鹭水芗南－闽南语部落

今仔日中晝，雄雄發現《六月無善北》peh會得去囉！敢講是中國解除對blogsome的封鎖啊呣？有即款代誌？佫試一遍看māi，精實有影neh！即擺，無信聖（sìn-siàⁿ）嘛著噯暫時bóng信。是講，ah這是tī 時的代誌咧？頂一暫仔，我 會記得 oân-á 捌 超工 佫 kā 試咧，ah hit 陣 明明 著 猶佫 teh 封鎖，想bōe遘 無偌久了後的今仔日，封鎖 soah 解除啊。

中國開始封鎖blogsome，是舊年（2005年）熱儂，遘taⁿ 算算咧，已經強卜9月日久啊。舊年blogsome拄拄hông封鎖hit陣，國裡外著有bōe少儂徛出來講話，通過各種方式對GFW即種違背基本人權的漚步，表示譴責佮不滿。當時，tòa佇國外的“马乐伯乐谷”有寫一篇報導——《Don’t stand between me and my Blog！》，對GFW的行為進行 摳削 佮 phì相。我感覺即篇報導寫了真讚，當時著有kāi翻譯做閩南文，題目無變，共款號做《Don’t stand between me and my Blog！》。

當時，GFW會想卜閘blogsome，嘛呣知是為著啥物原因，kiám-chhái是因為即間外國的blog網站傷過頭「自由」，有足儕中國儂佇hia拍拼佮行踏。儂講「儂儕，話著儕」，會 講東講西，該講的攏講啊，不該講的嘛攏講講出來，安呢一下來，儕少著會去礙著咱偉大祖國的政權，「破害」著安定團結的政治局勢。所以，當然是噯閘起來！Ah GFW拄仔好是in飼的一隻狗。儂講「恨攑刀兮，無恨刣儂兮」，無法度，GFW hoān-sè 也有伊家己的苦衷，不而過，為著飯碗，明 知影 顧儂怨，嘛只好歹儂做遘底。

時間過去卜9月日囉，blogsome總算洗清冤枉，無罪釋放。9月日，實在無算短，講咔歹聽的，he「連囝嘛生出來啊」，對一个網路傳媒來講，時間著是錢銀，儂客著是財路，損失，是起碼的代誌。對中國的blogger來講，減一个blogsome，hoān-sè bōe有啥物實質性的損失，顛倒會當透過即款的事件重新佫來看清楚即个社會，跋一倒，加得著一份智慧。

儂講「樹身徛得正，呣驚樹尾儂搖風」，烏雲，咔厚嘛bē久長；日頭 總是噯出來。今仔日blogsome放出來啊，咱teh歡喜，teh紀念，呣佫，逐个呣通bē記得，猶佫真儕真儕 佮 blogsome共款運命，甚至佫咔慘的，taⁿ 猶佫ut佇「籠仔裡」（lông-á-lāi）做著hit款佮in的身份無對同（tùi-tâng）的「監囚」（kaⁿ-siû）。到底 in 是 犯著 啥物 天條？敢攏無 天公地道 啊？咱祝願chiah-ê「監囚」會當早一日見著日頭光。