April 7, 2006
鳥鼠仔倌
Niáu-chhí-á-koaⁿ, khan-gû khan-bé chiūⁿ tōa-soaⁿ
鳥鼠仔倌①，牽牛牽馬，上大山。
Soaⁿ-téng bô bé-chháu, khan lâi-kàu lāu-chím-pô--á in mn̂g-kha-kháu.
山頂 無 馬草，牽 來遘 老嬸婆仔 in 門跤口。
Poa̍h-chi̍t-tó, kha thiàⁿ-thiàⁿ.
跋一倒，跤疼疼。
Tâu ô-kiàⁿ, ô-kiàⁿ khì bē ô.
投蚵鏡（蠔鏡）②，蚵鏡去賣蚵。
Tâu chím-pô, chím-pô khì chò-kheh.
投③嬸婆，嬸婆去做客。
Tâu tōa-peh, tōa-peh bē âng-ku.
投大伯，大伯賣紅龜④。
Tâu chí-hu, chí-hu khì phah-chóa. (
Chí-hu bē chho·-chóa)
投姊夫，姊夫去拍紙⑤。（姊夫賣粗紙⑥）
Tâu-lâi tâu-khì tâu-tio̍h góa, hāi góa sim-koaⁿ pho̍k-pho̍k-toāⁿ.
投來投去投着我，害我心肝噗噗彈⑦。
Ke-kak oāⁿ ke-nōa, ke-nōa lìn-lo̍h chúi.
雞角換雞僆⑧，雞僆lìn落水。
Gia̍h-chhéng phah chúi-kúi, chúi-kúi bīn o·-o·.
攑銃拍水鬼，水鬼面烏烏。
Hôe-siūⁿ giàn nî-ko·, nî-ko· cháu-khì tiàm.
和尚憖⑨尼姑，尼姑走去坫⑩。
Ku kā kiàm, kiàm chi̍t-khih.
龜咬劍，劍一缺。
Ku kā pih, pih lun thâu.
龜咬鼈，鼈圇頭⑾。
Ku kā kâu, kâu lut-mn̂g.
龜咬猴，猴黜毛⑿。
Chàng ùn thn̂g, ùn liáu-liáu.
粽揾糖⒀，揾了了。
Phah kheh-chiáu, chiáu bô bóe.
拍客鳥⒁，鳥無尾。
Siáu-káu-kang thau kā âng-ku-kóe.
痟狗公 偷咬 紅龜粿。
【注解】（普通話）
①鳥鼠仔：老鼠。「倌」，在閩南語中，相當於普通話裡的新郎官的「官」。比如，儂客倌（客官、客人）。在童謠當中，稱動物為「倌」是采用擬人手法。鳥鼠仔倌，可譯為「老鼠君」；又如「田蛤仔倌」（可譯為「青蛙郎君」）。
②蠔鏡：ô-kiàⁿ，舊時，靠養蠔（海蠣）為生的一種鈿農。
③投：指程度較輕微的狀告，也訴苦的意思。
④紅龜、紅龜粿：閩南當地一種五穀類食品。常當祭品。
⑤拍紙：打紙漿，造紙。
⑥粗紙：手紙。
⑦噗噗彈：怦怦跳（心跳加速的情形）。
⑧雞角、雞僆：分別表示公雞與未下蛋的小母雞。
⑨憖：愛好（略含貶義）。
⑩坫：tiàm，漳州話表示躺藏。相當於「覕（bih）」。
⑾圇：lun，縮進。
⑿黜：lut，脫。
⒀揾：蘸。
⒁客鳥：喜鵲。
Posted by at
天空部落 │20:57
│
回應(8)
│
引用(8)
│
閩南歌謠
引用URL
http://blog.yam.com/limkianhui/trackback/5888493
Che 「客鳥」 ê 講法真心適，nā 我進前是聽人講：台灣自底無 chit 款鳥，是清國 chi̍t-ê 官員來台灣了後，感覺 che 鳥好吉兆，台灣 soah 無，m̄-chiah 對唐山 chhoē chi̍t 對來台灣放生，所以 hō· 人叫做「客鳥」。
Kā 我講 ê 人，koh 講頂峘 chit 款講法是歷史冊揣有記載--ê，總--是我家己無去反--過。
Nā 伊按呢講有影，照講「客鳥」chit-ê 詞是 tī 台灣發祖--ê，林兄 kám 有 chhoē-tio̍h sím-mi̍h 資料，thang 證明 chit 號講法是著抑毋著？
這是頭一擺聽講。呣佫，客鳥即詞我自漢着安呢講啊neh。臺灣傳過來的，真少，我印象當中，hoān-sè kán-ná 無幾个。像講「牽手兮」，這嘛是我大漢了後chiah開始有咧聽儂講。Ah nā「客鳥」，自古早着有啊哩，可能性無大。Sap-bûn（肥皂），佇閩南chia嘛是ùi古早（明、清）着有啊neh，我感覺Sap-bûn即詞是明朝的時代，過番討趁的漳泉儂直接ùi番爿hia學轉來的，hit陣，中國上早過番的著是福建漳州佮泉州的儂，比廣東儂佫咔早。漳泉儂先過番了後，chiah佫過臺灣。甲午進前，閩南佮臺灣猶未有「方言差」，兩爿的百姓chhiāng-chāi咧起起落落。
我嘛捌看過有的網頁寫講「正港」即詞是台灣土産的。呣佫，事實上，即詞佇閩南嘛自來着有啊。所以，像即款的，有兩種可能：第一，自來佇閩南著有，路尾傳過去台灣；第二，甲午進前，兩爿平平攏有的，嘛有可能是先佇臺灣出現，路尾兩地攏通用。
不而過，自來，佇臺灣發明的新詞，傳轉來福建的無儕，並且透底攏是有電視了後chiah傳轉來的，比論講「便當」。像這，我細漢着呣捌儂講過。
「客鳥」、「正港」、「sap-bûn」、「三八」……chiah-ê,阮自細漢出世逐工攏咧講，我個人感覺chiah-ê應該呣是臺灣來的。汝罔參考啦。
Ló·-la̍t--lah～
總--是 ài kā kāng-chi̍t 項代誌 ǹg 無 kāng 款 ê 人請教，m̄-chiah bat ē chiâu-chn̂g，所以我無別 ê 意思，kan-taⁿ 是抵好看--著，順紲問--chi̍t-ē niā-tiāⁿ。
