April 24, 2005
《小王子》（闽南语版：第1~16部）
原作：[法]圣·德克旭贝里
譯文：[闽南]LimKianhui
献给列翁·维尔特
我卜(beh)天下间的囡仔兄(gín-á-hiaⁿ)原谅我共(kā)即本册献互一个大侬。我有一个(ê)诚重要的理由，這着是：即个大侬是我伫世间上好的朋友。我佫有另外一个理由：即个大侬，伊啥物拢會捌(bat)，连本成(pún-chiâⁿ)卜寫互囡仔兄看的册，伊嘛拢總看會捌。我第三个理由是：即个大侬taⁿ tòa 伫法国，伊伫hia咧受枵寒(iau-kôaⁿ)、咧艰苦。伊足需要别侬的安慰。假使chiah-ê理由猶佫无够，安呢我甘愿共即本册献互囡仔时代的伊。所有的大儂拢有囡仔时代，拢捌做过囡仔。（可惜，罕咧有大侬记tiâu即層代誌。）所以，我卜共献词改做：
献互囡仔時代的列翁·维尔特
第1部
我拄才(chiah)六岁大 迄當阵，有看过一本專門咧寫原始森林(大山内)的册，冊名号做《真实的故事》。佇册内底，有一幅(pak)精彩的插图，是画一尾錦蛇当咧孝孤(hàu-ko·/吞食)一隻大大箍的野兽。册皮oân仔是貼（tah）迄幅图。
册底有写讲：“錦蛇食物件的時，拢是用吞的，呣是用哺的。猎物若吞落腹了後，伊着無嗳佫振动啊，有噹時仔，上久有法度擋咧半年呣免佫再食物件。佇即段中間，錦蛇是ná睏ná咧消化腹肚內的食物”。
迄阵仔，我真憖(giàn)濫糝（lām-sám）去想一寡仔发生树林(chhiūⁿ-nâ)内底、真正神奇的代誌。就安呢，我嘛开始用彩墨佮铅笔，家己來咧画图。我画的第一幅图，也着是我的第一号作品，是安呢的（插圖一）：
画了，我摕互大侬看，问in 講，看了会驚bōe ？
大侬soah共我应(ìn)讲：“he一顶帽仔哪有啥通好驚的？”
事實我呣是画帽仔，我是画一尾大锦蛇当咧消化腹肚内的一隻象。我應信佫kā蛇是安怎咧消化腹肚chiah-ê食物的情形，攏總kā畫出來，想講安呢大侬稳看會捌。Chiah-ê大侬，定定嗳侬解釋互in 听。我第二号作品是安呢的（插圖二）：
大侬叫我呣通佫画hiah-ê「有的無的」（在in看來，呣管我是畫好頭好尾的蛇，抑是畫刣腸破肚的蛇，橫直攏是一寡「五四三的」），in 叫我噯注心去学地理、历史、算术、佮语法等等。因为安呢，我hit陣chiah 拄拄六岁大niā，着來放弃做画家即个好的理想。第一号、第二号作品画了無算成功，互我真tàm志。Hiah-ê大侬，in 家己逐项攏bōe曉，佫見擺用安呢來做藉口，不管時噯叫汝解说(kái-soeh)互in 聽。這實在互囡仔儂感覺足無奈的。
後来，我只好选择另外一个职业，我去学驶飞机，世界各所在透底(thàu-tóe)拢互我飞thàng-thàng。有影啦，地理学确實对我有真大的帮赠。我若看一目，着随會當分出叨位是中国、叨位是亚里桑那。设使飞機伫暝時失去航向，地理学着开始发挥作用。
我的人生當中，捌掺儕儕正經又佫严肃的侬接接(chih-chiap)过。我伫大侬的世界内底度过真长的一段时间。我常在(chhiâng-chāi)详细咧观察chiah-ê 大侬，呣佫罕咧看着in 的改變。
有噹時仔，拄着一半个仔头壳略仔咔清楚的大侬，我定定会共(kā)细汉时画的第一号作品捎(sa)出來互in 看，想卜试看in 有啥款的反应。我想卜知影in 是呣是真正有“理解能力”。不而过，我聽着的回答定定是：“这是一顶帽仔”。安呢，我着bōe 佫掺in 讲起“锦蛇啦、深山林内啦、抑是天顶的星啦、月啦……”即寡仔代誌。我看破嗳佫吞忍(thun-lún) in 的水平，姑不而将，我著嗳佫掺in 讲“桥牌啦、政治啦、高尔夫呀、皮鞋目镜啦”即款龟挪鱉趖(ku-lô-pih-sô)的代誌。着是安呢，大侬透底会呵咾(o-ló)我是一个知道理、捌代誌的侬。
第2部
我着是安呢，定定家己一个孤单过日子,無半个死忠的知己。即款的日子一直遘kah六年前，我的机器伫在撒哈拉沙漠发生故障。发动机(iân-jín) 内底有一个零件歹去。迄阵是空身一侬，机械师無伫咧，嘛無旅客，我想卜家己一个侬修理，虽莽(sui-bóng)工课(khang-khè)真正复雜！对我来講，這實在是关系生死的大條代誌，我扎的水，kan-taⁿ有法度挡(tòng)咧成(chiâⁿ)禮拜久。
我第一擺睏伫即款四界chhōe無虼蚤(ka-cháu)木虱、無看着半个侬的大沙漠顶。我感觉比侬落落(lak-lo̍h)水，mo·h竹排仔伫大海漂浪，咔佫凄凉。第二工,天拍殕光(phah-phú-kng)的時阵,我雄雄听着一个奇怪的声音，细细声咧共我叫精神。汝聽好(thèng-hó)想看我有偌呢仔興奋佮惊愕(kiaⁿ-ngia̍h)。有侬輕聲細説來咧講話：
“請汝画一只羊仔互我，好無？”
“啊！”
“共我画一只羊仔…”
我bōe 输去互电电着，雄雄chôaⁿ仔peh起來，赶緊目睭jôe-jôe咧，想卜斟酌(chim-chiok)看是啥侬咧講話。我看着一个生做诚怪巧 (kòai-khá)的囡仔兄，伊真正严肃徛(khiā)伫hia，共我金金相。這是路尾我画互伊的，嘛是我即世侬画了上讚的一幅图。不而过，我画的图定著佫比實际的差kài侪。這呣是我的过错。我才六岁，大人着逼kah我失志做画家的勇气，我kan-na捌画过破腹的蛇佮無破腹的蛇，此去着呣捌佫学过画图。
我用一种真正好玄(hó·ⁿ-hiân)眼神看着面头前即箍呣知tùi叨位暴(bok/pauh)出來的猴囡仔。逐家噯知影，迄当阵(hit-tong-chūn)我的位置是离居民區千外里远的 山頭 lo̍k-khok-bóe。不而过，我看迄箍猴囡仔真自在，完全無成 (sêng)迄款“呣知路通(thang)轉厝、pháng見的囡仔”。我真正是gông-ngia̍h kah 喙舌险险拍結，过卜規晡，我問伊第一問題：
“Hi，汝伫遮咧创啥？”
伊 soah 無插(chhap)我，佫kán-ná有真重要的代誌趕緊卜做的款，伊佫共我講一遍：
“请汝…共我画一羊仔…”
奇怪？敢 hiah 神秘？是講，即种“神秘”的感覺soah共我的思想佮行动控制去，叫我嗳乖乖仔服从差教。讲實的，伫即款無侬徛起的山頭领尾，随時拢会無命，不而过我soah無才调停止即种离經(lī-keng/荒诞)的行为——我真緊着按lap袋仔内iam出一支笔佮一张纸。雄雄又佫想着我kan-taⁿ学过“地理、历史、算术佮语法”，我小可呣情愿呣情愿，共迄个猴囡仔讲 其實我bōe 曉画图尪仔。伊soah共我应讲：
“無要紧啦，汝共我画一只羊仔啦！”
我苦！我咔實呣捌画过羊仔，kan-taⁿ会曉画破腹的、佮無破腹的蛇。我規氣chôaⁿ按照家己的想法，佫共迄幅無破腹的锦蛇画出來。
“無嗳，無嗳！我無嗳大蛇，汝看he大蛇腹肚内佫有一只象伫咧(tī--leh)。”
聽伊应即句话，我soah戇去(gāng--khì)！紲落來伊佫讲：“大蛇傷过頭狼毒(lông-to̍k)；象，傷镇位。阮兜，所在真e̍h (oe̍h)、真细，我kan-taⁿ卜嗳一只羊仔，汝画一只羊仔互我啦”。
我chôaⁿ仔画羊。
伊先注心看我咧画，尾仔佫讲：
“即只羊仔破病kah遮thiám！我无爱。汝嗳佫共我画一只。”
我chôaⁿ仔佫画。
即擺，我即个拄拄熟似(se̍k-sāi)的朋友，伊笑kah真正古锥，煞客气客气共我拒绝：“汝看，你画即只呣是羊仔囝 ，是羊公，佫有發角。”
我chôaⁿ仔佫画一张。
即幅，伊共款佫呣挃(ti̍h)。
“即隻伤老。我卜挃(ti̍h)一只会当活足久足久的羊仔。”
我真正無伊法。我无hiah侪美国时间，我紧狂卜修理发动机，chôaⁿ 做我乌白chu̍t，凊采佫画一张出来 凖拄煞。我确实真不耐烦，小可歹歹，共伊應讲：
“我画一奇(kha)箱仔啦，汝卜挃的羊仔伫内底。”
想bōe 遘即擺...即个小评判员soah畅(thiòng) kah 喙笑目笑。伊讲：
“我着是卜挃這，…汝讲即隻羊敢嗳食足儕草仔？”
“乜代(mih-tāi)？汝問這卜创啥？”
“因为阮tòa 的所在真细…”
