追尋天使

記「虱目仔e滋味」與「天使」的新冊發表會

「虱目仔e滋味」與「天使」的新冊發表會結束，滿心感謝、感動，位台北倒轉來台南。手內抱一把用粉茄仔色的紙包ka2真正sui2的藍色蓮花，這把互人欣羨的、甜蜜的祝福，是位瑞典倒轉來的黃晴美姊所送的。她的出現，互我一個足大的surprise，因為並無料到她此時會佇台灣。

 　佇日日備課的壓力下面，koh經過一禮拜囉。藍色的蓮花度過thong7-sui2的時，今已經開始lian—ki3。總是佇新冊發表會所感受到的，所有文友交織出來的廣闊氣力，猶著搡我向前，真濟的話題，猶佇我的心內佇發酵。

佇新冊發表會遇到黃晴美，真正是想beh到的歡喜。

想起2001年佇瑞典與她熟識，心靈的交流的溫暖，互北國的雲天攏變清爽。

貼出彼時所寫的長文，紀念此段相遇的故事。

真可惜，台灣在變，故事中的人物的命運嘛已經有真大的變遷。當作是古早故事，紀念親像山內雲霧變化多端的，台灣人的命運。

我曾真固執去愛一個人，固執去享受我受傷的心情，直到我失落所有的氣力。彼時，讀到Rilke的一首詩，感覺真會當講出我的心境，嘛帶領我去學習“放”。

將天使放互走，佇互相纏伴的兩個人中間創造空間，這是藝術啊！

足久以前就想欲貼出此首詩，拖到今仔日才做。

因為足想欲飛。

“所以我將天還互我的天使

祂就飛到遠遠所在

為著欲將親近留互我

祂學習（hak8-sip8）安怎來飛

我學著（o2-tioh）安怎來活

阮慢慢啊

深深認識對方”

在天使這本書出版了，美親一直真用心準備＂新冊發表會＂，實在m-chhai an-choaN來感謝她！

她寫一篇關係天使的文章，我真感動，討欄貼於此：

多謝美親與阿惠的辛勞！

期待真久囉！

”天使”與清文的”虱目的滋味”會作夥佇罔報舉行新冊的發表會。

時間：10月15日（禮拜日）中晝兩點到四點

地點：台文罔報辦公室

歡迎大家作夥來！

德國女畫家Paula Modersohn-Becker（1876-1907）,三十一歲就死於產褥熱。

我真愛她繪她自己有身的時的模樣，（就是在此擺生產了，她就過身去，）有寫一首詩：

 「你所想像的上帝是什麼款？」

Heinrich Boell, 海英里希‧寶先生是德國在第二次世界大戰後，一位重要的作家。

他對戰後的社會有深刻的描寫。在1972年得到諾貝爾文學獎。

寶先生積極參與和平運動，閣用他的筆批判社會與教會。他的書在台灣出版的有：

 「小丑眼中的世界」、「愛爾蘭日記」、「莫克博士所收集的沉默」、

 「九點半的彈子戲」、「一言不發」、「婦女們在河畔看風景」等。

我開始練習台文寫作的時，有翻譯一篇寶先生的短篇小說。

我愛他的風格，愛他對鄉土深深的情。他雖然m-si一位真有光彩的作家，總是我掠他做我心目中會當跟隨的長輩。

  「上帝真悲傷。」她安然來講：「咱著安慰祂。」

日光燦爛的下晡時，科隆（Cologne）大拜堂的兩座懸懸的尖塔佇金金的日光中，石仔所刻的十字花反射出日光，石頭仔若親像融佇日光內，變作溫暖的、流動的材質。

萊茵河的水氣親像霧，霧中有看見長長的青色鐵橋，兩台火車佇鐵橋頂sio-sut-loo7，一台向北，一台落南，in的輪仔用謹慎的速度運轉。佇車頭邊仔的海因里希寶廣場（Heinrich –Boell- Platz），少年人的直排輪鞋的輪仔顛倒是青狂勇敢。佇用紅磚仔角鋪的廣場，少年囝仔親像歸岫的蜂，用真緊的速度佇觀光客中間鑽來鑽去，好親像欲講：「這是阮的城市，阮的地盤！」

