有聲ê哦～～）《草蜢公》（一）草蜢公，chhēng 紅裙。 卜叨去？卜搭船。 路頂拄著姊妹仔群。 木屐仄，摕來格； 骹帛頭，放煙火。 | Chháu-mé-kong, chhēng âng-kûn. Beh tó khì ? Beh tah-chûn. Lō·-téng tú-tio̍h chí-bē-á-kûn. Ba̍k-kia̍h-cheh, the̍h-lâi keh; Kha-pe̍h-thâu, pàng ian-hé. |
草蜢公，chhēng 紅裙。 卜叨去？卜等船。 船叨去？船挵破。 船柴梆，卜燒灰。 灰叨去？灰賣銀。 銀叨去？銀娶姥 。 姥叨去？姥生囝。 囝叨去？囝生孫。 孫叨去？孫趁鴨。 鴨叨去？鴨生卵。 卵叨去？卵請客。 客叨去？客放屎。 屎叨去？屎沃菜。 菜叨去？菜開花。 花叨去？花結籽。 籽叨去？籽榨油。 油叨去？油點火。 火叨去？火 互 老公仔 食薰 pûn-pûn--hoa。 老公仔死佇芎蕉骹。 用甚物貯？用破豬槽貯。 用甚物khàm ? 用破米籮khàm。 甚物儂拜？老囝婿拜。 甚物儂哀？老婆仔哀。 甚物儂埋？天地出來埋。 |
Chháu-mé-kong, chhēng âng-kûn. Beh tó khì ? Beh tán-chûn. Chûn tó khì ? Chûn lòng-phòa Chûn-chhâ-pang, beh sio hu. Hu tó khì ? Hu bōe gûn. Gûn tó khì ? Gûn chhōa-bó·. Bó· tó khì ? Bo· siⁿ-kiáⁿ. Kiáⁿ tó khì ? Kiáⁿ siⁿ sun. Sun tó khì ? Sun thàn-ah. Ah tó khì ? Ah siⁿ-nn̄g. Nn̄g tó khì ? Nn̄g chhiáⁿ-kheh. Kheh tó khì ? Kheh pàng-sái. Sái tó khì ? Sái ak-chhài. Chhài tó khì ? Chhài khui-hoe. Hoe tó khì ? Hoe kiat-chí. Chí tó khì, chí chà-iû. Iû tó khì, iû tiám-hé. Hé tó khì ? Hé hō· lāu-kong-á chia̍h-hun pûn-pûn--hoa. Lāu-kong-á sí tī keng-chio-kha. Ēng sím-mi̍h tóe ? Ēng phòa ti-chô tóe. Ēng sím-mi̍h khàm ? Ēng phòa bí-lôa khàm. Sím-mi̍h lâng pài ? Lāu kiáⁿ-sài pài. Sím-mi̍h lâng ai ? Lāu-pô-á ai. Sím-mi̍h lâng tâi ? Thiⁿ-tōe chhut-lâi tâi. |
〖釋義·開拆〗
草蜢公：chháu-mé-kong / chháu-nih-kong，草蜢，【華】蝗蟲。
卜叨去：beh tó khì，卜去叨位。【華】要去哪？
搭船：tah-chûn.
路頂：【華】路上。
拄著：tú--tio̍h / tn̄g--tio̍h，【華】遇到。
姊妹仔群：chí-bē (mōe)-á-kûn，諸姥囡仔黨、諸姥囡仔伴。【華】幾個要好的女孩互相結成夥伴。
木屐仄：ba̍k-kia̍h-cheh，也有叫做「木屐搭」。【華】木屐的後跟。
摕：the̍h，【華】拿。
骹帛：跤帛，kha-pe̍h，古早時，諸姥儂teh縛跤的布帶仔。【華】裹腳布。
挵破：lòng-phòa / lòng--phòa，撞破/打破。
柴梆：chhâ-pang，木板。
灰：hu。【例】①火灰（【華】灰燼）；②鋸屑灰（【華】鋸木屑）。
趁鴨：thàn-ah，趕鴨。
沃：ak，【華】澆水。
老公仔：lāu-kong-á，老夥仔，老阿公、老阿伯。老婆仔：lāu-pô-á，老阿婆。囝婿：kiáⁿ-sài，【華】女婿。
食薰：chia̍h-hun，【華】吸煙（抽菸）。
pûn-pûn--hoa：pûn熄，【華】吹滅。
芎蕉骹：keng-chio-kha，香蕉林樹下。
貯：tóe / té，【華】裝、盛。
米籮：bí-lôa，【華】籮筐。
哀：ai，吼（háu）、哭。【華】啼哭、哀嚎。
