Podcast ，伊的中文譯名猶未定型，目前，上儕儂 kā 翻譯做「播客」。伊算是一種「數字廣播」技術，初初出世的時陣，是倚靠（oá-khò ）一款號做「 iPodder 」的軟體（软件），結合 一寡 輕便型 的 播放器來咧操作。 Podcasting 所錄製的是一寡線頂廣播或者網路聲訊節目，網友會當將線頂的廣播節目掠落來，存滯家己的 iPod 、MP3播放器或者其它輕便型的數碼播放器裡中，隨時聽好（ thèng-hó ）欣賞。不而過，這算講 kài 普通，應該呣是 Podcast 上主要的特色。對 Podcast 來講，上 kài 有意義，或者講上 kài 有趣味的代誌是，網友（播客）會當將 in 家己的錄音檔案， hē 坫網頁頂面，分儂聽。安呢，每一「播客」攏會當將 in 的心聲， in 想 beh 講的話，或者 in 經過的代誌用錄音的形式，放送出來，佮眾儂做夥來分享。有儂講， Podcast 是一種有聲的 blog 。
Podcast 的定義：目前，對 Podcast 猶無一个統一的定義。 Podcast 的推動者 Doc Searls 伊是安呢解說（ kái-soeh ）的： PODcasting ， Personal Optional Digital casting 。可見， PODcasting 是一種自助廣播，一種新式的廣播形式， beh 聽呣聽，隨在儂；隨時會當收聽，攏免佫被動接受。 Doc Searls 認為講，真正的 Podcasting ，著噯 siâng 時具備三个條件：
1 ．必須是一个獨立、又佫會通（ ē-thang ）下載的媒體檔案；當然，對 Podcasting 的概念，業界猶佫有真儕無共款的解說佮定義。
2 ．媒體檔案的發布形式是 RSS2.0 enclosure feed ；
3 ．接收端（客戶/用戶）會自動接收、下載，而且有法度將檔案自由 sóa 動，比論講 sóa 去遘 用戶 家己的播放器裡中。
伊佫講，設使 kan-na 提供 MP3互儂掠（下載），猶無算是播客（ Podcast ）――這算是充分條件，但呣是必要條件。「有通掠（下載）檔案當然是真好，不而過， nā bōe 當自動播放，猶原無算真正的 Podcasting 。」
現子時，佇中國，播客 teh 時行是真緊。足儕網路媒體攏將焦點對准「播客」，各式各款的「播客服務」是一齣 sòa 一齣，排 kah 滿四界（ sì-kòe ）。親像講《播客天下》啦、《博客網—播客頻道》啦、《中國播客網::原創影音基地》啦、《播客寶典》啦 等等……
呣知朋友有注意著無？ iah 事實咱用 blog 嘛聽好（ thèng-hó ）來 kā Podcasting 一下，雖然無 hiah 正港。總是，趣味趣味，趁時行，罔變（ bóng-pìⁿ ）罔變。
我是安呢變弄（pìⁿ-lāng）的：
1 、頭一步，先家己錄音。做成wma的格式（或者別種音頻格式，比論 mp3 ……）。
2 、 第二步，Chhōe 一个所在， kā 咱 頭拄仔 錄的 音頻檔案 捒上網（ sak-chiūⁿ-bāng : 上傳）。上網了後，會生一个「網址」（ url ）出來。
3 、第三步，這是上關鍵的一步，好佳哉，完全攏bōe複雜。佇咧即步裡底，咱會用著一段html的語法，目的是beh來製造一个簡單的網頁「播放器」。將即段語法抄起來（copy），tah滯咱的網頁頂面。安呢，著ok啊。語法，佇下底：
<embed autostart="true" loop="true" src="即个所在囥音頻檔案網址（此處添入音頻檔案網址）" height="45" width="176">
4 、全部 khang-khòe 攏總完成，收工。
