某星期六，我如常係音樂中心自己房間專心咁同學生上課，有人敲門，係Y小姐。
Y：「李sir，你應該係熱氣，咀角都爛了，我煲左d涼茶比你呢！」(你都死既，你唔比我同人打茄倫打到口爛咩！)
我：「嗯… 不過我而家飲緊咖啡喎！你放抵，我有時間會飲既。」
佢放抵後轉身向我掩咀一笑，媚態少婦強作可愛，還是春青少艾嗎？嘔心到不行。
即使殷勤盡獻，我都決不動容，我有我原則，老的女人我不能愛。

   一小時過後，又有人敲門，係N小姐。
N：「李sir，上次你提過話鐘意飲豆漿，我帶左黎，係我自己親手磨既！」(如果你去磨豆腐，我會更高興的。)
我：「嗯…不過我岩岩飲完咖啡喎！你放抵，我有時間會飲既。」
佢放抵後正想走時，見到桌上有壺涼茶係度…
N：「係邊個比架？？？」
我：「哦！係Y小姐送黎既。」
N 頓時面色大黑且目露兇光… (獰面更勝《聊齋》中的畫皮女鬼)
要發癲嗎？唔好係度，過檔吧，去搵Y好了。
吃醋嗎？醒醒吧！幾十歲人，一把年紀還是白活！

我再重申，感情事係需要互動，唔係一廂情痴就可如願，你愛我，我不愛你，世間上不知凡幾。執念只會造成更多一顆顆破碎的心，命裡有時終須有，命裡無時莫強求，何苦呢？而對於我，終極結論係：
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓
                                 ↓ 
                                 ↓
        老女人誤我一生。

突然諗起跟從前既愛人係情人節前夕既一則對話： 


佢：「就黎情人節喇，你會送乜野比我？帶我去邊度玩？」 
我：「你愛我，我又愛你，心裡明白，就一年三百六十四日都係情人節啦，所以情人節個日就係定休日，大家可以做番自己野，唔洗見面架喇。」 
佢：「咁我就好似冤鬼咁一年三百六十四日都纏住你，情人節個日先比你去休息，死未？！你試下唔陪我丫！」 
心想：「死野！陪陪陪！(陪)了夫人又折兵！」

老生常談，總之情人呢家野，有又煩，冇又煩。 
其實冇都未必太煩，不過有呢，可以好(很)煩！ 
你話係唔係？

朋友話我變左，以前鐘意失蹤，而家鐘意自閉。

其實我唔係一個刻板既人，興之所致，一個電話，一樣可以call哂 d朋友出來V V WET WET不醉無歸，溝女飲酒食煙講粗口 (仲有其他)，只當家常便飯。不過而家我的確收歛左，從良嘛！呢 d係咪叫〝反樸歸真〞？！

我真係變左咩？！就算係，都係發乎自然，從來唔係刻意安排。

亦有人問我，唔浦唔wet，又唔拍拖，獨來獨往，唔覺lonely，唔怕悶咩？ 一d都唔悶，亦唔lonely，仲好開心，因為我識得“自我陶醉" :

陶醉一：電腦。

近日買左部新電腦，玩極都唔厭，我學識將d寶貴既古老卡式錄音帶轉成CD，又可混音，更可echo，將sound effect左cut右cut，好正！成個錄音師咁。幾百盒錄音帶，有排玩！而家我可以自製CD同DVD喇！突然間又諗起我以前寫過d曲，整番張自己既CD專輯都好喎，拿拿聲係床下底搵番自己以前 d傑作出來先，不看猶可，一看嚇破膽，好核突呀！點解我以前可以寫到d咁核突既野出來架！難聽至極，不倫不類，係我從前天真，定係我而家要求高左呢？！唉，又要大幅修改，唔係點比得人聽呀，埋頭苦幹啦。

 陶醉二：聽碟睇碟。

一星期總有一兩日掃貸，唔止係音樂CD，電影DVD都係掃貸對象：動作﹑科幻﹑喜劇﹑浪漫﹑動畫，以致四仔通通一網打盡，永不落空。其實有好多正戲好想同朋友仔分享下，但佢地一聽到只得英文字幕，個個都打退堂鼓 (睇四仔佢地又咁主動，哼！) 咁我唯有翻譯中文啦，透過電腦，制成附有中文字幕既DVD，利害哩，好大功夫架，有人話我無聊，我鍾意呀，吹咩！

陶醉三：工作同創作。

有人話，將自己興趣發展成自己事業係最幸福既，某程度上，我認同。身為音樂人，我既工作就係興趣囉，要keep住水平，就要好好練習，要增進修為，就要飽覽音樂，大把野要學啊！不過，淨係鋼琴上武來武去係唔夠既，創作亦係音樂人重要一環，作曲就成為自我沉溺既時段，呢個時候我會完全集中，更喜怒無常，生人勿近。音樂捕捉文字言語以外既感覺，可以虛無漂渺，也可超凡入聖，但文字始終係大家表達情感既主要途徑，就此，我不時要寫下文，透過文字創作，令自己腦筋同思維上都可以活動一下。

陶醉四：書。

抱歉，我從來冇完整睇哂一本書，我冇咁既耐性，不過，去過我屋企既朋友都知道我滿屋書，形形色色，花多眼亂，左翻右翻，咁就一日。睇書當然唔係消磨時間既最佳方法，但肯定係最方便 (八掛雜誌都照殺)。早排，幾個朋友講起金庸小說時眉飛色舞，攪到我心痕痕，又想買幾套擺係屋企。

陶醉五：運動。

呢家野我以前冇乜概念，而家有喇，成日鬱係屋企做自己野唔得既，冇d活力，病貓咩！所以有時早一個鍾起身，係公園慢跑兩個圈先食早餐，人都精神d，仲有，每晚或隔晚做五十下掌上壓，又做背肌練習，鬆下筋骨，練下大隻，健康d。遲兩日再去埋游水仲好！(成年冇游lu)

你睇你睇！我咁多野做，咁多野忙，比自己既時間都唔夠，仲邊有時間去悶﹑去lonely丫！寫完呢篇野之後，就會飲紅酒睇DVD喇，不亦樂乎。我係一個充滿期待既人，無論係預備一場音樂會呢d大事，或者返屋企睇DVD呢d小事，我都會有期待，呢 d 叫生活趣味。

     後記：而家 d死靓妹死靓仔，成日怕悶，又話lonely呀咁，講到尾，都係佢地冇目標冇追求，又唔發掘真正興趣，人地話咁咪咁囉，缺少自我，生活懶散，做乜都冇熱衷。想當年我好似佢地咁既年紀，已經雄心萬丈，越洋深造 (屋企窮，靠自己)，抱住放眼天下﹑挑戰世界既宏觀。今日，我成就雖然唔大，但總算有丁點成績，可以令我享受自己，享受生活。