由此有紅磚仔砌的gim5-a2，會當通到河邊。我真愛坐佇遐，數念1985年過身去的海因里希寶（Heinrich Boell）先生，觀看他所愛寫的此個城市，與其中的人。

此禮拜六欲佇府城舊冊店分享寫”天使”此本小說集的心情。

位第一篇”天使”到路尾的”門前有大樹的病院”中間，其實隔有欲十冬的時間。此十冬內，所想的代誌，所遇到的人群，實在變化袂少。

寫此些故事的時，我的心佇記憶中的台灣，與著認真參與的德國大學生活中來來去去。只有想欲練習，成作一個講故事的人。

德語m7-si7互人感覺音韻有sui2的語言，總是此個語言有真濟sui2的文學作品，是一個有故事的語言--位鄉土的經驗到佇都市內的漂流，位樸素的生活描寫到複雜的心理描寫，反覆辯證的哲學反省，深沉的悲劇，利利的笑詼，活佇彼個語言的境界，會感受到文字的氣力，會歡喜奔走佇故事的樹林內。

我是佇德語的世界內底，開始我的台語創作。

基本上，我相信台灣文學的創作會當真廣闊，真多元。脫出意識型態與寫作題材的束縛，互台灣話真正成作有豐富的故事的語言。

我的文學工作，基本上，就是一款的眠夢，向望台灣的文學有一日親像德語的文學遐呢豐富，多元，深沉，趣味。就是安呢若定。

九二一的大地動已經過去七冬。

貼出幾首以前作的詩，數念一位佇大地動的時過身的大學同學。

Photo by Judie35

看著”茄苳樹窠”的一篇文章"不准講「台灣國」的民主"，想欲用此篇來回應：

佇南神校園內唱中華民國國歌

透早就互奇怪的歌聲吵起來。

位我的窗仔口看出去，是台南神學院thong7-sui2的一個所在--舊的院長宿舍，拆了留一個紅磚仔砌的台仔，發草仔發ka真正美。

一位掛目鏡的ojisang坐佇遐，在唱中華民國的國歌：

”三民。主義。吾黨。所宗。”每兩個字就停一下，足像蔣介石的演講風格。

朋友的老父已經離開世間，總是他無死，是已經得到永遠活。

本來，老父可能會成為地獄的火柴，性地壞，會博繳(賭)，打囝仔，打某，因為喪鄉受看輕。

與壞性地的老父比起來，阿母溫柔忍耐若天使。她引導囝仔去教會，佇喪鄉的日子將一個家庭挺起來，用豪爽的酒量交陪朋友。

有一日，溫柔忍耐的阿母無欲擱再忍耐落去。她離開壞性地的翁婿，離開她的囝仔，嘛離開教會。

佇一個新的城市，新的環境，她開始她新的人生，認識新的神明。過去堅持哭賴基督教的上帝，今所望的，是大小仙的神佛。

流浪漂泊的老父，佇年老的時，越轉來與做牧師的子作夥服事。無擱出壞嘴，無擱博繳，安安靜靜掃土跤，整理園仔，飼豬。看著他的人，攏感覺他有平安，是慢慢仔在行天路的人。

晚年的老父有恬靜的笑容，可能與過去阿母忍耐吞忍的笑容有像。

她出走，他轉來。只有上帝知影，安怎才會當將hia-e5破碎與痛苦的記憶，激出醇醇芳芳的人生美酒。

        我真愛駱維道牧師翻譯、作曲的一首新聖詩「在莓內有一朵sui2花」，裡面有一句講：「在繭內有隱藏應允，小蝴蝶beh得自由。」看起來醜、靜、無活氣的物，內底隱藏活潑、美麗的生命。基督復活，見證此款的活氣，互人充滿向望。在人間，咱嘛有時會當在受侮辱與損害的人中間，聽見著著繭內小蝴蝶在變化，在振動，咱就通知，充滿色彩與活氣的翅，有一日會展開。

        讀獄中詩人柯柏榮先生的詩，會當感受著即款繭內的振動。

        在台文詩作若春天的花蕊開滿即片先輩開墾出來的新土地的時陣，有一蕊面貌樸素，但是互人無法度放忘記去的花蕊，就是柯柏榮先生的詩。他是在2003年，才開始在獄中學寫詩，詩齡無長，由模仿別人的風格開始，在他的詩內，會鼻到黃勁連、方耀乾、陳金順等的詩味，若深入品味其中的意像、節奏，卻會透露他自己特別有的眼光與感觸的能力。