“我共汝画的迄只羊仔真细隻，若的確卜飼，所在呣免偌大片啦…”。
伊chôaⁿ仔àⁿ落去，對著迄幅图金金相。
“嘛無像汝讲的hiah细啦...汝看！伊咧睏也…”
我着是安呢佮小王子相捌的。
第3部
我问真久才了解小王子是按叨位仔來的。伊问我真儕问题，颠倒是我问伊的，伊soah定定當作若無听着共款。我按伊讲的话语当中，慢慢仔了解着伊的來歴 。比论讲，伊拄现看着飞机的時阵（飞机我着無想卜画出來也，he實在傷复雜），共我问讲：
“这是啥物碗糕？”
“这呣是普通的 chhit-thô 物仔。伊會飞。这號做飞机(飞凌機)啦。我的飞机。”
我有淡薄仔風龜風龜，共伊讲我會飞。伊听了後chhoah一下，问讲：
“甚物？敢讲汝是按天頂落落來(lak--lo̍h-lâi)的？”
“喺啊”(hēⁿ--a)，即擺我小可有咔谦虚淡薄。
“Hâⁿ 啊？！有影笑诙着着(to̍h-tio̍h)！”。
看小王子笑kah gî-sai-sai，我實在诚bōe 爽。我感覺别侬该當噯严肃來看待我的不幸。尾仔，伊佫讲：
“若安呢，汝oân仔是天顶落來的ho·ⁿ！汝是叨一粒星球的？”
伊安呢讲，我著小可ioh著伊是ùi叨位來的...我赶紧问伊讲：
“汝是tùi叨一粒星球来的呣？”
呣佫，伊并無回答我的问题。他目睭看飞机，略仔有咧tìm头，又佫开喙來讲话：
“着是讲呣，驶即號傢俬頭仔，汝是無可能按真远的所在來的…”
话讲煞，伊soah静静…家己一个呣知咧想啥货，想kài久。尾仔，看伊按裤袋内iam出迄张拄才央(iang)我画的羊仔图，戆戆(gāng-gāng)無做聲，呣知佫咧考虑啥货。
雄雄讲起“别的星球”，佫讲一个有頭無尾，互我对面頭前即个小王子愈來愈好玄，愈來愈想卜知影佮in 有關係的儕儕秘密。
“汝是tùi叨位来的？你兜伫啥物所在？汝按算卜共迄只羊仔chhōa去叨？”
伊考慮liam-mi仔，尾仔应我讲：
“佳哉，佳哉汝互我迄奇(kha)箱仔，暗時仔聽好(thèng-hó)互羊仔囝tòa 。”
“He当然的loh！汝若听话，我佫送汝一條索仔，日时仔聽好共伊缚起來，小等咧，我著卜顺紲佫送汝一叢柴柱(thiāu)。”
我安呢建议，無疑悟(bô-gî-gō·)小王子聽了若像呣是真歡喜。
“缚起來？有够奇怪的想法。”
“汝若呣共伊缚起來，伊会四界(sì-kòe)走，走無去。”
我這个朋友又佫咧笑也：
“汝想讲伊会走去叨位？”
“呣管啥物所在。横直伊会一直走、一直走……”
即个时阵，小王子雄雄soah转(tńg)正經起來，共我应讲：
“這汝呣免驚，阮迄搭，所在真细真细。”
绁落去，伊soah略仔郁悴郁悴，家己咧唸講：
“直透走，嘛是走bōe 偌远…”
第4部
过無偌久，我佫了解着另外一層重要的代誌，小王子讲in tòa 的迄粒星球,kan-taⁿ比咱地球顶的一間厝仔咔大无偌儕。
若這我颠倒bōe 感覺驚惶(kiaⁿ-hiâⁿ)。我知影地球、木星、火星、金星即寡仔有名號的大行星lia̍h外，猶佫有成百粒無名的星球存在，不而过chiah-ê無名星透底kài细，凖講千里鏡嘛而不然(jî-put-jiân)看會着。天文学者見若(kiàn-nā)新发现着一粒星，着共伊编一个号，比论讲號做“325小行星”。
我有重要的证据会当说明小王子是按“小行星b612”來的。即粒小行星遘taⁿ kan-taⁿ捌互人类觀测过一擺，he是1909年一个土耳其的天文学家用千里镜看着的。
当时，即个土耳其的天文学家捌伫一擺国际天文学家代表大会顶，对伊的发现作过重要的论证。不而过，迄阵仔因为伊個人穿插(chhēng-chhah)的关系，無侬卜相信伊。hiah-ê 大侬見擺着是安呢。
好佳哉，土耳其有出一个独裁者，为着“小行星b612”的名望，强迫伊的国民拢嗳改穿欧式的服装，若無着卜判死刑。1920年，即位天文学家穿kah水噹噹，佫一擺为伊的發現作论证。即擺所有的侬拢chiâu同意伊的看法。
我讲chiah-ê掺“小行星b612”有tī-tāi的故事互恁听，佫讲伊的编号互恁知，这完全是因为大侬的缘故。chiah-ê大侬透底合意讲一寡仔数字。有時仔汝对大侬讲起一个拄拄相捌朋友，大侬往往bōe 共汝问一寡仔咔有实际意义的问题。可比讲，大侬从來(chêng-lâi) bōe 去问：“新交的朋友讲话声音啥款啊？嗳sńg啥款的游戏啊？有咧收集蝴蝶标本抑無啦？”……in 透底會汝：“朋友幾岁也？兄弟姊妹幾个啦？肥抑 sán？家境好抑是歹？”……in lia̍h-chòe安呢才有算了解朋友。假使汝共in 讲：“我看着一thōng起kah水噹噹佫新点点的楼仔厝，碰窗金 sihⁿ-sihⁿ，外墙又佫白晳皙(pe̍h-siak-siak)……”安呢，in 稳当想無即款厝仔到底有偌好。汝一定嗳共in 讲：“我看着一thōng 价值成百萬人民币的番仔楼。”安呢，in 一定会哀kah真大聲：“哇！有够súi的厝！”
汝若是共大侬讲：“小王子存在的证据是伊生做真súi，真好鬥阵，伊想卜挃一只羊仔囝。卜挃一只羊仔囝，這证明伊的存在。”听汝安呢讲,in 一定会hàiⁿ 頭，讲“汝即个三岁囡仔”！呣佫，汝若是共in 讲：“小王子是tùi小行星b612來的”，安呢in 一定听kah信信，嘛bōe 佫共汝問kah有一支柄通攑。in 一贯着是安呢。咱囡仔侬腹肠一定嗳放咔阔的，呣好佮in hiah-ê大侬咧计较。
話講倒转來，若会曉过日子的侬，是無咧管汰伊啥物编号呣编号！我實在足ǹg-bāng会当亲像咧“讲神古”安呢來开始即个故事。我真想卜安呢讲：
“古早古早，有一个小王子，伊tòa 伫一个佮伊的身軀平大仔平大的星球顶面，伊真ǹg-bāng有一个朋友……”对会曉过日子的侬來講，安呢讲会咔真。
我是無嗳侬凊凊采采讀我的册，卜讀汝着注心讀。我咧讲过去的時，心肝頭總是艰苦艰苦。我的朋友chhōa著伊的羊仔囝离开我已经六年也。我会坫遮骨力寫，是因为我驚我会共伊放bōe 记。共朋友放bōe 记，這實在是一層悲哀的代誌。呣是所有的侬拢有朋友。Ah我嘛無可能佮hiah-ê大侬共款，kan-taⁿ对数字感兴趣。着是安呢，我才会去買彩墨佮铅笔。我食遘即款岁頭，一世侬，kan-taⁿ六岁迄年捌画过破腹佮無破腹的锦蛇，此去着呣捌佫试过，即阵，食老才佫來學pûn鼓吹，硬liau哦！呣佫，我定着嗳尽量画互会成 (sêng)，虽然無啥把握。一幅画了hàm-hàm，另外一幅着真正害。上害的是伊（小王子）的体格寸尺hâ 拢bōe 准，有寡仔所在画了伤奒(hai)，有寡仔所在画了伤细；衫裤的色緻oân仔lia̍h bōe 啥会凖。姑不将，噯即爿改改咧、迄爿 chhiâu-chhiâu 咧，画出一个大概。hoān-sè有寡仔重要的部分画了走精(cháu- cheng/cháu-cho̍ah)去，请恁逐个嗳体諒，因为我即个朋友，伊家己着拢罕咧共我讲kah真明。伊认为我oân仔佮伊共款。呣佫，實在诚遗憾，我无法度看着kheh仔内迄只羊仔囝。我kán-ná 那來那亲像hiah-ê大侬，我看我是老也。
第5部
我差不多逐工拢会当了解着一寡仔佮小王子有tī-tāi的信息,可比讲in 迄粒星球啦，伊是安怎卜出外啦，伊的行程啦……chiah-ê信息拢是伫無意中ta̍uh-ta̍uh仔了解着的。第三工，我着了解着一層互侬伤心代誌，he是一齣掺一种號做“猴面包树”有牽连的悲剧。
即擺共款佮羊仔有tī-tāi。
迄阵，小王子呣知咧操烦啥物代誌，雄雄问我讲：
“羊仔敢正實会食细欉树仔？有影無影？”
“有影啦，正實的。”
“啊，我足歡喜的。”
我想無“羊食树仔栽”即款代誌有啥通歡喜的。小王子佫讲：
“着是讲，羊仔共款会去食猴面包树呣？”
我共伊讲，猴面包树呣是细欉树仔，是一款大kah若像天柱(thiⁿ-thiāu)的树仔；凖讲有一群象做伙來跋(pe̍h/pu̍ih)一欉猴面包树，嘛無法度共伊跋振动。
小王子伊soah起嗳笑：
“呵呵~~若安呢，chiah-ê象，呣着嗳一隻一隻叠叠(thia̍p)起來？！”
看起來伊佫是不止仔内行，伊共我讲：
“猴面包树oân仔有暴芛(puh-íⁿ)的时阵...”
