看全文，線頂聽錄音~）一半條仔笑詼古，分逐家做夥來分享，娛樂娛樂，趣味趣味，輕鬆一下嘛
歹——- 半暝精神，發現阮尪kā阮攬tiâu-tiâu，心肝頭一陣暗爽：「青仔叢，日時仔佫會假斯文，暗時仔著hiàn原形。枵鬼假細膩……」拄想beh好好來享受伊的「款待」niā，soah聽著伊咧陷眠：「安某的，足寒的！」阮氣一下，險一骹kā伊chàm落去眠床底。
- 昨昏暗，hām阮尪做夥看電視。女主角拄好咧跳芭蕾舞。阮尪講：「安某的，我感覺汝來跳，oân-á真有合（ha̍h）」。阮心頭一時暢but-but （thiòng-but-but）：「伊一定感覺我的體格足水足讚的！」Ah呣佫，阮想beh聽伊親喙kā阮呵咾（o-ló），choăⁿ 假細膩，問伊講：「為啥物講我有合？」想遘即个碰肚兮，soah kā 阮應講：「跳芭蕾的儂，胸前的負擔用傷大……」阮聽了，險按椅頭仔栽落來。
- 最近，hām阮尪講著所費開銷的問題。阮尪講，阮兩个定定安呢烏白買東買西，開錢攏無計劃，伊講安呢呣好，講beh下決心kā即个歹習慣改掉。禮拜日下晡，阮尪陪我去踅超級市場。我看著一款我愛食的沙琪瑪（sakhima: 一款sì-siù-á），標價二箍三，拄想beh伸手去摕，soah聽阮尪佇邊頭喝講：「即款即款，二箍一的，二箍一的……」我真正暈倒，儉kah即款程度，有影「鹹佫澀」……
- 有一日早起，我公休無上班。阮尪去上班，我送伊遘電梯口。電梯門開開，我越頭準備beh倒去，soah聽阮尪佇後壁咧叫，越頭一下看，即个呣成兮，竟然靠佇門邊，一骹khiau懸懸，kā 電梯門擋tiâu，頭敧敧（khi-khi），佫比一个POSE，chhio-kiak-kiak，kā 我講：「安某的，裡底無儂，chim一下咯！」……真正有夠嬈（hiâu）！
- 有一擺，我對著鏡咧梳頭，阮尪坐佇邊頭。我ná梳頭ná講：「汝講我nā是逐工下班倒來攏呣免煮食洗蕩兼拼掃，攏免做半項，安呢呣知偌好咧！汝講是呣是？」 阮尪行過來，soah用雙手直直kā我搖佮chhe̍k，佫講：「心愛的，呣好佫陷眠啊，時間無咧早啊neh！」……我真正「氣死驗無傷」。
- 我定定佮阮尪鬭陣看影碟片，呣佫，逐擺nā beh 換片，是足痛苦的，尤其是寒儂（koâⁿ--lâng），冷颸颸，勼坫被空勼kah燒燒，實在呣情願peh起來換。遘kah beh 換片，我著假睏去，佫假khô·（起鼾：khí-hoāⁿ），阮尪無法度，只好鼻仔挲挲咧，家己peh起來換。聽候伊換好，開始佫咧搬的時，我choăⁿ 趕緊「精神」過來，假做「陷眠嘀嘟」的款，tìⁿ-chhiⁿ 講：「怎樣？是怎樣？啥物代誌？Beh換片是呣？我來我來……」阮尪soah佇hia咯咯笑，ná笑，頭ná hàiⁿ，講我是「大歹儂」。 隔幾落日後，我已經記得即層代誌啊。有一擺，片搬煞囉，我soah記得假睏，拄想beh叫阮尪起來換，無疑悟 伊soah「早早佇邊頭睏kah kô·-kô· 叫」，叫攏精神。我Kháu！這明顯著是咧「報鳥鼠仔冤」嘛！「有樣看樣」、「大做細學」，好的呣學，歹的全學了了，實在害我笑kah 強beh 無力去。
- 暗頓食了，輪著我洗碗箸。我想講hit叢（châng）不銹鋼的鼎仔，久無luh啊，鼎底烏趖趖，無..順手來kā摳摳luh-luh咧。佫想講既然有心luh啊，無..歸氣著luh一个互伊咔清氣的，choăⁿ做我 出力刮（koeh）、出力筅，筅kah金噹噹，雄雄看去，輸ná新買的。我家己真歡喜、真滿意，choăⁿ 攑鼎仔走去
（chhōe）阮尪，想beh佮伊展一下，互伊呵咾一句仔嘛好。阮尪 拄 佇 走馬樓 hia 咧 nî 衫，看我攑一叢鼎仔走出走入，choăⁿ 接過去，做伊kho̍k-kho̍k
，kho̍k-kho̍k相，著是呣出聲kā我呵咾。我拄想beh問伊niâ，伊soah咧講：「嗯，即个少年儂，佫是生做不止緣投……」哼，竟然kā我當做空氣儂，有影是「矮儂peh壁——欠梯（推）」！
(Beh聽聲，佇下底 ↓)
