碗碎肉飯，食完竟然令我回味無窮。有一段時間，我成日食嚟當午餐。早前經Carol食咗一d由佢個台灣同學煮既台式魯豬手，又令我諗返起碗魯肉飯，一番網上搜集之後，我發現有好多唔同做法，我就樣樣學d，做咗我第一碗魯肉飯！

觀看全文...

人氣 () | 回應 (6) | 引用 (0)

December 3, 2005

美味蘿蔔絲餅

bearmay 在天空部落發表於21:20:59 | Hobbit食誌

响香港時，去親飲茶都會揾蘿蔔絲餅食，鍾意佢夠香脆，咬開有熱熱既汁留出，更有一絲絲既蘿蔔掛响咀邊。食完之後嗰陣蘿蔔香真係令人回味！我一直以為係好難整，但係前排响人哋既網誌睇到做蘿蔔絲餅既食譜，原來一d都唔難！親湯馬要OT，我就試吓做。製成品味道很好，連湯馬都讚嗰陣蘿蔔香好吸引！到今日仲可以响屋企聞到嗰陣香味呢！！

觀看全文...

人氣 () | 回應 (10) | 引用 (0)

December 2, 2005

我的紙包蛋糕變成了蛋糕仔

bearmay 在天空部落發表於20:07:02 | Hobbit食誌

餅碎今朝好乖乖咁瞓咗兩個鐘，我就利用依個空閒，做咗mayu所介紹既「四十分鐘紙包蛋糕」。真係好易做，味道仲非常好。但係好奇怪... 我既紙包蛋糕都變成蛋糕仔既樣呢！所以都我焗第二轉時，我用咗焗蛋糕仔既紙就算嘞！

人氣 () | 回應 (9) | 引用 (0)

December 1, 2005

懶人海南雞飯

bearmay 在天空部落發表於23:25:48 | Hobbit食誌

依包懶人海南雞飯汁，真係一流！一煲飯一包，洗完米之後加落d米度，撈好（我習慣加多小小油、雞粉、鹽），飯熟就會有一碗香憤噴，充滿雞油同薑香既海南雞飯！配葱油雞同撈薑蓉勁正呀！

人氣 () | 回應 (6) | 引用 (0)

November 30, 2005

終極完美燒肉

bearmay 在天空部落發表於20:57:33 | Hobbit食誌

我諗依一次真係最正了！買到一舊極靚乳豬腩，我响燒前响皮上面狂拮咗好多小孔。到燒肉全熟時，用200°C淨係全力焗塊皮。嘩！d肉仲係好多汁，而皮就極脆！要同湯馬爭住嚟食呀！

*之前都有人問做法，其實好簡單...

觀看全文...

人氣 () | 回應 (19) | 引用 (1)

November 29, 2005

屋企終於又有蛋糕香

bearmay 在天空部落發表於18:35:06 | Hobbit食誌

一向我對焗蛋糕既興趣一般，一來因為怕湯馬食得太多會肥，二來因為德國媽媽焗既蛋糕係超級好食，所以我哋不愁冇餅食。但係近湯馬都投訴我好耐無焗蛋糕（對上一次應該係生餅碎前既『藍草莓芝士蛋糕』吧！），咁啱又响mayu既日誌睇到一個簡易牛油蛋糕，今日終於再開工！我跟住mayu所教既做法，再加咗一d杏仁碎同提子乾。

*你可能留意到.... 蛋糕係焗過咗小小火..... 因為餅碎唔肯俾我行開一陣，所以焗多咗五分鐘，燶咗dd.... 唉！下次都係等湯馬响度睇囡先焗過嘞！*

人氣 () | 回應 (7) | 引用 (0)

November 28, 2005

哈利波特火盃的考驗的看後感

bearmay 在天空部落發表於19:40:48 | 未分類

好多人都知，我係後起既哈利波特迷，我係當書出到第三集時，先至一口氣睇哂一至三集既英文版，而且正式成為哈利波時迷。一發不可收拾，我由第四集起，就每當有新書我都會盡快得到，再全速閱讀。每一集既電影我都睇哂，但係由第三集起，電影版都令我好失望，可能因為時間既關係，佢哋竟然將故事內容都改哂。但係好彩，今次第四集，佢哋選擇將故事簡短，只係選擇性地提到重要内容，而唔係改故事。睇落去，好似快速咁將書睇咗一次。响三個考驗既場面都拍得好好，但係响睇書時希望响電影出現既嘢，都冇出現到... 我諗佢哋應該諗吓拍哈利波特電視劇吧！

人氣 () | 回應 (9) | 引用 (1)

November 27, 2005

湯馬牌三色意粉大餐

bearmay 在天空部落發表於20:45:21 | Hobbit食誌

上星期三係德國媽媽既生日，但係因為德國爸爸去咗工幹，而德國妹妹同男朋友又去咗澳洲玩到星期六先返，所以我哋就响今日先去同佢慶祝。今年佢希望可以食到唔同既意大利粉汁，所以湯馬就為佢泡製咗一個「三色意粉大餐」嘞！

觀看全文...