“嗯。是讲，汝乜代(mih-tāi)卜放羊仔去食猴面包树栽咧？”
伊应我讲：“唉！這也(ā)使讲！”聽伊的意思是讲即个道理通侬知，无需要佫解说(kái-soeh)。不而过我是真正無瞭解，我定定嗳了真儕工、了真儕心神才有法度瞭解伊講的代誌。
我尾仔才瞭解小王子in 迄粒星球oân仔佮别个星球共款，涂骹兜的草仔嘛是有好bái草的差别。好草会结好籽，当然歹草伊着会结歹草籽；呣佫草仔籽無 tè看，透底互汝分bōe 清是好抑是歹。草仔籽tâi伫涂骹底，时阵若遘，伊自然会生根暴芛(puh-íⁿ)。设使暴出來的新芛是菜頭、玫瑰，若安呢咱着由在伊生湠、由在伊大欉。设使是暴出來的是一欉歹草種，咱著嗳冗早(liōng-chá)共伊抠献捒(khau hìⁿ-sak)，咔bōe日後起敗害。聽讲伫小王子in 星球hia，有一种kài恐怖的种籽仔——着是猴面包树的种籽仔啦。伫in 迄搭，即种呣成(m̄- chiâⁿ)种籽仔湠(thòaⁿ) kah規四界(sì-kè)，并且成做一种災難。這猴面包树的树仔栽，原在真奇怪，细欉的時若無赶紧共伊抠捒，聽候(thèng-hāu)互伊略仔咔大欉的，有時连神仙也抠伊bōe 振动。時间一下久，伊会愈湠愈厉害，树仔根会钻按地心去，那钻那深，遘尾規粒星球著拢總互伊钻thàng-thàng。若是星球本身着有够细粒，ah猴面包树又佫真儕，安呢遘尾仔規粒星球着會必了了、崩了了、散了了。
“这算纪律问题。”尾仔，小王子有解说(kái-soeh)互我听。“透早睏精神，頭面洗洗咧，嗳赶紧去门去拔(pu̍ih/pe̍h)猴面包树栽。即种树仔栽细欉的時陣掺玫瑰相亲像，看清楚了後，嗳赶紧來共拔献捒(pu̍ih hìⁿ-sak)。做即项工课(khang-khòe)實在诚無義量(bô-gī-niū)，呣佫诚简單。”
有一工，伊共我苦劝，叫我着嗳注心画一幅真súi真súi的图，伊讲安呢阮厝迄搭的囡仔着永远会记咧即層代誌。伊讲：“假使有一工，囡仔兄出外去旅行，这对in 來讲原在真有路用。有时，咱会chhōe借口，超工無嗳做工课(khang-khòe)，若像嘛無啥物败害；不而过，猴面包树栽若一工無抠，尾仔一定会造成大灾难！我捌去过一粒星球，一个贫憚(pîn-tōaⁿ)侬tòa 伫hia，有三欉树仔栽伊抠無离，结果……”
自安呢，小王子伫邊頭那介绍，我那画，尾仔規粒星球拢画起來。我从来(chêng-lâi)呣爱學大人物的口氣讲话，實在是因為猴面包树伤过危险，逐个佫拢無啥了解，对hiah-ê 來小行星的侬來讲，佫咔是危險，所以即擺，我卜用一款佮以早拢無共款的聲嗽(siaⁿ-sàu)來共逐个儂
交代。我讲：“囡仔兄啊，嗳致意(tì-ì) hiah-ê猴面包树哦！”我卜叫我chiah-ê朋友做伙來张弛(tiuⁿ-tî)即个危险——in 掺我共款，长期以來危险着存在伫咱的身軀邊，呣佫逐个soah拢激放放、若像無要無紧。我诚認真咧画，画诚久才共即幅图画出來。我共逐个讲的即个教训真正重要，所以我家己加做一寡仔，我感覺有價值。hoān-sè 恁會僥疑僥疑，是安怎册底其它的图拢無像即幅hiah-ni̍h lè斗？真简單：我嘛真想卜画咔súi的，呣佫soah画拢bōe 出來。颠倒是即幅猴面包树，我咧画即幅的時，kán-ná有一种意志一直咧共我鼓励。
第6部
啊！小王子……佮汝斗阵，我才通ta̍uh-ta̍uh仔了解着汝的生活、汝的苦衷。汝總是恬恬仔(tiām-tiām)坐坫hia，看日頭咧落山，這是汝唯一興做的代誌，我遘第四工才发现。迄阵仔，汝安呢共我講：
“我爱看日頭落山，行，咱斗阵來去看！”
“是讲，這嗳聽候(thèng-hāu)……”
“聽候啥？”
“聽候日頭落山啊。”
代先，我看汝gông-ngia̍h一下。尾仔，連汝家己嘛爱笑......汝讲：
“我雄雄 bōe 記咧，想讲(siūⁿ-kóng / lia̍h-chún)是伫阮hia！”
有影啦，逐个拢嘛知，美国若中昼(tiong-tàu)，法国拄好日頭卜落山，tòa 伫美国的侬若有法度随赶去法国，安呢拄好会当看着黄昏的日頭！是讲，法国是hiah-ni̍h仔远。不而过，伫恁迄粒小行星，骹步小可仔徙动(sóa-tāng)一下，汝随时著会得看着想卜看的夕阳佮红霞……
“我一日，上儕捌看过四十三擺日頭落山。”
佫过有liâm-mi-á，汝又佫讲：
“汝敢知影，有時仔汝若感覺bōe 快活，汝着想卜去看日頭落山。”
“一工看四十三擺，汝哪會chiah-ni̍h鬰悴？”
小王子伊無应(ìn)。
第7部
第五工，猶原是羊仔的代誌，互我通全部了解着小王子的秘密。佮前幾工相亲像，我無閒我的工课(khang-khòe)，伊想伊的代誌。伊恬恬(tiām-tiām)思考真久，若像是想着啥物道理，雄雄無頭無尾着共我問：
“羊仔若卜食树仔栽，安呢伊敢呣是共款会食花？”
“伊看着啥食啥。”
“连有刺的花嘛食落去呣？”
“有刺的嘛食去！”
“安呢刺有啥路用？”
我呣知卜安怎应伊。迄時我拄好咧扒一粒撰(sōan) kah 真ân 的螺丝。機器的故障kán-ná真严重，水嘛啉卜了也，我真烦恼遘尾無法度行出即片沙漠，心肝頭真正食急。
“若安呢刺有啥路用咧？”
小王子若有问题，無問kah清楚透白，伊是bōe 准煞(bōe-chún-soah)。Hit粒夭寿螺丝害我氣kah phut-phut-tiô，我凊采共伊应一句：
“刺哦，無路用啦，he根本着是伊的出頭。”
“噢！”
伊考虑tak久仔，我感觉伊即擺共我应话略仔歹歹：
“我呣信！花hiah-ni̍h 软chiàⁿ，hiah-ni̍h 温纯，in 千方百计保护家己，in lia̍h准講有刺伫咧，侬才会当感覺着in 的súi…”
我恬恬無做聲。我迄阵kan-taⁿ想讲卜赶紧共迄粒螺丝搤(iah)起來，若無着卜攑铁锤共(kā)啄献捒(tok hìⁿ-sak)。無疑悟，小王子又佫来共我tâⁿ：
“你soah讲是花咧…”
“好也，好也！我啥物拢無讲！我是凊采共汝应应的niā。拜托的，我有正经的工课(khang-khòe)卜做。”
伊感覺真驚惶(kiaⁿ-hiâⁿ)，伊想bōe遘我會安呢共伊喝。
“正经工课？”
他看我雙手ba̍k油ba̍k kah烏臭臭，一手攑鐵锤仔，一手hōaⁿ tòa 一个生做三角六耳的機件顶頭。
“汝讲话佮hiah-ê大侬共款！”
伊讲安呢，我soah感覺真狼狈(liông-pōe)。了後，伊變kah愈野赤:
“汝是非無分…逐项滥滥做一下！”
伊氣kah phi̍h-phi̍h-chhoah，頭壳hàiⁿ來hàiⁿ去、红頭毛弄起弄落。
“我捌去过一个星球，hiatòa 一个红面仙。伊根本呣捌闻过花的芳味；嘛呣捌看过天顶的星生做圓抑扁。伊無交半个朋友，伊kan-taⁿ知影算数(sǹg-siàu)，偆的逐项呣捌做过。伊規工拢佮汝共款，定定讲有正经代誌卜做。即款侬實在真假仙，伊根本着呣是侬，伊是蘑菇。”
“是啥货？”
“是蘑菇！”
小王子正實氣kah一支面白苍苍。
“千百年來，花生成着是会發刺，羊仔生成着是会食花。汝噯知影花是安怎直透咧制造hiah-ê無路用的刺仔，这敢讲着呣是正经代誌？敢讲羊仔佮花的矛盾着無重要呣？这敢無比迄箍阿肥仔红面仙的数目(siàu-ba̍k)咔要紧？假使即个世间kan-taⁿ偆一蕊花，即蕊花kan-taⁿ開伫阮迄粒星球，不而过soah去互一只羊仔無講無呾(tàⁿ)共拆食落腹，安呢敢讲無重要？”
伊那讲那受氣：
“假使規个宇宙kan-taⁿ偆一支花，假使有侬真合意即支花，安呢，即个侬逐擺眈(taⁿ)頭看天星的時，伊一定会定定感覺真福氣。他聽好(thèng- hó)大聲共侬讲：‘我迄蕊花伫叨一粒星球顶面…’，呣佫，若是不幸花去互羊仔食去，安呢对伊來讲，着若像天顶所有的星一目匿(chi̍t-ba̍k- nih)拢總變暗淡去！敢讲這oân仔無重要呣？！”
他已经讲bōe 落去也，坫hia咧目屎四湳涶，哭kah呣知今仔日拜幾。
天卜暗也，我手头的工课做bōe完，只好佫放咧。啥物"锤子、螺钉、枵寒(iau-kôaⁿ)、死亡…"，我已经拢總bōe 記去也。伫即个宇宙内底，伫一粒星球顶，伫一粒行星顶，伫我tòa 的行星顶，伫咱的地球顶，有一个小王子真需要我的安慰！我共伊揽伫身軀邊，揽稠稠(tiâu -tiâu)。我摇伊的身軀，共伊讲：“汝合意的迄蕊花無危险啦…我画一間 羊 tiâu 共迄只羊仔關起來…我画一领戰甲共汝的花幔(moa) 起來…我…”我實在呣知影嗳佮伊讲啥。我感觉得家己變kah真頇颟(han-bān)。我呣知卜安怎去共伊安搭…唉，目屎，目屎永远是赫呢仔奇妙啊！
第8部
