kam21

道理大條 - “覺得自己永遠是對的” – 請好好堅守這個原則, 真理長存.

既然不受重視, 就讓自己卑微一點算了…

有“覺得自己永遠是對的”作後盾, 一千個”對不起”可否真心?!

男有自己的想法, 女有自己的做法, 大家都同樣自私, 誰都改變不了, 最後就是委屈了你, 委屈了我.

狠狠的一個掌摑﹐眼鏡也飛墮地上﹐真的很痛…

相對你的痛心﹐皮肉之苦不算什麼…

Vague.... or?
I am bad.

都是莫札特的錯。

驚世駭俗的安魂曲，鬼哭神號，緊扣心弦，但凡有血有肉有情感的， 聽了進去，莫不令人輾轉反側，徹夜難眠。

都說音樂有魔，沉淪… 只會讓它緊咬不放，不能自己。

躺在床上瞪著天花，似滿足，更是若有所失，三更四更直至五更，閉上眼睛裝著睡，似夢非夢間，耳中所聽盡是仙樂飄飄…

琴晚比莫札特攪到失眠，今日帶住個黑超(驚人黑眼圈)返工， 晚上Gary 黎左淘大搵我晚飯，又係日本野，叫左幾多野食，一路食個老板娘係咁不停做推介，開籠雀講不停，三八﹗最憎d人企係面前睇住我食飯架喇﹗Gary最愛牡丹蝦，食得津津有味…… 不過之後要立即送佢去醫院﹗

                    ↓

                    ↓

                    ↓

                    ↓

                    ↓

                    ↓

                    ↓

                    ↓

                    ↓

唔係食物中毒，而係佢要趕返醫院上班，哈﹗

   琴晚同阿祥玩左一晚，今朝起身又唔覺好累wor，返到音樂中心上堂都提到勁，放工後急急腳返屋企沖涼換衫，今晚又要出動，同師兄Joe補祝生日，Vincent仔係銅鑼灣個間《一生任食創作和食》(個名又長又怪)訂左位食放題，我第一次去呢間，d野食尚可，Alec同師兄Joe相當白痴，竟然將人地攞黎既生牛脷 (要熟食架!)一口食左﹗(好彩唔食牛脷，如果唔係我會一樣咁白痴) 師兄Joe一早講明係佢請客，咁我地唯有請返佢飲野啦，臨走時師兄Joe收到禮物：Vincent送左本鋼琴百科全書《The Art of Piano》(我提議買既)、我就送左套日本絕版CD《Mozart Complete Sonatas: Larrocha》，師兄Joe開心死了﹗

   好在一早叫 Eddie仔幫我係 Ex Bar留左位，唔係去到真係要坐地下，星期六全院滿座係正常事嘛，坐低後 Alec同師兄 Joe就雞琢唔斷，我咪同Vincent仔玩骰樽，Dickson都黎左，三個一齊玩，不過佢地成晚搵我做笑柄，正死仔﹗Eddie仔今晚唔洗返，不過佢都專登走過嚟見下我，算佢啦﹗我同班死仔玩到迷晒，竟冷落左師兄Joe一角，佢唔會怪我吧，因為佢係世間上最 nice既男人。

   四點幾散場。

   曾幾可時，周末肯定係工作最忙既日子，時而勢逆，而家既周末咪係玩物喪志既日子囉。

阿祥約食飯，去﹗睇戲，去﹗再落Bar，諗幾秒，去﹗

   佢知我鐘意恐怖片就提議去睇個套《康州驅魔實錄》，不看猶可，一睇丟那媽： 套戲做左一半，係冇劇情發展伏線既，一味靠彈 d野黎做驚嚇技倆，四十五分鐘係咁彈左幾十次，真係比佢彈到心都煩晒﹗嚇到 d靚妹仔既，資深恐怖迷如我者就當佢冇到。套戲最後所謂驅魔，就係將屋入面既屍體一把火燒晒佢，就係咁﹗套戲最恐怖既地方---- 係張海報(見圖)：個細佬竟然嘔 d屎出黎﹗唉… 號稱真實靈異事件改編，不過如果你上網 search一下呢單野，就知套戲畫蛇添足得太多喇(不過邊一套改編電影唔係故弄玄虛?!)，可能我對荷里活既恐怖片有偏見啦，不過睇佢地總好過睇任何一套垃圾港產片，都係勸荷里活好好地拍一兩套認真既恐怖片，以息民怒。