人氣 () | 回應 (5) | 引用 (0)

November 24, 2005

暖暖的煲仔飯

bearmay 在天空部落發表於19:11:41 | Hobbit食誌

今日室外氣温只有-6°C，係真架！只有零下六度！本來今日午餐係湯馬尋晚整既自製意大利雲吞，但係...... 我發現屋企無哂忌廉去煮汁！响非常失望之下，我又發現佢尋晚做雲吞時淨咗幾舊雞胸肉，諗起Pui留言講起用冬菇片去煲飯，所以就決定去整「北菇雞煲仔飯」，响今日凍冰冰既天氣吓去暖暖身！

我之前煮過一次，嗰一次我將材料齊水放响飯面煮，但係製成品味道一般。所以我今次就試响飯煮到半熟時，先加材料，今次非常好味！加埋煲仔飯醬油，簡直係一流！可惜因為仲俾母乳餅碎，所以唔可以加葱.....！所以未達到完美級。

觀看全文...

人氣 () | 回應 (11) | 引用 (0)

November 22, 2005

我又來「撞奶」

bearmay 在天空部落發表於21:01:52 | Hobbit食誌

俾mayu同grace引到我都嚟做一個薑汁撞奶！真係好易做同美味呢！仲好鬼暖身添！

人氣 () | 回應 (10) | 引用 (0)

November 21, 2005

懶人日式雜錦飯

bearmay 在天空部落發表於20:21:11 | Hobbit食誌

响德文班，我有一個日本同學，佢係來自北海道既依子。因為佢係班上唯一日本人，又識小小英語，我哋就成日走埋一齊，用英文，德文同漢字溝通。佢好鍾意食，但係就懶去煮，所以响佢身上我學咗好多懶人料理，依個雜錦飯就是其一！做法超易，味道一流，係一個冬天食啱哂既飯！

觀看全文...

人氣 () | 回應 (6) | 引用 (0)

November 20, 2005

看見今年第一個雪人

bearmay 在天空部落發表於20:01:22 | Ya Ya Sonya

今日睇見有幾個小朋友响樓下個花園度，砌咗一個雪人。我同湯馬講，好想快d到明年，到我哋同餅碎一齊砌雪人！

人氣 () | 回應 (3) | 引用 (0)

November 19, 2005

Carol第一次為我們下廚

bearmay 在天空部落發表於19:13:27 | Hobbit食誌

首先要介紹一吓大廚，Carol～佢係我响慕尼黑唯一既香港朋友（另外一個不值一提...），好巧合地佢老公同湯馬一樣係東德人，但係佢哋成日唔响屋企，成日唔係同老公去工幹、返吓老公鄉下，就係去旅行。所以好難約佢，而Carol亦係一個出名既「無飯煮婦」！見親面一係出街食，或者嚟我哋度，等我哋煮。所以佢今日為我哋準備依個美味晚餐，令我好感動哦！

觀看全文...

人氣 () | 回應 (3) | 引用 (0)

November 18, 2005

餅碎睇第一場雪

bearmay 在天空部落發表於22:28:32 | Ya Ya Sonya

天氣預報一早就預測今個星期會有雪，本來預計尋日落，點知全日只係天陰陰同凍冰冰。明明睇到有舊大灰雲响北方飄過嚟，等到四點日落前都只係得d「鬼鼠」雪（得零聲飄雪）。到到尋晚三點起身去洗手間時，驚見對面屋屋頂白雪雪，呀！d雪已經神袐地落咗嘞！到朝早起身時，我估d雪已經有十厘米啦！我帶餅碎去露台度睇雪，佢好開心呀！仲不停咁笑！希望吞日都有雪啦，咁餅碎可以去摩吓d雪嘞！

人氣 () | 回應 (6) | 引用 (0)

婉子喜歡美食，鍾意獨一無二的東西，更享受發白日夢的幸福