真紧，我对迄蕊花有进一步的了解。往过，伫小王子in hia，花开的時，花瓣透底kan-taⁿ结一重(têng) niā。花拢诚细蕊，bōe 镇位，嘛bōe 互侬感覺cha̍k-chô，往往是透早开，暗時随敛去(lian--khì)。一时阵仔，嘛呣知tùi叨位吹來一粒草仔籽，尾仔即粒草仔籽又佫暴芛(puh -íⁿ)。迄阵，小王子特别注意即欉新芛，代先伊oân仔咧僥疑(giâu-gî)，想講敢會是别种猴面包树。呣佫，过無偌久，即欉新芛着無佫直直大欉起來，并且开始有咧结苞，看勢是卜开花也。不而过，尽管小王子逐工守伫伊的边頭，伊偏偏着是呣开花。小王子咧想：即蕊花稳当是覕(bih)伫花苞内底直透咧梳妆打扮，伊一定足爱súi的，若無装kahsúi噹噹、抹kah芳貢贡，伊是bōe hia紧出來的。对对(tùi-tùi/果然)是安呢，遘kah有一工透早，日出的時，花嘛开也。
花卜出世進前，虽然注心准备kài久，呣佫现出來，伊着假空咧哈耳(hah-hī)：
“失禮啦，我拄睏精神niā，汝看我的頭毛佫sàm-sàm…”
迄時小王子已经激动kah无法度控制：
“哇！súi súi súi！實在有够súi……”
花蕊宽宽仔(khoaⁿ-khoaⁿ-á)共伊应讲：
“喺啊(hēⁿ--a)，我是hām日頭同齊出世的咯(koh)…”
小王子感覺花蕊有淡薄仔咧展風龟，不而过，论真讲，伊确實是súi kah會驚死侬。
伊对小王子讲：“即mái应该是食早頓的时阵ho·ⁿ，请汝顺紲共我攢(chhôan)一份來…”
小王子soah歹勢歹勢，赶紧去攑喷桶(phùn-thàng)喷槍，舀水來沃花。
即蕊略仔爱風龟、又佫厚疑心的花，自安呢逐工咧拖磨、咧差教小王子。可比讲，有一工，伊对小王子讲起伊身軀顶迄四支刺：
“虎豹仔hiō·，汝共in 讲，叫in 做汝來！我無咧驚in ！”
小王子共应讲：“阮遮無虎豹仔，虎豹仔嘛無咧食草仔”。
花蕊细聲应讲：“我呣是草仔。”
“失禮啦。”
“我是無咧驚虎豹仔啦，不而过我讨厌即港(káng)生凊风(chhiⁿ-chhìn-hong)。汝有風堵(hong-tó·)通閘風(cha̍h hong)無？”
小王子咧想：“讨ià生凊風…這对植物來讲，运氣實在有咔害淡薄...即蕊花佫是诚歹伺候哩…”
“我看暗時汝嗳共我顧互好。恁即个所在有够寒、有够gàn (gân)。我坫恁遮tòa bōe 惯勢，侬我往过tòa 伫…”
伊讲遘遮，家己soah恬去(tiām--khì)。伊拄來的时阵不过是一粒草籽仔。伊根本無捌見过外口的世界。伊知影家己讲白贼讲kah煏空 (piak-khang)去，soah見笑转受氣，超工khām嗽两三声。伊使(sái)即招，其實是咧提醒小王子，頭先吩咐的代誌猶未做，伊催小王子：
“風堵咧？”
“我随來去攑(giâ)。是讲，汝頭拄仔講he…”
花蕊赶紧佫再大聲假khām嗽，意思bōe 输是咧讲：好也啦，汝佫呣紧去攢！
虽然讲，小王子本然是真心咧佮意即蕊花，呣佫，鬥阵一暂了後，伊soah开始对即蕊花产生僥疑。小王子着是安呢，侬讲一寡仔無要無紧的话，伊soah看真重，结果是害家己咧加烦恼。
有一工，小王子共我讲：“我無应该相信伊的话，無应该相信hit蕊花讲过的话……憖看to̍h看、憖鼻to̍h鼻，安呢着好也咯！我迄蕊花虽然是芳嗆嗆(phang-chhèng-chhèng)，呣佫我是bōe 曉通享受。迄擺，伊讲着虎豹，本然我是应该嗳同情伊，呣佫颠倒soah互我感覺诚怨嘆…”
不而过，真紧小王子又佫讲：
“迄阵仔我逐项呣捌！我實在無应该kan-taⁿ凭伊讲的话着來咧判断伊的好歹，照道理，我是嗳佫看伊作为才着。是伊丰富着我的生活，我實在無應該放捒伊做我一个侬走出來。我kan-taⁿ看着伊的虚華，soah bōe 曉去感受囥伫虚華后壁的温情。花的内心其實是hiah-ni̍h 仔矛盾！怪我当時伤chhóng-pōng，伤过呣捌代誌，bōe 曉通疼惜伊。”
第9部
我约(ioh/猜)小王子大概是趁一群候鸟搬岫的時，顺紲走出来的。卜出來的迄日透早，伊共星球顶的大细项的物件拢款kah诚齊整(chôe- cháⁿ)、诚四序(sù-sī)，连活火山嘛拢拼扫kah清氣tak-tak。—— in hia有两座活火山，早起时燃(hiâⁿ)寡仔饮糜(ám-bê)原在真利便。這以外，猶有一座死火山，卜出來進前，伊嘛顺紲去共(kā)清清拼拼咧。伊咧想，無定著死火山日後會佫變活起來嘛無一定！共拼拼扫扫咧，伊自然着会匀匀仔滚绞(kún-ká)，咔bōe 雄雄爆发起來。火山爆发，着若像迄号烟筒(ian-tâng)咧喷火煙共款。是讲，咱地球的人口實在猶無够儕，無法度去拼扫火山，所以咱遮的火山才会hiah-ni̍h 仔"费氣"。
小王子共偆的幾欉"猴面包仔树栽"全部拢抠抠起來。伊感覺心肝芛仔(sim-koaⁿ-íⁿ-á)略仔酸酸。伊想講hoān-sè bōe 佫倒轉來也。迄工，伊感覺hiah-ê普通時逐工咧做的工课，taⁿ做著加真親切。小王子最后一擺去沃花，有按算卜共伊藏(chhàng)起來。伊感覺鼻頭酸酸，目屎险险辗(lìn)落來。
“Bye...”小王子准备卜佮花蕊讲再會。
呣佫花kán-ná無共伊应。
“Bye-bye......”小王子又佫讲一遍。
"khe̍h...khe̍h...khe̍h..."花蕊ka嗽一辄(tiap)久仔，不而过無成(sêng)染風寒的款。
尾仔，花蕊總算开喙讲话：“我頭拄仔實在有够天tho̍h。请汝原谅我。我希望汝会幸福。”
花蕊無怨叹，小王子昂愕(gông-ngia̍h)一下，手摕花罩(hoe-tà)，柴柴(chhâ-chhâ)在(chhāi)伫hia，soah呣知卜安怎。伊想無花蕊哪會雄雄變kah chiah-ni̍h tiām、chiah-ni̍h温纯。
“無呣着，我爱汝。”花蕊共小王子讲：“Ah呣佫，因为我的懵懂(bóng-tóng)，互汝烦恼，ah汝拢吞忍(thun-lún)落去。這拢無重要啦。不而过，汝soah佮我平(pêⁿ)愚tû(gû-tû/愚蠢)……祝汝幸福。花罩仔汝收起來，我应该呣免佫用着這。”
“若起风落雨卜安怎？”
“我感冒無kài严重…暗仔時的臭凊風(chhàu-chhìn-hong)颠倒对我有好無bái……我是一蕊花。”
“若有蛇抑是蜈蚣趖过來咧?若是野兽咧？…”
“這汝放心，我若决心卜佮美蝶仔(bé-ia̍h-á)交陪，我是無可能會驚迄啰(hit-lō)跷痀仔虫(kiau-ku-á-thâng)來车盘。我相信這应该是一段传奇的故事才着(tio̍h)。若無，是啥侬卜來看我？Ah汝嘛卜去真远真远的所在也。汝呣免驚大mau的野兽，我有爪仔 (jiáu-á)，呣免驚。”
讲煞，伊佫攑(gia̍h)起迄四欉刺起來展……
“Mài 佫拖soa ah啦…哦！汝有够cha̍k--ê neh！汝既然卜走，嗳趁早，紧去啦！”
伊是驚小王子看着伊咧哭。伊是一蕊个性儼硬(giám-ngē)的花…
第10部
伫附近的宇宙空间内底，猶佫有325、326、327、328、329、330等等的小行星。小王子开始去访问即寡仔星球，伊想卜伫hiah chhōe寡仔工课來做，顺绁学寡仔智識kah经验。
第一粒星球顶面tòa 著一个国王。国王穿一领茄花色（紫色）透滥白底烏花毛皮做的大礼服，坐tòa 一隻体形简单呣佫真正英威的宝座顶頭。
国王看着小王子的時，喝一声：
“哦，来一个臣民。”
小王子家己咧想：“伊也呣捌看过我，哪会捌我？”
小王子哪知影，伫迄个国王的心目中，世界其實真简单：所有的侬拢是伊的臣民。
国王诚氣頭(khùi-thâu)，因为伊總算成做某一个侬的国王。伊对小王子讲：“徛咔过來的，互我斟酌bāi一下。”
小王子四界嘪嘪咧，想卜chhōe一个仔所在坐落來，不而过，規粒星球差不多去互国王迄领水噹噹的大禮服勘勘去(khàm-khàm--khì)也。 chhōe無所在通坐，小王子只好徛咧。呣知是呣是徛了伤久伤僐，抑是本成(pún-chiâⁿ)着诚thiám，小王子soah伫hia咧哈耳(hah- hī)。
国王对伊讲：“伫一个国王的面頭前哈耳，是無禮體、呣捌禮数。我禁止汝拍哈耳。”
小王子感覺诚見笑：“歹勢啦，我實在控制bōe tiâu 才会安呢，我是按真远真远的所在，一路踅(se̍h)來遘恁遮，遘taⁿ 拢猶未睏的neh。”
国王应讲：“安呢哦...好啦，我命令汝开始哈耳。我已经幾若年呣捌看儂咧哈耳也。对我来講，拍哈耳，hoān-sè 是一層趣味的代誌。来，汝佫哈耳一下！这是命令。”
“安呢哦，這...我soah略仔紧张紧张…我雄雄soah哈耳bōe 出來…”小王子感覺真歹勢。
