鹭水芗南－闽南语部落

（看全文，線頂聽錄音~即篇文，用漳州話唸的。）

佇即个北京話占大位的時代，其它的漢系語言，kio̍k-put-kio̍k 攏噯「瘸跤破相」，互汝免得。

香港的廣州話，表面真chhio-thiô, 真chhiaⁿ-iāⁿ,其實坦白講啦，粵語早早to̍h小可「pai跤 pai跤」囉！雖然粵語白話文（像講「嘅、呢度、嚟架、唔該……」）有成功，不而過，佇咧正規場面出現的語文（也著是香港儂咧講的「中文」啦），永遠攏是「標準現代漢語書面語」。這是啥物碗糕咧？Beh 講破，he 著是「官話白話文」，著是北京語白話文。Nā 叫咱福建儂用咱福建話去唸即款「北京語白話文」，真正比叫伊去死咔艱苦！Ah 事實，這呣是講 ngāi-gio̍h niâ，是根本行通。唸，當然有法度唸，不而過，無儂聽有，嘛無儂愛kā汝聽，會kā汝當痟兮處理。Ah呣佫，香港儂/廣東儂，佮咱想的無共款，著是有法度接受。所以，佇香港有「三言兩語」的講法。著是因為安呢，香港的粵語會當照搬華語文法，只是讀音采用「粵音」。所以，有儂講，香港的粵語，是「怪胎」來出世。

佫來講社會地位無共款的語言，是安怎來處理外來詞佮社會新詞。粵語佇香港、澳門，算是官方語言，處理外來詞的時，呣免經過華語佫再中轉一下。這佮閩南語完全無共款。閩南語，無論佇福建，抑是坫臺灣，伊自來攏互儂看做是「下階層」的「方言」，講咔歹聽的，有也好，無也好啦，橫直 無要無緊to̍h tio̍h啦。現子時的閩南語，對著一寡外來詞、社會新詞，攏總先噯經過華語中轉一下，chiah佫按華語hia抾（khioh）來用。華語食chhun--ê，chiah 分互別儂去食。只要華語nā 直透咧坐大位，別種漢系語言，永遠to咧食二手的。佮大多數的漢系語言共款，閩南語會使講真正可憐，食儂的喙瀾，抾儂的尾仔（bóe-á），儂哺過了後，chiah thang 摕來哺一遍，不但氣口無對同（tùi-tâng），哺著嘛真無味。因為，華語的文法、組詞方式，佮閩南語差不止儕。定定去抾華語的語詞來食，不管時，攏嘛食消，年久月深，soah愈食愈大箍，食kah強beh變癩哥（thái-ko）。

閩南語，nā無法度成做官方語言，hoān-sè無久囉～～

(Beh聽聲，佇下底 ↓)