鹭水芗南－闽南语部落

今仔日上大啲收成,著是學會曉安怎來強迫BLOG網頁執行“Unicode”標準啲字型（字體）。
頂一暫仔，不管時，攏嘛為著網頁無法度認出“Unicode”標準啲字型辷個問題，踮遐家己咧鬱悴。本然，電腦技術著真害，啥物碗糕“html”，我透底呣捌，遘昑猶佫呣捌。

原底，我是踮咧中國大陸啲“博客中國”咧做網誌。做一暫仔，後來，發覺“博客中國”啲伺服器真害，網站不時著咧出狀況，有幾若擺，實在互我氣及攏無力。

後來，注死有一擺，我閑閑無代誌，又佫蹛咧線頂四界趖，探聽著辷間起佇臺灣啲“樂多”（網站）。Bē-bái,佫有提供BLOG啲服務，空問嘛是不止大（30MB），速度吤緊……總是，比晉前迄間“博客中國”（BLOG.CHINA）咔有出脫。“新屎礐好放屎”，經過短暫啲思考了後，我決定卟來搬厝（嚉“博客中國”搬來去“樂多”）——

……

若無辷擺啲搬徙(sóa),我猶原佫呣知影到底卟安怎來修改BLOG啲樣式（stylesheet）。辷個問題，對別儂來講，犯勢吤簡單，簡單及親像桌頂拈柑；不而過對我來講，實在真正費氣及複雜，這著若像俗語來咧講“攑筆比攑鋤頭咔重”（攑筆咔重過鋤頭）共款。

我決定卟來試看有法度修改網頁啲設計字型無？辷擺，猶原是Google鬥相共，chhiau-chhōe著啲資訊共我講，卟修改抑是佈置網頁啲字型，必須著去chhiâu“樣式（stylesheet）”啲設定。

我興刜刜(hèng-phut-phut)……

江湖一點決，講破呣值錢！

拍開“樣式（stylesheet）設定”了後，佇“編輯區” 語法迄欄(hit nôa)，將內底所有啲“Font-Family”語法攏總chhōe出來，紲落來，共咱想卟強迫網頁採用啲字型代號添落去，有偌儕“Font-Family”，咱著噯添偌儕擺。保存檔案、變更（重建）了後，一切著攏總OK也！！

因為白話字（Pe̍h-oē-jī）用會著啲符號（調符來講），儕儕攏屬於“特殊啲組合字型”，所以咱照講是著揀“國際音標2000”（Lucida San Unicode）、抑是“Doulos SIL”辷兩套字型來配合電腦（網頁）正確顯示POJ(犯勢犹佫有其它好用啲字型,這我着呣知影)。目前，有啲用POJ寫啲網頁（網站）著是採取“強迫網頁使用特選字型”啲做法來正常顯示白話字，比論講：暗光鳥ê厝、閩南語維琪百科全書（http:zh-min-nan.wikipedia.org/）。