“嗯…嗯…”国王共伊应講：“若安呢，我…命令汝liâm-mi哈耳，liâm-mi…”
国王家己咧嘀嘀嘟嘟、踅踅念(se̍h-se̍h-liām)，好親像略仔有咧受氣的款。
国王一心想卜展伊的英威，噯儂尊敬伊。伊無法度吞忍臣民呣聽伊的命令。伊是一个正港的君王。不而过，他嘛真善良，伊的命令透底有一定的道理。
伊定定安呢讲：“假使我命令一位将军变做一只海鸟，呣佫将军無服从我的命令，安呢，這bōe 當算是将军的过错，有过错的侬是我。”
小王子诚细腻(sòe-jī)來咧問伊：“我敢会使坐落來 ？”
“我命令汝坐落來。”国王那(ná)吩咐(hoan-hù)，那(ná)徙动伊迄领大禮服。
是讲，小王子實在感覺诚奇怪，行星chiah-ni̍h仔细，国王是咧统治啥货？
伊对国王讲：“万岁爷…请汝原谅，我想卜请教汝…”
国王赶紧抢伊的话尾讲遘：“我命令汝问我。”
“万岁爷…汝拢咧统治啥？”
国王简單共伊应讲：“我统治一切。”
“一切？”
国王轻轻仔用指頭仔(chéng-thâu-á)指著——伊tòa 的行星、别粒行星、佮所有的星。
小王子讲：“统治这一切？”
“统治这一切。”
路尾，小王子才知影，伊不但是一个真真正正的君王，而且佫是整個(chéng-kô)宇宙的君王。
“若安呢，chiah-ê星，敢拢服從汝？”
“He定著的！”国王共伊讲，“in 随時拢嗳服从。我是呣允凖無纪律的。”
即款的權力,實在互小王子感覺真驚惶(kiaⁿ-hiâⁿ)。设使真正掌握着即款的權力，安呢，国王一工着呣若(m̄-nā)看会著四十三擺日落山niā，伊聽好看七十二擺，一百擺，二百擺，横直爱幾擺着有法度看幾擺！嘛呣免捷捷(chia̍p-chia̍p)來咧chhiâu椅頭仔！想着安呢，小王子又佫想起互伊
放捒的小星球，雄雄心肝頭感覺真艰苦。伊大胆对国王提出一个请求：
“萬嵗爺，我想卜看日落山，拜托汝…命令日頭落山好無…”
国王共伊应讲：“汝想看māi，假使我命令一位将军，叫伊嗳親像一隻美蝶仔(bóe-ia̍h-á)安呢飞來飞去，抑是讲命令伊写一出悲情的剧本，抑是讲叫伊着嗳变做一只海鸟，呣佫即个将军伊無爱执行，安呢，汝讲是伊呣着(m̄-to̍h)，抑是我呣着？”
“安呢当然是汝呣着。”小王子真肯定來回答伊。
“無呣着，”国王讲，“共别侬提出要求，着嗳看侬做会遘抑是做bōe 遘。若讲權威，代先应该是建立伫咧理性的基础上。假使咱若命令百姓去跳海，in 一定会攑刀攑枪(gia̍h-chhiuⁿ)來佮汝車拚。我的命令是合理的，所以我有权要求别儂服从。”
“若安呢，我头拄仔讲的日落山，這...”小王子見若(kiàn-nā)提出问题，無问透機是bōe 凖煞。
“‘日落山’呣，汝看会着啦。我定著嗳吩咐(hoan-hù)日頭落山，不而过按照我的科学统治，這一定嗳等候条件成熟。”
小王子问讲：“若安呢，嗳等遘底噹時(tī-tang-sî)咧？”
国王未应進前，先hiau出一本厚phiang-phiang的暦日佇咧反(péng)，那掀(hian)那咧唸：“嗯…嗯…這日落山，量其约伫咧…伫咧...下暗(e-àm)七點八字的檻站！迄陣，汝着会当看着日頭落山，遘kah迄阵，伊自然會执行我的命令。”
小王子又佫开始哈耳。Bōe 當看着日落山，他感覺诚遗憾。伊感覺诚無議量(bô-gī-niū)，chôan对国王讲：“我無必要佫留坫遮。我卜來走也。”
因为拄拄chiah有一个臣民，国王加真氣頭(khùi-thâu)，伊用命令的口氣对小王子讲：
“呣好(m̄-hó·ⁿ)走，呣好走。我任命汝做大臣。”
“啥物大臣？”
“嗯…司法大臣！”
“不而过，汝遮kán-ná也無啥物仔儂通审判断咯。”
“He無的确啦”，国王讲，“我老也，我即个所在又佫细，拢無位通排我的銮驾。我若行路，着诚thiám，遘taⁿ 我猶呣别巡視过我的王国lio·h！”
“噢！hia我拢去看过也。”小王子那讲，那越頭去看星球的另外一角勢，"是讲，hia嘛共款無半个儂哩..."
“若安呢，汝着审判汝家己咯！”国王应讲，“这有影咔oh啦，审家己定著嗳比审别侬咔oh！汝若有法度好好仔审判汝家己，汝着是一个真正有才情佫有智慧的儂。”
“我喺(hehⁿ)，凊采啥物時陣拢有法度审判家己，無一定嗳坫遮审。”
国王佫讲：“嗯…嗯…我本然是想讲...我遮有一隻老鳥鼠，下昏時定定安呢喌喌叫(chiu̍h-chiu̍h-kiò)，吵kah我拢bōe睏咧。汝会当來审判伊，会当捷捷(chia̍p-chia̍p)判伊死刑。所以，伊的生死完全teⁿ伫汝的手頭。呣佫，汝嗳撙節用汝的權力，汝逐擺判伊死刑了後，著嗳随赦免伊，因为即搭kan-taⁿ一隻鳥鼠niā。”
“呣佫，我呣爱判儂死刑，我看我猶是來走咔好。”小王子讲安呢。
“Bōe-ēng--ê。”国王小可咧起狂。
不而过，小王子已经款好勢也。为着無卜互老君王感覺伤过悲伤，小王子共伊讲：
“假使万岁爷只是想卜得着一个實實在在的服从，汝会當互我一个合理的命令啊。比論講，汝會當命令我，伫一分钟内离開。我认为即个条件已经成熟也…”
国王啥物拢無应。頭起先，小王子佫頓蹬頓蹬(tùn-tiⁿ)，尾仔，伊咽一口氣，着做伊行囉…
“我派汝做我的大使(tāi-sài)。”国王赶紧佫喝(hoah)一聲。
小王子越頭，看著hit-ê国王又佫激一个真英威的甫士……
小王子伫旅途当中，家己咧想：chiah-ê大儂實在有够奇怪。
第11部
第二粒行星顶面tòa 一个爱風龟的儂，咱暂時著叫伊"風龟神兮"、抑是"謗風水鷄"着好也。
“哎哟！汝共(kā)看！一个欣慕我的儂來也！”即个爱虚華的儂远远仔看着小王子行过來，着 thiòng kah 、哀kah大聲细聲。
对hiah-ê爱風龟的儂來講，其他儂拢是伊的崇拜者。
“汝好！”小王子对伊讲，“汝的帽仔足奇怪的。”
“哦，这是共(kâng)接禮的時卜用的。”風龟神兮应讲，“若有儂对我表示歡迎佮尊敬的時，我着噯褪帽仔共in 接禮。不而过，遘taⁿ 拢無儂來行踏(kiâⁿ-ta̍h)。”
小王子無理解，chôaⁿ問伊講：“hâⁿ？敢有影？”
風龟神兮chôaⁿ共小王子提一个建议：“汝用倒手拍正手看māi 咧。”
小王子chôaⁿ聽伊的話，伫hia咧拍撲仔(phah-pho̍K-á)。Ah迄个風龟神兮，嘛随褪帽來答禮，看伊是假kah 赫呢仔谦卑，又佫有風度。
小王子心肝内咧想：“这比访问迄个国王咔趣味。”伊感覺诚好sńg，chôaⁿ直透咧拍撲仔。風龟神兮看伊佫咧拍撲仔，赶紧佫溜(liù)帽仔來答禮。
小王子chhit-thô差不多成字久(chiâⁿ-jī-kú)了後，soah感覺親像诚無義量、诚無趣味。伊对風龟神兮讲：
“有啥物好步数，会当互汝的帽仔落落來(lak--lo̍h-lâi)？”
風龟神兮假意無聽見，凡若(hōan-nā)爱展風神的儂，透底憖(giàn)儂呵咾，無噯儂嫌。
伊问小王子：“汝敢正實有钦佩我？”
“钦佩是啥物意思？”
“钦佩哦，著是講，承認我是即粒星顶...上巧的、上缘投的、上好額的、穿插上排祉(pâi-chí)的儂。”
“呣佫，即粒星顶頭嘛才kan-taⁿ汝一个儂niā！”
“為着我會當快活(khòaⁿ-oa̍h)，费神汝紧來钦佩我啦！”
小王子聽了後，肩胛頭giauh咧giauh咧，共伊应講：“好，我钦佩汝，是講，安呢汝是咧歡喜安怎？”
實在诚無議量，小王子看破做伊离开。
小王子一路行，一路咧想：“chiah-ê大儂，實在有奇怪。”
第12部
小王子紲落來访问的迄个星球，顶頭tòa 一个酒鬼仔。访问时间虽然真短，呣佫soah互小王子感觉加真伤悲。
“喂，汝咧創啥？”小王子问迄个(hit-ê)酒鬼仔。酒鬼恬恬(tiām-tiām)坐伫hia，面頭前一堆酒矸，空的、無開封的，满四界(sì-kòe)、茹苍苍(jû-chhiáng-chhiáng)。
“我咧食酒。”酒鬼仔看勢真鬰悴的款。
“你乜代(mih-tāi)卜食酒？”小王子佫问伊。
“为卜...放互bōe 记。”酒鬼回答。
小王子感覺伊诚可憐：“卜共啥代誌放互bōe 記？”
酒鬼仔頭壳勾勾，坦白共小王子講：“為了卜共我的見笑代放bōe 記。”
“汝有啥物見笑代？”小王子有心想卜共伊鬥相共。
“我興食酒，這着是我的見笑代。”酒鬼仔講煞，做伊激恬恬，無佫講话。
小王子感覺無法度理解。看破佫行。
一路行，一路那咧想：chiah-ê大儂确确實實是诚奇怪。
第13部
第四粒行星是一个實业家(大生理侬)的地盤。即个大生理侬規工無閒chhih-chhih，小王子來遘了後，對方拢無眈(taⁿ)頭看伊。
小王子先佮伊相借問：“汝好。汝的薰支(hun-ki)熄去也。”
