今日直落八個幾鐘，命都比埋佢，，放工後急急腳去買左個飯盒，返屋企食飽之後又要趕工，練下聽日音樂d曲仔，練左一個鐘到見口渴，水又飲哂又懶得煲，隨手攞起個橙，攞左把大刀(有鋸齒)，諗住食個橙解下渴都好，一刀切落去… 橙就切唔成 (原封不動)，刀就剷左落隻左手食指度！真係痛到頭髮都樹起！即時血流如注，由廚房滴到出客廳，好似發生兇案咁，都幾矚目驚心！流血不止唔係辦法，我惟有右手扶住左手咁跑出門口搵的士搭去醫院，沿途係咁滴血，的士大佬都好識做，開哂快車咁 (可能怕我整污遇佢架車)。 
「你有咩事？」護士問。 
「我切親隻手指…」 
「點切到？」 
「切橙切到。」 
個護士聽左好似想笑咁，不過佢都忍住冇笑出黎仲好溫柔咁問：「比我睇下切成點…哎呀！用乜刀切架？傷口都幾深喎！點解冇屋企人陪你黎架？你自己住架？陰公！可能要縫針呀！比醫生睇下再決定啦…」。(口水婆，下刪百字) 等緊醫生時我心亂如麻：男子漢流血不流淚，唔算係d乜，不過諗起聽日個音樂會就煩，好重要，責任又大，彈定唔彈好呢？開場曲冇我上場肯定一獲泡，我編d曲佢地冇人識睇識彈，死緊喇今次…，靈機一觸突發奇想：我只係傷左手，仲有右手嘛，叫我阿哥彈左手咪得囉！掂！ 
    終於見到醫生喇，比佢反開個傷口左睇右睇 (痛到眼淚水標)、打麻醉針、打破傷風針，最後縫左三針，攪左成個幾鐘命都冇半條，返到屋企都差唔多凌晨三點喇，洗個面就訓，訓到四、五點到又痛醒左 (麻醉藥散左)，唉…