1957年，是掙脫殖民地身份的希望與榮耀，將無相款的族群結連做夥。49年後，這份希望與榮光，看起來已經變成失去氣力的暗淡記號。在全球化的經濟體系浮沉的生理人，結合政治有力者的氣力，將首都裝飾起來，四界攏看會著國旗，七彩燈火將大樓與街路照甲光映映。

...繼續閱讀

一本小說辛辛苦苦印出來，m7知著安怎來宣傳，少年輩的朋友講：簡單！設chit8-e5　blog，透過部落客中間的串連來宣傳。若無blog，in就m7知會當安怎為我來推冊。

所以我就得到阿鯉e5幫助，佇網路頂，設一個自己的岫。

有人問我部落格的意思到底著安怎來講較好？網誌？罔記？他講：一個開放的私人空間？

一個開放的私人空間。真好的講法！阿鯉是將它比喻作客廳，人客歡喜就來坐。無法度時常見面的朋友，透過blog的寫作分享自己的心情，是私人的分享，m7-si7公共的論壇。總是因為是開放的空間，大家自由行踏，互相傳播，新的朋友與氣噗噗的冤仇人嘛也出現來看你所寫的。將自己的私人心靈空間公開化，是值得興奮的分享，同（kang5）時陣嘛是需要有較粗的神經線的冒險。

不過，成作部落客，該成就會有一個力佇遐在搡，逼人去創作與發表，經驗著人客禮貌的拜會了，就會感覺：m7-thang互即個客廳傷過安靜寂寞啊！第一步踏出去，就甘願來冒險。

神學院的老蓮霧樹

葉若玉

花若雨

老蓮霧樹

粗樹皮

包的是

受剉掉的樹枝

所留落的傷跡

猶舊若佇熱天日頭曝

滿樹蓮霧就若鈴鐺仔

青白與粉紅相滲色

清清芳芳

淡薄澀澀

佇命運擱再出手以前

阿爸用歡喜感激的心

行過此欉老樹

曾聽見它五六十冬來

聚集佇樹身內面的歌

圖：Judie35

德國寫戲劇的名筆與詩人Bertolt Brecht過身50冬。

想起我有譯過一寡他的詩，將in攏整理佇此所在，算是紀念他，嘛紀念我自己所行過的路。

布雷希特詩選

一、佇烏暗e5時代

佇烏暗e5時代

敢通擱來唱歌？

佇烏暗e5時代

著要有歌詩

來唱明

烏暗e5時代 

戰爭若開始

恁e5 兄弟會變面

變ka2人攏認袂出

總是恁

著毋通變

In會去戰場　毋是

親像豬羊去受屠　是為著

欲去成就大事業　In會將

一切攏放袂記

總是恁

一項攏毋通放袂記

人會用燒酒來灌恁

親像對待其他所有e5 人

總是恁

著保持清醒

...繼續閱讀

佇什麼所在會當真方便買到“天使”？

佇台南就是“新樓冊房”（青年路），”府城舊冊店”(前鋒路，台南後驛對面)，以及”貧乏物語”(育樂街179號)。

府城舊冊店是阮真愛去的所在。第一擺去就發現有真濟遠景出版社與前衛出版社的新冊，是新冊neh!一口氣就買千外箍的冊。因為阿鯉買一本紀念遠景出版社老闆沈登恩的冊，老闆看著真興奮，自我介紹他自己與遠景的淵源，掀出冊內他與沈登恩的合影，看會出他嘛是一個為著出版與推廣好冊打拚夠底的人。此擺復較深談，知影老闆的名是潘勝夫，出身烏牛瀾巴宰族，真正是一位為冊癡狂的人。

有朋友講我的小說裡底討論真濟與母親的關係，老爸的形象相對真弱。

我想這是因為此幾冬真正較有思考著母女與母子的關係，老爸的部份傷複雜。

嘛有可能是老爸真正是較”無在場”。

去想著過去寫的一首詩，叫作”棗仔園內的紅雞規”（棗園紅汽球），配一張用電腦繪的圖貼出來互大家看咧，嘛算是過父親節。

（攝影：judie35）

...繼續閱讀