“三加两等于五。五加七等于十二。十二加三等于十五...汝好。十五加七，二十二。二十二加六，二十八...無閒工通点啦。咔停才來点。二
十六加五，三十一。哎哟！拢總五亿一百六十二万二千七百三十一。”
“五亿啥？”
“嗯？汝佫伫咧哦？五亿一百万…我嘛记bōe 清是啥货。我的工课(khang-khòe)诚儕…我做代誌一贯拢诚點陳，無迄个閒工佮汝練仙！二加五得着七…”
“五亿一百万啥貨啦？”小王子佫再問一擺。一旦有疑问，無問kah有一支柄通攑(gia̍h)，伊是bōe 煞尾。
大生理侬眈頭看著小王子，应讲：
“我tòa 伫即个星球顶五十四年也，kan-taⁿ捌互侬扰吵过三擺。第一擺是二十二年前，呣知按叨位仔趖來一隻金龟，共(kā)我扰吵着。金龟仔的叫声“啁啁叫”，實在歹聽kah會驚死侬，害我一條数目(siàu-ba̍k)算kah重tâⁿ三四擺。第二擺，是十一年前，迄陣拄好風濕病夯(giâ)起來疼， he是我普通時欠锻炼引起的。我實在無hia儕美國時间佮汝咧喝仙(hoah-sian)。我是个诚正經、诚严gâi的侬。即擺…這是第三擺！我计算的结果是五亿一百万…”
“幾百万啥？”
Taⁿ即位大生理侬知影講即擺稳当無法度静心囉，伊看破佫共(kā)小王子应講：
“幾百萬个kài细kài细的物件，chiah-ê物仔有時会出現伫汝的頭壳顶。”
“是胡蝇呣？”
“無nò·，是一寡會艶艶爍(iām-iām-sihⁿ)的物件。”
“是蜜蜂仔呣？”
“呣是啦，是迄款黄黄、又佫金金的物件仔，即款物件仔不時引起一寡仔贫憚侬(pîn-tōaⁿ-lâng)伫hia咧烏白想。我是一个真严肃的侬。我無迄个閒工想東想西。”
“啊，敢講是天顶的星？”
“着啦，to̍h是天顶星啦。”
“汝卜用即五亿粒星创啥？”
“是五亿一百六十二万七百三十一粒。我是一个严肃的侬，我做代誌一贯拢真點陳。”
“你按算卜用chiah-ê星创啥？”
“啥创？”
“是啦，卜啥创？”
“無卜创啥。遮拢我的。”
“星拢汝的？”
“拢我的。”
“呣佫我捌拄着一个國王，伊…”
“国王無占有權，in 只不过是咧‘统治’niā。這是两回事。”
“你beh 挃(ti̍h) hiah儕星有啥路用？”
“咱若好額起來，咱着会當去買别位的星，假使有侬chhōe著新的星。”
小王子心内咧想：“即个侬考慮问题若像有淡薄仔siâng進前迄个酒鬼仔。”
不而过，小王子真緊又佫问伊一寡仔问题：
“汝敢有才调共(kā) hiah-ê星拢占tiâu-tiâu？”
“Ah無....汝講hiah-ê星是啥儂的？”大生理儂真bōe 爽，共小王子拄一句。
“我呣知，不而过，應该是無儂的。”
“若安呢，hia拢嘛算我的，因为我是頭一个考慮即層代誌的儂。”
“kan-taⁿ凭安呢呣？”
“He當然的。假使汝抾(khioh)着一粒無主侬的钻石，若安呢即粒钻仔着是汝的；凖講汝发現一座無侬知影的岛屿，安呢即座岛屿着是汝的；佫比論讲，汝若比儂咔代先想著一个好步数，安呢汝着会當去申请一个专利，即个专利著是汝的。既然進前拢無侬想卜去占hiah-ê星，安呢hiah-ê星着是我的。”
“安呢講嘛有理啦。是講，汝挃(ti̍h) he卜创啥？”小王子佫問伊。
“我咧经营佮管理chiah-ê星咯。我一遍佫一遍來咧计算in 的数量。這是一项無简单的代誌。不而过，我是一个严肃佫骨力(kut-la̍t)的儂！”
小王子原在猶未满足，伊佫講：
“对我来講，我若有一條颔巾(ām-kin )，我着会当共(kā)摕起來围，嗳卜扎去叨，着扎去叨；我若有一蕊花來讲，准讲想卜挽(bán)，我着共伊挽落來。Ah汝咧，汝敢有法度将星挽落來？！”
“我無法度，呣佫我会当共(kā)寄伫银行。”
“汝是咧讲？？....”
“我意思是講，我會使将星的数量寫伫一张纸條仔顶，了後才佫摕去锁伫桌屉(toh-thòa)内。”
“安呢着好勢呣？”
“安呢着会使得。”
小王子心肝内咧想：诚好sńg。看起來佫不止仔趣味，是讲，這敢有算真了不起的正經代誌？”
若講起啥物號做“正經代誌”，小王子的看法佮hiah-ê大儂真無共款。紲落來，小王子佫讲：
“我有一蕊花，我逐工共(kāi)沃水。我佫有三座火山，我逐禮拜去共拼扫一擺。连死火山嘛做一下拼，無儂知影伊啥物時陣会佫复活(ho̍k- oa̍h)起來。我有火山、有花，因为有我，对我的火山佮我的花來讲，绝对有好無bái。不而过，汝本身，对著hiah-ê天星，soah無啥作用…”
大生理儂聽kah戇戇(gāng-gāng)，应bōe 出來。小王子只好佫行。
小王子一路行，一路那咧想：hiah-ê大儂實在足奇怪、足奇怪的。”
第14部
第五颗行星上kài奇怪，嘛上kài细粒。细kah kan-taⁿ会當khè一葩路灯、tòa 一个顾灯的侬。小王子實在想無：chiah-ni̍h细的星，又佫chiah-ni̍h仔偏挹(phian-iap)，顶頭也無厝仔也無tòa (tòa )其他侬，呣知点迄葩燈有啥路用？Ah迄个侬是安怎卜伫hia顾燈？
小王子家己咧臭giâu疑：“kiám-chhái即个儂有淡薄仔無正常，呣佫伊稳当(ún-tàng)会比国王、風龟神兮、生理侬佮酒鬼仔咔好一寡仔，上無，伊的工课(khang-khòe)嘛咔有意義。伊若点燈，着若像是加添一粒星，抑是一蕊花；燈若禁熄，就代表星抑是花卜來歇睏囉。即项工课有影值得呵咾(o-ló)，嘛不止仔有出脱。”
小王子來遘，見面着诚有禮貌來佮点路灯的侬相借問：
“Gâu早。——汝頭拄仔是安怎卜共(kā)路燈禁熄咧？”
“Gâu早。——这是命令。”顾燈兮应话。
“命令啥？”
“命令我嗳熄灯。——哦...暗安。”
一目匿(nih)，伊又佫點着(to̍h)迄葩路燈。
“若安呢，是安怎汝又佫卜共伊點着(to̍h)？”
“这是命令。”顾燈兮照原安呢讲。
“我聽無。”小王子讲遘。
“無啥通好解説的。命令着是命令。”顾燈兮ná講ná咧做伊的工课，“敖早。”
话講拄煞niā ，燈佫再禁熄去。
小王子看伊按lak袋内iam出一條手巾來咧拭頭额(thâu-hia̍h)。
“我做即款頭路(thâu-lō·)，實在真thiám頭。往过(éng-kòe)猶佫泛泛代(hàm-hàm-tāi)，透早熄灯，下昏(e-hng)点灯，偆的時间，日時仔歇工，暝時仔睏ka睡(khùn-ka-chōe)…”
“照安呢讲，是路尾有儂改變命令呣？”
顾燈的应讲：“命令是無改啦，呣佫，會害嘛是為著這！即粒星咧踅(se̍k)，一年比一年咔緊，呣佫命令soah拢無改。”
“路尾咧？”小王子问伊。
“路尾着是像即陣安呢，一分钟伊着踅一環，我连一秒钟着無通歇。見若(kiàn-nā)过一分钟我着嗳点一擺，佫禁一擺！”
“诚趣味，敢講汝即个所在，一日kan-taⁿ 一分钟久niā？”
“實在有够無聊，”顾燈的讲，“從(chêng)頭拄仔咱开講遘taⁿ ，已經过去個外月也。”
“個外月？”
“無呣着，拢總半点钟久。三十工！——哦...暗安。”
话讲拄煞，燈火佫着(to̍h)起來也。
小王子金金共伊相，讲實的，伊诚钦佩顾燈侬chiah-ni̍h仔死忠(sí-tiong)來咧遵守命令。伊想起咔早家己嘛定定chhiâu椅頭仔來咧看日頭落山。伊真想卜帮助即个朋友。
“我共汝讲一个撇步，会当互汝偸歇睏一下，汝憖(giàn)卜啥物时陣歇睏拢会使得"。
“我定定嘛咧想卜歇睏。”顾燈兮应话。
有的侬虽然一贯真踏實(ta̍h-si̍t)、真照起工，呣佫有時oân仔會想卜小可踉港(làng-káng)一下。
小王子佫讲紲落去：“即粒星遮细，汝行三伐(ho̍ah)着聽好(thèng-hó)踅一辗(se̍h-chi̍t-lìn)。汝只卜匀匀仔行，不管时拢嘛会当看着日頭光，凖讲汝想卜歇工，汝着会使照安呢去做...汝卜嗳日偌(lōa)长，伊着有偌长。”
“汝即个撇步，对我來講应该無咔cho̍ah，其實我上希望的，是會當倒落去眠床顶的睏ka睡。”顾燈兮應伊。
“噢，安呢呣soah诚無拄好。”小王子咧咽氣。
“诚無拄好。”顾燈兮绁一句，“哦，gâu早。”
就安呢，路燈佫再禁熄......
小王子佫再继续伊的旅行，即擺，伊心肝内咧想：
“即个顾燈兮，定著会互hiah-ê 国王啦、風龟神兮啦、酒鬼猶佫大生理侬看無目地。呣佫，kan-taⁿ伊bōe 互我感覺可笑。這hoān-sè 是因为伊所关心的呣是伊家己。
小王子又佫嚥一口氣，伊对家己讲：
“本然，伊应該是我唯一会当做伙交陪的朋友。可惜，伊迄粒星球實在伤过细，两个儂根本tòa bōe 落…”
實际小王子是無勇气來承认：伊是咧留恋迄粒"儕侬呵咾(o-ló)少儂嫌"的星，特别是伫hia，二十四点钟著有法度看着一千四百四十擺日落山!
