鹭水芗南－闽南语部落

白翎鷥（一）／ PE̍H-LĒNG-SI¹

Pe̍h-lēng-si, taⁿ pùn-ki, taⁿ kàu káng-piⁿ ke-á-kîⁿ.
白翎鷥，擔畚箕，擔遘 港邊 溪仔墘。

Poa̍h-chi̍t-tó, khioh chi̍t-chîⁿ.
跋一倒，抾一錢。

Bé tōa-piáⁿ, pun tōa-î.
買大餅，分大姨。

Tōa-î hiâm bô-lōa.
大姨 嫌 無偌²。

Kho·-ke kho·-káu lâi chiù-chōa.
呼雞呼狗來咒誓³。

Chiù-chōa ū, phah sin-pū; chiù-chōa bô, phah chím-pô.
咒誓有，拍新婦⁴；咒誓無，拍嬸婆。

Chím-pô háu, khì chhōe káu.
嬸婆吼⁵，去chhōe狗。

Káu leh pūi, chhōe bô ta̍h-tùi.
狗咧吠，chhōe無 踏碓⁶。

Ta̍h-tùi hó cheng-bí, chhōe bô í.
踏碓 好 舂米，chhōe無椅。

Í leh chē, chhōe bô phōe.
椅咧坐，chhōe無被。

Phōe leh kah, chhōe bô ah.
被咧蓋，chhōe無鴨。

Ah leh thâi, chhōe bô chek-tâi.
鴨咧刣，chhōe無燭臺。

Chek-tâi chò tùn-pâi, ji̍p-chhù chò lô·-châi.
燭臺做盾牌，入恁厝做奴才。

Pn̄g lí chia̍h, hiâm bô-gia̍h.
飯汝食，嫌無額⁷。

Tê lí lim, hiâm chhàu-phòa.
茶汝啉，嫌臭破⁸。

Í lí chē, poa̍h chi̍t-ē.
椅汝坐，跋⁹一下。

白翎鷥（二）



Pe̍h-lēng-si, taⁿ pùn-ki, taⁿ kàu ke-á-kîⁿ.
白翎鷥，擔畚箕，擔遘 溪仔墘。


Poa̍h-chi̍t-tó, kioh-tio̍h chi̍t-sián chîⁿ.
跋一倒，抾着一sián¹⁰錢。


Bé tōa-piáⁿ, sàng tōa-î.
買大餅，送大姨。


Tōa-î hiâm bô-lōa.
大姨 嫌 無偌。


Lia̍h niau lâi chiù-chōa.
掠貓來咒誓。


Chiù-chōa ū, phah sin-pū; chiù-chōa bô, gia̍h tek-ko, lāng lāi-hio̍h.
咒誓有，拍新婦；咒誓無，攑竹篙¹¹，弄鶆鶡¹²。


Lāi-hio̍h poe kòe hái, tiám-hóe sio ti-sái.
鶆鶡飛過海，點火燒豬屎。


Ti-sái chhàu-hiam-hiam, bô iû chú tāu-chhiam, gín-á chia̍h kah siang-thâu-chhiam.
豬屎 臭蘞蘞，無油煮豆籤，囡仔食kah雙頭尖¹³。



〖注解〗（普通話）

1、白翎鷥：白鷺、鷺鷥。廈門音pe̍h-lēng-si；漳州音pe̍h-liōng-si。
2、無偌：bô-lōa，不多，沒多少，不太多，份量少。
3、咒誓：chiù-chōa，詛咒。
4、新婦：sin-pū，前字"sin"受後字"pū"聲母"P"的影響，變讀為"sim"。兒媳婦。
5、吼：háu，哭。
6、踏碓：ta̍h-tùi，搗碓，舂米的工具。
7、無額：bô-gia̍h，份量很少，一丁點兒。
8、臭破：chhàu-phòa，味腥、味臭。
9、跋：poa̍h，摔。
10、sián：分，貨幣單位。一sián錢：一分錢。
11、攑：gia̍h，動詞，用手舉、持。
12、鶆鶡：lāi-hio̍h，老鷹，漳州話。泉州、廈門、同安，說為"bā-hio̍h"。弄：挑逗、挑釁。
13、雙頭尖：siang-thâu-chiam，身材瘦削，指營養不良。