   睇完戲十點諗住去食飯，不過阿祥話不如直接落Bar叫野食同飲酒，黎一次飲飽食醉wor，又好﹗落左T Bar叫老板抄左幾味，撞到阿祥既朋友仔Alan，佢又出去買左幾盒野食返黎，成桌都係﹗猜下枚、食下野、推下骰、飲下酒，就係一晚架喇，阿祥話今晚好充實wor。

   某星期六，我如常係音樂中心自己房間專心咁同學生上課，有人敲門，係Y小姐。
Y：「李sir，你應該係熱氣，咀角都爛了，我煲左d涼茶比你呢！」(你都死既，你唔比我同人打茄倫打到口爛咩！)
我：「嗯… 不過我而家飲緊咖啡喎！你放抵，我有時間會飲既。」
佢放抵後轉身向我掩咀一笑，媚態少婦強作可愛，還是春青少艾嗎？嘔心到不行。
即使殷勤盡獻，我都決不動容，我有我原則，老的女人我不能愛。

   一小時過後，又有人敲門，係N小姐。
N：「李sir，上次你提過話鐘意飲豆漿，我帶左黎，係我自己親手磨既！」(如果你去磨豆腐，我會更高興的。)
我：「嗯…不過我岩岩飲完咖啡喎！你放抵，我有時間會飲既。」
佢放抵後正想走時，見到桌上有壺涼茶係度…
N：「係邊個比架？？？」
我：「哦！係Y小姐送黎既。」
N 頓時面色大黑且目露兇光… (獰面更勝《聊齋》中的畫皮女鬼)
要發癲嗎？唔好係度，過檔吧，去搵Y好了。
吃醋嗎？醒醒吧！幾十歲人，一把年紀還是白活！

我再重申，感情事係需要互動，唔係一廂情痴就可如願，你愛我，我不愛你，世間上不知凡幾。執念只會造成更多一顆顆破碎的心，命裡有時終須有，命裡無時莫強求，何苦呢？而對於我，終極結論係：
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓ 
                                 ↓
        老女人誤我一生。

   
   今日十二點起身，放假黎講算好早，開MSN見到Vincent，就叫佢陪我食飯，佢話OK，跟住我地就去左《雲興龍》食野喇，食飯時我地講開Fukie，唔經唔覺佢都離開左我地九個月了，上個月佢生忌我都冇去睇過佢，都有d內疚感，Vincent話佢今日得閒可以帶我去，正好！擇日不如撞期啦。
   三點幾出發，先去沙田新城市廣場，因為我要買花，終於搵到間花店，個老板娘係咁hard sell：「想要邊類型既花呢？送比女朋友定媽咪呢？…」，我地都唔知點答佢…，跟住佢拿左本書出黎，有列晒d花既款式同價目，不睇猶可，一睇眼都突，全部五百至一千元不等，無奈中…，「嗯…不如我比兩百元你同我配啦！」我話。
   買好花再搭火車去目的地火炭，係附近便利店買左Fukie生前食既煙仔，配上四罐啤酒 (從前我去親佢屋企都係買四罐，仲成日比佢話我d啤酒唔夠凍，希望佢唔好報夢比我知話今次d啤酒又係唔夠凍啦)。
   個地方唔難搵，係火炭工業區後面既小山丘上，環境清幽，比人帶過一次我以後都會識去。終於見到Fukie了，擘頭第一句便同佢講：「Fukie，我黎左喇，你生日我冇黎睇你，你唔好嬲啊！」之後Vincent上香，我地放抵祭品瞻仰一番，其實我有好多野想要同Fukie講，不過正值裝修，幾個工人行出行入，影響晒d氣粉，咁我就同Vincent走去外園坐底休息下，懷愐返以前同Fukie 既舊事，又講起Guggi同Ball Ball (兩隻狗狗)…，講下講下時間都唔早喇，走之前再入去望多Fukie一眼，講聲再見。
   出返黎九龍，我叫Vincent陪我去深水埗，我帶左佢去食一檔好正既魚蛋粉 (佢都話好食，你知佢平時幾picky架啦)，跟住去黃金買野，我買左10隻DVD：八張音樂碟、兩張日本恐怖片 (終於比我搵到《東海道四谷怪談》中文字幕版，好野！)，十張碟都係 $235咋，抵哩！喂住Vincent話想買鞋，我地就去左旺角波鞋街睇下，不過最後佢冇買，反而係我買左，今日收穫真大！見時間仲早就行左一陣信和，行左半個鐘，大家都已經好累喇，隨即搭的士返九龍灣食飯。就係咁，Vincent陪左我一日，好充實既一個假期。
多謝Vincent仔！