第15部
第六粒行星，看勢嗳比第五粒咔大成十倍。顶面tòa 一个老先生，他綿精(mî-chiⁿ)咧寫一抱(chi̍t-phō)册，一抱大部頭的册。
“喲(iŏh)！一個探险家來也(a)。”老先生看著小王子來遘，見面(kìⁿ-bīn/即時)着來咧相借问。
小王子揀一垛(tè)椅頭仔，坐tòa 桌仔邊，那咧喘大氣。伊已經行真久真久也！
“汝tùi叨位來的？”老先生问小王子。
“即本册hia大本，是啥货？汝咧創啥？”小王子倒問伊。
“我是地理学家。”老先生先應(ìn)伊。
“啥物號做地理学家？”
“地理学家，着是一种学者，伊瞭解叨位仔有海，叨位仔有溪、有城市、大山，抑是講沙漠。”
“這佫是不止仔趣味neh！”小王子講，“像這呣才有算正經頭路！”伊那講那越頭(oa̍t-thâu)四界bāi、四界看。伊從來呣捌看过chiah-ni̍h仔大的行星。
“汝即个所在诚súi neh！遮有海無？”
“这我無了解。”地理学家讲遘。
“喲！”小王子诚失望。“Ah無...有大山無？”
“这，我無了解。”
“若安呢，遮有城市、溪仔、抑是沙漠無？”
“这，我照原無了解。”
“無..汝佫講汝是地理學家？！”
“規欉好好——無错(剉)，”地理学家应讲，“不而过我呣是探察家，ah我暫時嘛無即款骹数(kha-siàu)。地理学家是無咧计算hit- lō城市、江河、大山、海洋抑是沙漠。地理学家诚重要，呣好四界抛抛走。伊bōe 使(bōe-sái)离开伊的办公室。不而过伊聽好(thèng-hó)伫办公室接見探察家。伊聽好斟酌询问hiah-ê探察家，共in 的回憶记载落下。假使伊認為某物侬的回忆有价值，安呢伊着會想卜调查对方的德行(tek-hēng)。”
“这是為啥物？”
“设使探察家若講白贼，寫出來的地理册定着会造成严重的後果，有可能是災难！佫有，爱食酒的探察家嘛共款嗳共(kā)調查。”
“这是為啥物？”
“酒醉误大事啊，本然是一个儂，互伊看做两个儂。遘尾仔，明明kan-taⁿ是一座山，soah變記做两座山。”
“我有熟似(se̍k-sāi)一个侬，若是叫伊做探察，伊稳当無够格。”小王子讲。
“有可能。所以讲，假使汝感覺一个探察家德行bōe 歹，安呢汝着会使去调查伊发現着的物件。”
“汝是讲，叫伊chhōa汝去看呣？”
“無no·h，安呢伤费氣。不而过汝会使叫探察家提供证据。比論講，设使伊发现一座大山，汝着嗳交代伊扎(chah)一寡仔石頭轉來。”……
……地理学家雄雄soah伫hia咧車東車西，呣知咧無閒啥。
“拄仔好，汝敢呣是拄拄按真遠真遠的所在來的！你着是探察家！來，汝紧共(kā)恁星球的情形介紹互我聽！”地理學家卜请小王子鬥相共(tàu-saⁿ-kāng)。
就安呢，地理学家chhiau出伊的笔记簿，又佫來咧削铅笔。伊定定先用铅笔记录一个初胚(chho·-phoe)，等待探察家提供证据了後，才佫用烏墨水正式共记录起來。
“啥物情形？”地理学家开始來咧问。
“Hăⁿ！阮hia噢...”小王子讲遘，“嘛無算啥啦，阮hia，所在诚细。我有三座火山，两座活的，一座死的。不而过，喙講‘死的’，其實嘛無一定啦。”
“無呣著。”地理学家oân仔同意小王子的看法。
“我佫有一蕊花。”
“噢，阮是無咧记录花草的。”地理学家共伊讲。
“這是為啥物？敢讲汝呣知影花是hiah-ni̍h 仔súi。”
“因为花真紧着會lian去，花的生命真短暂。”
“啥物號做短暂？”
“地理册是通世间所有的册本当中，上kài严肃的一种。”地理学家讲，“这款册是永遠bōe 过时的。真少有山咧徙位(sóa-ūi)，嘛真少有海水會凋(ta)去。阮咧寫的是一款永遠的物件。”
“是讲，死火山嘛有可能佫再复活。”小王子抵(tú)伊一句，又佫继續咧問：“啥物是‘短暂’？”
“火山有咧振動、無咧振動，对阮來讲拢共款。”地理学家讲，“阮关心的是有山無山。山的位置bōe 变。”
“呣佫...‘短暂’是啥物意思咧？”小王子问第三擺，伊若提出一个問題，着硬卜問kah清楚。
“意思是講：有可能真紧着會消失去。”
“汝是講我的花真紧着會lian去呣？”
“当然的。”
小王子自言自语來咧念讲：“我的花是短暂的，并且伊kan-taⁿ靠四欉刺咧防身！Ah我佫共(kā)伊孤一个hìⁿ tòa hia！”
这是小王子頭一擺感覺後悔，呣佫伊真紧又佫振作起来：
“汝敢是卜建议我四界去探察？”小王子問伊。
“無呣著，有一个所在，叫做地球，伊是一粒行星，”地理学家应讲，“伊真有名声…”
就安呢，小王子离开地理学家，一路行一路那咧数念(siàu-liām)伊的花。
第16部
第七粒行星，着是地球。
地球實在呣是一粒普通的行星！即搭有一百一十一个国王（烏侬国王定著嗳算在内），七千个地理学家，九十万个实业家，七百五十万个酒鬼仔，三亿一千一百万个"謗風水鷄"……安呢加加算算咧，地球顶上起碼有二十亿个大侬。
為卜互恁逐个对地球的大細有一个基本的概念，我想卜先安呢來共(kā)恁报告一下：人類猶未發明电以前，伫咧地球的六大洲，世间儂為卜点路灯，拢總需要一陣由四十六万二千五百一十一侬组成的队伍。
遠遠仔看去，實在不止仔壯觀。即支隊伍若咧行动，是可比歌剧園咧演芭蕾，是舞kah诚四序。上代先出现的是紐西蘭(新西兰)佮澳大利亚迄搭(hit- tah)的点燈侬。燈若点着(to̍h)了後，in 着随去睏。绁落來，輪着(lîn-kàu)中国佮西伯利亚的点燈侬peh上舞台。了後，in 嘛随覕 (bih)入去幕後。佫來，着輪遘(lîn-kàu)盧西亚(俄罗斯)掺印度国的点燈侬。了後，輪着非洲、欧洲迄角勢的侬。佫紲落去是南美洲，了後輪着北美洲。橫直，逐个拢照顺序來，骹步手路，實在真了不起。
北极hia kan-taⁿ一葩燈niā，南极迄爿嘛是共款；呣过，只有即两个所在的点灯侬，生活上kài轻松、快活：in 一年kan-taⁿ工作两擺。
《小王子》第１７部～第２７部（結尾）
譯文：[闽南]LimKianhui
献给列翁·维尔特
我卜(beh)天下间的囡仔兄(gín-á-hiaⁿ)原谅我共(kā)即本册献互一个大侬。我有一个(ê)诚重要的理由，這着是：即个大侬是我伫世间上好的朋友。我佫有另外一个理由：即个大侬，伊啥物拢會捌(bat)，连本成(pún-chiâⁿ)卜寫互囡仔兄看的册，伊嘛拢總看會捌。我第三个理由是：即个大侬taⁿ tòa 伫法国，伊伫hia咧受枵寒(iau-kôaⁿ)、咧艰苦。伊足需要别侬的安慰。假使chiah-ê理由猶佫无够，安呢我甘愿共即本册献互囡仔时代的伊。所有的大儂拢有囡仔时代，拢捌做过囡仔。（可惜，罕咧有大侬记tiâu即層代誌。）所以，我卜共献词改做：
献互囡仔時代的列翁·维尔特
第1部
我拄才(chiah)六岁大 迄當阵，有看过一本專門咧寫原始森林(大山内)的册，冊名号做《真实的故事》。佇册内底，有一幅(pak)精彩的插图，是画一尾錦蛇当咧孝孤(hàu-ko·/吞食)一隻大大箍的野兽。册皮oân仔是貼（tah）迄幅图。
册底有写讲：“錦蛇食物件的時，拢是用吞的，呣是用哺的。猎物若吞落腹了後，伊着無嗳佫振动啊，有噹時仔，上久有法度擋咧半年呣免佫再食物件。佇即段中間，錦蛇是ná睏ná咧消化腹肚內的食物”。
迄阵仔，我真憖(giàn)濫糝（lām-sám）去想一寡仔发生树林(chhiūⁿ-nâ)内底、真正神奇的代誌。就安呢，我嘛开始用彩墨佮铅笔，家己來咧画图。我画的第一幅图，也着是我的第一号作品，是安呢的（插圖一）：
画了，我摕互大侬看，问in 講，看了会驚bōe ？
大侬soah共我应(ìn)讲：“he一顶帽仔哪有啥通好驚的？”
事實我呣是画帽仔，我是画一尾大锦蛇当咧消化腹肚内的一隻象。我應信佫kā蛇是安怎咧消化腹肚chiah-ê食物的情形，攏總kā畫出來，想講安呢大侬稳看會捌。Chiah-ê大侬，定定嗳侬解釋互in 听。我第二号作品是安呢的（插圖二）：
大侬叫我呣通佫画hiah-ê「有的無的」（在in看來，呣管我是畫好頭好尾的蛇，抑是畫刣腸破肚的蛇，橫直攏是一寡「五四三的」），in 叫我噯注心去学地理、历史、算术、佮语法等等。因为安呢，我hit陣chiah 拄拄六岁大niā，着來放弃做画家即个好的理想。第一号、第二号作品画了無算成功，互我真tàm志。Hiah-ê大侬，in 家己逐项攏bōe曉，佫見擺用安呢來做藉口，不管時噯叫汝解说(kái-soeh)互in 聽。這實在互囡仔儂感覺足無奈的。
後来，我只好选择另外一个职业，我去学驶飞机，世界各所在透底(thàu-tóe)拢互我飞thàng-thàng。有影啦，地理学确實对我有真大的帮赠。我若看一目，着随會當分出叨位是中国、叨位是亚里桑那。设使飞機伫暝時失去航向，地理学着开始发挥作用。
我的人生當中，捌掺儕儕正經又佫严肃的侬接接(chih-chiap)过。我伫大侬的世界内底度过真长的一段时间。我常在(chhiâng-chāi)详细咧观察chiah-ê 大侬，呣佫罕咧看着in 的改變。