語詞是 toh 位發明--ê，講實在--ê，在我攏無要緊--lah，你看我對古調 hām 音韻知無半撇，林兄 tō 知影我 m̄ 是對 che 特別致意 ê 人，好玄--niā-tiāⁿ ^___^
三八，這nah有要緊啦^___^ ，着親像汝講的安呢，問過來問過去，攏嘛是想講beh加聽一寡無共款的意見。Ah汝nā無講，hoān-sè我永遠嘛呣知。閒，我chiah佫來去查看māi。
Taokara kap Hui sian,
「khe-chiau 客鳥」chek-e chiau-a-mia, goa ti kui-lo tang chuinn bat tiam chit-phinn Tong-tiau bun-gian-bun e bun-hak chok-phin lai-bin khoann-tioh. Goa kam-kak khe-chiau si tui bun-gian-bun chio-eng e meng-su, m si E-lam-oe koan-toe tioh u e meng-su.
「Chiau-kong-chhi」chek-e sut-gu m-chai tak-ke u bat thiann-tioh bo? Chek-e chiau-a-mia chiah si E-lam-oe koan-pun u eh.
Toa-leh Chheng-tiau chin-cheng, tiam-ti Tai-oan iah khiam-chhai si bo「khe-chiau」chit-chiong chiau-a. Put-ji-kou, goa kian-ki lan na si u eng-kang tak-ke e-sai chiah khi tou-chu-koan hiau-hiau khoann-bai, chhe chit-koa kai-siau chiau-lui e "chiau-lui lek-su hun-pou chheh" lai khoann-khoann, khiam-chhai e-tang hoat-hian tioh sim-mih oann-ko.
K-b-s hiaⁿ:
Kú bô khòaⁿ-tio̍h lí ah, chit-chām-á leh mih-tài?
“客鳥”（ kheh-chiáu ） chit-ê 語詞，我 ná 像嘛捌佇 tó 一篇古漢文裡底有看著。不而過，我感覺這 khiám-chhái 是 閩南語 佮 古漢文 自本 著 平平 有 的 物件，呣是講“我去借汝，抑是汝來學我”安呢。
Hui sian,
Chek-cham-a na u eng e si-chun, goa koh si kha-siong khi siu-chui. Tioh si an-ni-sinn lah, ma bo siann-mih.
Li na u sim-mih tai-chi bo-eng thang si-siong lai chiunn-bang, ma ng-bang li e-thang ti chit-e le-pai chhiunn chit-mai bang. In-ui, ti "E-lam-oe e bong-lok se-kai" na bo khoann tioh li e iann-chia si eh-khi hou lang kam-kak bo-siunn-sio ah. Ng-bang lan tak-ke e-tang koh kha he-hiong chit-e! Thang hou E-lam e bun-hoa u ki-hoe koh oa-oa loh-khi.
Ti lin-se-kan tioh si u chin-choe e tai-chi thang hou lan lai hoan-ho, put-ji-kou na si e-tang choe chit-koa ka-ki kam-kak u heng-chhu koh hap-hoat e tai-chi, hit tioh si seng-kong e jin-seng. Goa ah si ka-ki chhin-chhai kong-kong eh nia, li chiah bong chham-kho khoann-bai.
he4 - hiong1; tioh si nou-lek, ah-si ka-iu e i-su.
KBS hiaⁿ:
Lí siuⁿ kheh-khì lo·h, sī lí m̄-kam hiâm lah. Góa si̍t-chāi phó·-thong phó·-thong niā lah...ah lí án-ni kóng, hāi gún soah khí pháiⁿ-sè...
Bô-gî-gō· KBS hiaⁿ lí ôan-á ài siû-chúi o·h ! Kū-nî nî-bé hit-chām-á, góa mā-ū thàn lâng khì o̍h siû-chúi, m̄-koh, sî-kan iú-hān, o̍h bô lōa kú to̍h pàng--khì lo·h. M̄ chiah-ē kàu chit-khóan lâu-pái, góa iá-koh bōe-hiáng siû.
