只要有三個查某儂，就有趣味 e 話題。
我 e 工作單位負責業務 e 所在有三個儂，晉前是兩女一男，互相無往來。一位 A 女，個性孤老，三十外外猶袂嫁。另外一位 B 是做媽媽 --e0，兩個囝已經讀高中 --a0。查甫 --e0 是三十外外猶袂娶。因為休假甲考績，A 女甲查甫鬧甲袂收山，主管嘛真頭痛。因為查甫 e 茨 duaa 外縣市，希望排休佇拜一；A 女雖然 duaa 市內，但是無想 beh 退讓，而且揣真濟名目加班換輪休，閣甲一寡仔受訓 e 消息 iap 落來家己去，互查甫真受氣。因為有一年主管甲 A 女 e 考績拍乙等，伊就激一冬 e 屎面互主管看，有代誌 max 是留字條，所以隔冬 e 考績就變甲等，換查甫變乙等。當然查甫真袂爽，閣一冬就離開，換一位 C 女來接缺。因為 B 連續兩冬考績攏是乙等，本成就袂爽，加上開會叫便當 e 錢愛甲 A 請，攏拖一陣(zam7)即互伊，叫 e 數量 A 嘛定定有意見，嫌叫傷濟，所以兩儂嘛有 khe'kang1。C 來以後，有一寡仔屬 A e 業務有時會 sak 來伊遐，終於有ㄧ工互伊掠著機會。主管有業務 beh 交代 A，揣無儂，就揣 C，但是 C 當 deh 教育訓練，看著 A 嘛在場，就甲主管講。因為訓練 e 主題甲 A e 業務無關，伊閣皮皮無 beh 轉去揣主管，當然互主管 le2。
我平常中晝攏會去歇睏室食飯配話題看電視，漸漸愈聽愈濟，知影 A 是 7:30 luu 卡上班，準時 4:30 luu 卡下班。想想 leq，一 e 孤老個性 e 單身女性，能力普普，會當佇社會安穩過日閣有真濟休假，只有一個可能 --> 公務員！
