鹭水芗南－闽南语部落

中國上好額的所在，“全國十強縣市”，江蘇省 上第一（siāng-tē-it） 排址（pâi-chí），佔6成咔加；chhun 的，照原互老牌的廣東省佮浙江省 hô·-hô· 去。外電報導：9月18號，佇荣成（地號）召开“2006中国发达县域经济论坛”，宣佈舊年（2005年）中國十强縣市評選的結果。因為出現並列情況，“十強”實際來講有11个縣（市、區）上榜(chiūⁿ-pńg)。其中，江蘇省上排址，攏總11席，in 佔去7席，算講連sòa兩三年攑頭旗。Ah nā 即擺照原搶無著頭香的老字號——廣東省，會使講是“輸儂呣輸陣”，好歹嘛猶佫tio̍h兩个名额。Hām 廣東省 sio-siâng 佔兩席的省份是浙江省，不而過 in 的排名略仔有咔輸面淡薄。

即11个縣市區，taⁿ 按排名前後的次序，數个（siàu-ê）唸互逐个知：江蘇省昆山市、廣東省順德區、江蘇省張家港市、江蘇省江陰市、廣東省南海區、江蘇省常熟市、浙江省蕭山區、江蘇省武進區、江蘇省太倉市（並列：江蘇省吳江市）、浙江省紹興縣。

聽咧講，2005年十強縣市區，人均GDP是6萬6千箍（人民幣）；人均地方財政收入卜倚（beh oá）4000箍（人民幣）。Nā照人均GDP來看，十强縣（市、區）的經濟發展水平即陣soah贏過京（北京）、津（天津）、沪（上海）chiah-ê直轄市城區的平均水平。十強縣（市、區）農民人均純收入是8663箍（人民幣），ah nā城鎮有頭路的職工，人均年薪收入達到2萬4千箍人民幣。In講，照比並（pí-phēng），即款的生活條件，比起中等發達國家是有咔贏，無咔輸。