近日心情忐忑，情緒低落，原本有好多野想寫﹑想做，全部擱置左。
但聽晚係一個好重要既日子，就算心情幾唔好都唔會影響我去赴約，佢係我最鍾意既鋼琴家，當世最強勁之一 (可能最偉大) － Martha Argerich，终於來香港開音樂會喇！想當年我為左要聽佢既音樂會，由日本追到英國，由美國追到加拿大，票都買左，但都係失望而回，因為佢次次都取消！係2001年，我终於有幸捕捉佢o係北京既四塲音樂會，o個次佢好乖，四場彈哂！呢個傳奇音樂家要聽佢現場一d都唔易，但如果佢show up，你就會畢生難忘，因為佢係自成一級既大師。佢今次來香港立即成為音樂頭條，Martha啊！Martha啊！希望你今次唔好再甩拖！
半個月前，另一個同級人馬Krystian Zimerman亦係文化中心開過音樂會，實在太完美喇，完場時撞到一個音樂朋友，佢好激動咁捉住我講：「Zimerman既演奏真係最迷人，最完美既…」一路講一路抹眼睛，睇佢都快要流出眼淚了。
Martha Argerich同Krystian Zimerman都係一等一大師，但風格完全兩樣，等我心情好番時就會寫篇文章講下佢地d 演奏同風格。