SĬNG-GĂNG DÁK-DÁK, NG GIĂNG PÙ-SÁK
| Nāng-gă Hók-ciŭ ô siŏh guó sṳ̆k-uâ, "Sĭng-găng dák-dák, ng giăng Pù-sák", kĕk Huà-ngṳ̄ huăng-ĭk, cêu sê "Bú zuò kuī xīn shì, bú pà guǐ qiāo mén". Nṳ̄ â̤ mâ̤ báik sié-nó̤h nè̤ng â̤ giăng Pù-sák nih? Nguāi gâe̤ng nṳ̄ gōng nṳ̄ cêu â̤ báik. | 咱家福州有蜀句俗話，“心肝搭搭，伓驚菩薩”，揢華語翻譯，就是“不做虧心事，不怕鬼敲門”。汝會賣仈什乇儂會驚菩薩呢？我共汝講汝就會仈。 |
| Nguāi siŏh-màng-buŏ siông-uōng, mò̤-é-dṳ̆ng káng-giéng "XXX Cĭk-dṳ̆ng-ìng" gì siŏh dèu sĭng-ùng, giéng-gáe̤k iā hō̤-hièng, cūng-bê gáu Google gèng-dēng tō̤ siŏh tō̤. "Search" siŏh áik, gó muôi dīng gáu giék-guō hiêng chók, Google cêu có̤ ngài lāu. Gó-chṳ̄ nguāi lì "Báik-dô" tō̤, tō̤ diŏh cĭng sâ̤ ciō-dà̤, â̤ páh kūi gì dŭ sê "Nṳ̄ sū tō̤ gì ciō-dà̤ ī ké̤ṳk săng-dṳ̀, chiāng giàng-diōng" gì séng-sék. Dīng sék hŭng-cṳ̄ng, nguāi gái kó̤ Google lā̤ tō̤ "XXX Concentration Camp", ciáh mò̤ gūi miēu, Google bô ngài gó̤ lāu. Bók-guó nguāi cī ciáh nè̤ng iā cháu-ngâing, chó-chói ék-diâng diŏh tō̤ diŏh, gái lì yam blog gèng-dēng ché siŏh ché -- Nṳ̄ nā̤ nguāi sá, chṳ̄-káik lièng nguāi gì "Nguāi muōng gōng nṳ̄ muōng tiăng" dŭ páh mâ̤ kūi lo̤! | 我昨暝晡上網，無意中看見“ＸＸＸ集中營”其蜀題新聞，見覺野好玄，準備遘 Google 懸頂討蜀討。“Search”蜀壓，故未等遘結果現出，Google 就做呆了。故此我來“百度”討，討著真侈主題，會拍開其都是“汝所討其主題已乞刪除，請行轉”其信息。等十分鈡，我介去 Google 嚟討“ＸＸＸ Concentration Camp”，乍無幾秒，Google 仅呆去了。不過我只隻儂野臭硬，咒喙一定著討著，介來 yam blog 懸頂試蜀試——汝奶我肏，此刻連我其“我罔講汝罔聽”都拍賣開囉！ |
| Cô̤-huá nguāi ng sê chăng-màng-ngù, chŭi-iòng Dṳ̆ng-ùng Ĭng-ùng dŭ mâ̤ káng, nguāi gó â̤ hiēu káng Dáik-ùng. Uōng-lô géng-chák gái ô buōng-sê̤ṳ, iâ sê dò̤ nguāi mò̤ bâing-huák. Sĕng mò̤-ĕng-lā̤ gōng hī dèu sĭng-ùng ô mò̤ gōng-pă, dăng-dăng téng ĭ cūng-kuāng huāng-éng lì káng, nguāi ng gōng nṳ̄ dŭ â̤ báik -- Báh-sáng gì mĕ̤k-ciŭ sê mìng gì: Nṳ̄ nâ mò̤ có̤ ngài-dâi, cūng-mò̤ giăng nè̤ng chék-gōng-báik-tiáng mŏ̤h? | 造化我伓是青盲牛，雖然中文英文都賣看，我故會曉看德文。網路警察介有本事，亦是掏我無辦法。先無攖嚟講許題新聞有無講脬，單單趁伊縂款反應來看，我伓講汝都會仈——百姓其目睭是明其：汝哪無做呆代，總無驚儂七講八聽麽？ |
| Sák-bók-diòng-sì, nguāi siōng gáu lêng-nguôi siŏh guó Hók-ciŭ sṳ̆k-uâ -- "Dò̤ dê̤ṳ ciă pé". Gōng kī-lì cĭng ô mê, nâ ô "Yù gài mí zhāng" gì nè̤ng â̤ có̤ cūng-kuāng ké̤ṳk nè̤ng chiéu puái chói gì dâi-cié. Ĭ ô có̤ guó hī-māng sâ̤ ngài-dâi, nguāi siŏng-séng muôi dīng Pù-sák gáu, sĕng káng-giéng báh-sáng, hùng cêu ī-gĭng giăng sáng gó̤ lāu. | 霎不長時，我想遘另外蜀句福州俗話——“掏箸遮鼻”。講起來真有味，哪有“欲蓋彌彰”其儂會做縂款乞儂笑破喙其代誌。伊有做過許蠻侈呆代，我相信未等菩薩遘，先看見百姓，魂就已經驚散去了。 |
【註】
造化：cô̤-huá，幸虧。
無攖嚟：mò̤-ĕng-lā̤，別，不要。
講脬：gōng-pă，説話誇張不著邊際。
霎不長時：sák-bók-diòng-sì，突然，霎時間。
掏箸遮鼻：Dò̤ dê̤ṳ ciă pé，拿筷子來遮鼻子，福州諺語，諷刺做了壞事欲蓋彌彰的人。
