我兮兒童文學目錄已經改格式，而且嘛有增加內容，以後會一個月改版一擺，換勢會囥咧台灣咁仔店網路頂，逐家會當先去我正邊兮連結看我兮目錄網頁。

因為若是無調查著無發言兮權利，我昨日利用時間，利用暗光鳥兮厝gah一寡網站兮資料來揣用holo台語所寫兒童文學作品。我所選擇的，主要是囝仔古（毋管是創作亦是講翻譯攏收），囝仔歌，以及適合囝仔兮民間故事gah神話。若明顯是屬於國校以及幼稚園教科書方面，著暫時無收。其中，海翁台語文學嘛有一寡創作gah翻譯，我只有囥目錄耳耳（nia-nia）以後應該會全部攏收。台灣儂對著台語兒童文學會當講是非常無重視，咱全台灣揣揣咧，竟然只有按呢耳耳（應該閣有一寡無收著，毋閣應該是差不多囉），實在gah華語兒童文學完全bhue比得，應該是in兮千分之一，咱台灣實在是語言hong殖民兮國家無毋著。卜看我兮台語兒童文學目錄，請cih落去。目前有發現師大華語文研究所有囥一個目錄是囥佇方言教學資源網路頂，應該我嘛會囥入來。現此時有發現時行台語文會出真濟本台語翻譯文學，有勿會少是適合青少年以及國校六年級兮學生看兮冊，我會揣時間加入。

我發現基本上攏是西洋翻譯以及創作兮囡仔歌較濟，日本文學以及台灣本土兮故事較少，日本兒童文學基本上是無儂翻譯，我想阮應該會當位這先開始。我揣著是無版權問題（根據日本著作權法是作者死後五十年，雖然有延長到70年兮修法動向，毋過亦未通過）兮一寡文學家。主要有宮澤賢治，新美南吉，楠山正雄（日本民間故事），林芙美子（部分），鈴木三重吉（有一寡不適合zim兮囝仔），日本童話研究會翻譯兮萬里尋母（嘛會當翻做：走揣阿母三千里），有島武郎（有不少是適合囝仔gah少年），巖谷小波（三角gah四角）。另外，島崎繁村gah芥川龍之介嘛是有一寡作品適合少年或者是兒童看兮。因為阮實在無錢，若無，有真濟日本以及西洋各國兮作品會當翻譯，只好先位免錢兮開始，然後希望會當家己創作，或者是有閣較濟儂來創作。

我以後應該會分做幾組，比如講1.西洋翻譯組，2.日本翻譯組，3.台灣民間故事改寫組，4.南島原住民神話編寫組，5.本土創作組。每一個儂會當根據專長參加一個或者是兩個組，逐家會當透過我兮部落格做聯絡處，同時嘛會當用MSN固定聯絡，仝一組會互相聯絡，制訂寫作翻譯計畫，遮bhue無細膩寫著仝款兮物件。若是圖，聽講我朋友會揣人來畫，若是有會曉畫sui-sui兮圖兮朋友，嘛是真歡迎加入咧！

我zim是gah我朋友阿元先翻譯一寡文章，主要是日本文學作品，宮澤賢治，巖谷小波，亦閣有新美南吉等等。以後做好見本（sample），互逐家來參考。

我有發現著，作品好參像是囡仔歌詩較濟，阮認為干但按呢是袂用咧，因為，若是卜（bheh）互囡仔用台語思考，著愛父母用台語讀互囡仔聽，按呢囡仔遮會當用台語思考，訓練出用台語演講兮能力，若無著干但是唱歌跳舞耳耳(nia-nia)。