漳泉俗语講，「七十三，八十四，阎羅免叫家己去」。這是咧共儂講，儂若食老著無路駛、無作用囉，講一句咔歹聽啲，叫做「蕩死啲」（tōng-sí--ê/等死好niā）。所以，佇咱啲印象内底，透底認為講，老大儂不但對社會無所貢獻，颠倒佫會增加社會啲負擔。不而过，即句话有時仔無一定 定定(tiāⁿ-tiāⁿ)正確。特别是現子時，社會加诚進步，生產力比往早時加誠發逹，各行各業拢需要有一定技能技巧啲人才。會使講，一个儂啲技能若愈突出，著愈受歡迎。儂講「老啲老步定，少年啲倒táng-hiáⁿ」，老大儂啲生活經驗往往比少年儂咔豊富；怹所掌握啲技能技巧嘛往往比少年儂加咔儕、加咔讚。「棺材贮(té)死無贮老」，老大儂，只卟若呣是老kah拢無法度振動(tín-tāng)，猶原嘛是會當對社會有所貢獻。
今仔日，咱卟來記录一个規世儂為閩南語咧走chông、咧拍拚啲老大儂——一个真正無簡單啲廈門儂，伊著是范壽春老先生。
講起范壽春老先生，誠儕廈門啲在儂犯勢to有瞭解，嘛知影伊是本地有名啲「講古仙」。老先生今年七十七，講古是伊即世儂上主要啲職業。老先生出世佇鼓浪嶼，自細漢，伊to̍h合意著「講古」即途，拄開始是踮「講古場」聽儂講，聽久ná興(hèng)、ná綿精(mî-chiⁿ)，有時lak袋若無錢，著走去覕蹛(bih-tòa)壁角仔偷聽（往早時，講古是一種行業，卟聽講古噯開小錢）。根據老先生伊家己咧介紹講，伊做囡仔啲時代（量其約佇頂世紀三、四十年代），全廈門拢總差不多有十外位專業啲講古場。往过啲講古，透底講一些「中國歴史故事」佮「民間傳奇」，比論：《水浒傳》、《羅通掃北》、《包公案》、《施公案》、《三國演義》、《封神演義》等等。儂講「一年新婦，两年師傅」，久，自然著會出師。尾仔，范先生家己oân仔行入「講古」即途，並且一下開喙著是一世儂。伊出世佇舊社會，自少年，伊著亲身佮下階層啲做工仔儂來做交陪。伊瞭解身軀邊hiah-ê勞動大眾啲心聲佮艱難，知影怹咧想啥，beh-ti̍h啥。當然，遮个經歴，拢成做當時范老講古啲能源佮動力。
「講古仙仔喙，胡镭镭(hô·-lùi-lùi」，即句話雖然有咔歹聽淡薄，不而过，颠倒會當看作是社會對講古仙「喙水一粒一」啲呵咾(o-ló)佮肯定。卟有「一粒一」啲喙水，呣是在來生成啲，嘛呣是三工五工有法度激出來啲，he定著噯經过久長啲煅練，佮不断啲總結。即款「一粒一」啲喙水，本身著是一款真正高明、真正了不起啲語言能力。有才調出來講古，絕對無簡單，定著噯瞭解儕儕过去所發生啲正史、野史；瞭解當今啲時政，大遘國家大條代誌，細遘水牛相挨相tak，會使講是「知天文，捌地理」，「天頂知一半，地骹下全知」。
1991年，范老先生退休。無偌久了後，伊接受邀請，行入廈門人民廣播電臺啲演播室，通过電波继續向在地啲鄉親序大、囡仔序細來奉獻伊啲講古藝術。「電臺放送」畢竟hām「現場講古」真無共款，影响力嘛加真大。一時陣仔，范老啲講古录音，捷捷(chia̍p-chia̍p)送去遘中央臺、國際臺、省台、海峽之聲廣播電臺等等儕儕啲電臺播出；省内省外各種媒體嘛常在(chhiâng-chāi)有咧報道即位廈門啲老講古仙，連對岸啲《金門日報》嘛有登出專欄來咧介紹。
自2000年年底開始，范老先生又佫重新倒轉去「現場」講古。即擺，范老選擇踮咧廈門市「金榜公園」，將公園内底啲「老儂之家」當做伊啲講古場。算算咧，范老佇hia講古，遘taⁿ已經tih-beh满五年，完全拢是做義務啲。在范老啲心中，講古已經呣kan-na是語言藝術，佫咔是hām在地閩南文化啲生存相牽連。范老講，「講古啲目啲，著是卟推捒(thui-sak)閩南文化」、「閩南文化啲根底是閩南語」。是啦，閩南語若直直無去，閩南文化敢有可能佫佇咧？范老認為講，講古oân仔會當挽救(bán-kiù)閩南語，是推捒閩南語佮閩南文化啲一步棋。伊佇咧講古啲時陣，常在濫摻(lām-chham)著儕儕閩南在地啲歌謡、俗語話、笑詼譀古（chhiò-khe hàm-kó·）等等。伊不但講古，又佫研究閩南語，將儕儕吤高深啲閩南語理論，通过講古啲形式，用輕鬆兼笑詼啲言語介紹互儂知。即款啲「講古」，事實已經呣是單純啲「練牙、hap仙」，正港會使看做是咧「傳授文化智識」佮「搶救母語運動」。
不而过，一个儂啲力草，實在真有限。雖然，咱相信一定猶有儂，佮范壽春老先生相siâng抱著共款啲意志，為著鄉土語言佮文化啲生存，直透咧貢獻怹啲能量，呣佫，即个「變相」(pìⁿ-siùⁿ)兼「致病」啲社會，並無因為安呢，來放慢伊本成to̍h直直咧「改變」啲骹步。