有噹時仔，拄着一半个仔头壳略仔咔清楚的大侬，我定定会共(kā)细汉时画的第一号作品捎(sa)出來互in 看，想卜试看in 有啥款的反应。我想卜知影in 是呣是真正有“理解能力”。不而过，我聽着的回答定定是：“这是一顶帽仔”。安呢，我着bōe 佫掺in 讲起“锦蛇啦、深山林内啦、抑是天顶的星啦、月啦……”即寡仔代誌。我看破嗳佫吞忍(thun-lún) in 的水平，姑不而将，我著嗳佫掺in 讲“桥牌啦、政治啦、高尔夫呀、皮鞋目镜啦”即款龟挪鱉趖(ku-lô-pih-sô)的代誌。着是安呢，大侬透底会呵咾(o-ló)我是一个知道理、捌代誌的侬。
第2部
我着是安呢，定定家己一个孤单过日子,無半个死忠的知己。即款的日子一直遘kah六年前，我的机器伫在撒哈拉沙漠发生故障。发动机(iân-jín) 内底有一个零件歹去。迄阵是空身一侬，机械师無伫咧，嘛無旅客，我想卜家己一个侬修理，虽莽(sui-bóng)工课(khang-khè)真正复雜！对我来講，這實在是关系生死的大條代誌，我扎的水，kan-taⁿ有法度挡(tòng)咧成(chiâⁿ)禮拜久。
我第一擺睏伫即款四界chhōe無虼蚤(ka-cháu)木虱、無看着半个侬的大沙漠顶。我感觉比侬落落(lak-lo̍h)水，mo·h竹排仔伫大海漂浪，咔佫凄凉。第二工,天拍殕光(phah-phú-kng)的時阵,我雄雄听着一个奇怪的声音，细细声咧共我叫精神。汝聽好(thèng-hó)想看我有偌呢仔興奋佮惊愕(kiaⁿ-ngia̍h)。有侬輕聲細説來咧講話：
“請汝画一只羊仔互我，好無？”
“啊！”
“共我画一只羊仔…”
我bōe 输去互电电着，雄雄chôaⁿ仔peh起來，赶緊目睭jôe-jôe咧，想卜斟酌(chim-chiok)看是啥侬咧講話。我看着一个生做诚怪巧 (kòai-khá)的囡仔兄，伊真正严肃徛(khiā)伫hia，共我金金相。這是路尾我画互伊的，嘛是我即世侬画了上讚的一幅图。不而过，我画的图定著佫比實际的差kài侪。這呣是我的过错。我才六岁，大人着逼kah我失志做画家的勇气，我kan-na捌画过破腹的蛇佮無破腹的蛇，此去着呣捌佫学过画图。
我用一种真正好玄(hó·ⁿ-hiân)眼神看着面头前即箍呣知tùi叨位暴(bok/pauh)出來的猴囡仔。逐家噯知影，迄当阵(hit-tong-chūn)我的位置是离居民區千外里远的 山頭 lo̍k-khok-bóe。不而过，我看迄箍猴囡仔真自在，完全無成 (sêng)迄款“呣知路通(thang)轉厝、pháng見的囡仔”。我真正是gông-ngia̍h kah 喙舌险险拍結，过卜規晡，我問伊第一問題：
“Hi，汝伫遮咧创啥？”
伊 soah 無插(chhap)我，佫kán-ná有真重要的代誌趕緊卜做的款，伊佫共我講一遍：
“请汝…共我画一羊仔…”
奇怪？敢 hiah 神秘？是講，即种“神秘”的感覺soah共我的思想佮行动控制去，叫我嗳乖乖仔服从差教。讲實的，伫即款無侬徛起的山頭领尾，随時拢会無命，不而过我soah無才调停止即种离經(lī-keng/荒诞)的行为——我真緊着按lap袋仔内iam出一支笔佮一张纸。雄雄又佫想着我kan-taⁿ学过“地理、历史、算术佮语法”，我小可呣情愿呣情愿，共迄个猴囡仔讲 其實我bōe 曉画图尪仔。伊soah共我应讲：
“無要紧啦，汝共我画一只羊仔啦！”
我苦！我咔實呣捌画过羊仔，kan-taⁿ会曉画破腹的、佮無破腹的蛇。我規氣chôaⁿ按照家己的想法，佫共迄幅無破腹的锦蛇画出來。
“無嗳，無嗳！我無嗳大蛇，汝看he大蛇腹肚内佫有一只象伫咧(tī--leh)。”
聽伊应即句话，我soah戇去(gāng--khì)！紲落來伊佫讲：“大蛇傷过頭狼毒(lông-to̍k)；象，傷镇位。阮兜，所在真e̍h (oe̍h)、真细，我kan-taⁿ卜嗳一只羊仔，汝画一只羊仔互我啦”。
我chôaⁿ仔画羊。
伊先注心看我咧画，尾仔佫讲：
“即只羊仔破病kah遮thiám！我无爱。汝嗳佫共我画一只。”
我chôaⁿ仔佫画。
即擺，我即个拄拄熟似(se̍k-sāi)的朋友，伊笑kah真正古锥，煞客气客气共我拒绝：“汝看，你画即只呣是羊仔囝 ，是羊公，佫有發角。”
我chôaⁿ仔佫画一张。
即幅，伊共款佫呣挃(ti̍h)。
“即隻伤老。我卜挃(ti̍h)一只会当活足久足久的羊仔。”
我真正無伊法。我无hiah侪美国时间，我紧狂卜修理发动机，chôaⁿ 做我乌白chu̍t，凊采佫画一张出来 凖拄煞。我确实真不耐烦，小可歹歹，共伊應讲：
“我画一奇(kha)箱仔啦，汝卜挃的羊仔伫内底。”
想bōe 遘即擺...即个小评判员soah畅(thiòng) kah 喙笑目笑。伊讲：
“我着是卜挃這，…汝讲即隻羊敢嗳食足儕草仔？”
“乜代(mih-tāi)？汝問這卜创啥？”
“因为阮tòa 的所在真细…”
“我共汝画的迄只羊仔真细隻，若的確卜飼，所在呣免偌大片啦…”。
伊chôaⁿ仔àⁿ落去，對著迄幅图金金相。
“嘛無像汝讲的hiah细啦...汝看！伊咧睏也…”
我着是安呢佮小王子相捌的。
第3部
我问真久才了解小王子是按叨位仔來的。伊问我真儕问题，颠倒是我问伊的，伊soah定定當作若無听着共款。我按伊讲的话语当中，慢慢仔了解着伊的來歴 。比论讲，伊拄现看着飞机的時阵（飞机我着無想卜画出來也，he實在傷复雜），共我问讲：
“这是啥物碗糕？”
“这呣是普通的 chhit-thô 物仔。伊會飞。这號做飞机(飞凌機)啦。我的飞机。”
我有淡薄仔風龜風龜，共伊讲我會飞。伊听了後chhoah一下，问讲：
“甚物？敢讲汝是按天頂落落來(lak--lo̍h-lâi)的？”
“喺啊”(hēⁿ--a)，即擺我小可有咔谦虚淡薄。
“Hâⁿ 啊？！有影笑诙着着(to̍h-tio̍h)！”。
看小王子笑kah gî-sai-sai，我實在诚bōe 爽。我感覺别侬该當噯严肃來看待我的不幸。尾仔，伊佫讲：
“若安呢，汝oân仔是天顶落來的ho·ⁿ！汝是叨一粒星球的？”
伊安呢讲，我著小可ioh著伊是ùi叨位來的...我赶紧问伊讲：
“汝是tùi叨一粒星球来的呣？”
呣佫，伊并無回答我的问题。他目睭看飞机，略仔有咧tìm头，又佫开喙來讲话：
“着是讲呣，驶即號傢俬頭仔，汝是無可能按真远的所在來的…”
话讲煞，伊soah静静…家己一个呣知咧想啥货，想kài久。尾仔，看伊按裤袋内iam出迄张拄才央(iang)我画的羊仔图，戆戆(gāng-gāng)無做聲，呣知佫咧考虑啥货。
雄雄讲起“别的星球”，佫讲一个有頭無尾，互我对面頭前即个小王子愈來愈好玄，愈來愈想卜知影佮in 有關係的儕儕秘密。
“汝是tùi叨位来的？你兜伫啥物所在？汝按算卜共迄只羊仔chhōa去叨？”
伊考慮liam-mi仔，尾仔应我讲：
“佳哉，佳哉汝互我迄奇(kha)箱仔，暗時仔聽好(thèng-hó)互羊仔囝tòa 。”
“He当然的loh！汝若听话，我佫送汝一條索仔，日时仔聽好共伊缚起來，小等咧，我著卜顺紲佫送汝一叢柴柱(thiāu)。”
我安呢建议，無疑悟(bô-gî-gō·)小王子聽了若像呣是真歡喜。
“缚起來？有够奇怪的想法。”
“汝若呣共伊缚起來，伊会四界(sì-kòe)走，走無去。”
我這个朋友又佫咧笑也：
“汝想讲伊会走去叨位？”
“呣管啥物所在。横直伊会一直走、一直走……”
即个时阵，小王子雄雄soah转(tńg)正經起來，共我应讲：
“這汝呣免驚，阮迄搭，所在真细真细。”
绁落去，伊soah略仔郁悴郁悴，家己咧唸講：
“直透走，嘛是走bōe 偌远…”
第4部
过無偌久，我佫了解着另外一層重要的代誌，小王子讲in tòa 的迄粒星球,kan-taⁿ比咱地球顶的一間厝仔咔大无偌儕。
若這我颠倒bōe 感覺驚惶(kiaⁿ-hiâⁿ)。我知影地球、木星、火星、金星即寡仔有名號的大行星lia̍h外，猶佫有成百粒無名的星球存在，不而过chiah-ê無名星透底kài细，凖講千里鏡嘛而不然(jî-put-jiân)看會着。天文学者見若(kiàn-nā)新发现着一粒星，着共伊编一个号，比论讲號做“325小行星”。
我有重要的证据会当说明小王子是按“小行星b612”來的。即粒小行星遘taⁿ kan-taⁿ捌互人类觀测过一擺，he是1909年一个土耳其的天文学家用千里镜看着的。
当时，即个土耳其的天文学家捌伫一擺国际天文学家代表大会顶，对伊的发现作过重要的论证。不而过，迄阵仔因为伊個人穿插(chhēng-chhah)的关系，無侬卜相信伊。hiah-ê 大侬見擺着是安呢。
好佳哉，土耳其有出一个独裁者，为着“小行星b612”的名望，强迫伊的国民拢嗳改穿欧式的服装，若無着卜判死刑。1920年，即位天文学家穿kah水噹噹，佫一擺为伊的發現作论证。即擺所有的侬拢chiâu同意伊的看法。
我讲chiah-ê掺“小行星b612”有tī-tāi的故事互恁听，佫讲伊的编号互恁知，这完全是因为大侬的缘故。chiah-ê大侬透底合意讲一寡仔数字。有時仔汝对大侬讲起一个拄拄相捌朋友，大侬往往bōe 共汝问一寡仔咔有实际意义的问题。可比讲，大侬从來(chêng-lâi) bōe 去问：“新交的朋友讲话声音啥款啊？嗳sńg啥款的游戏啊？有咧收集蝴蝶标本抑無啦？”……in 透底會汝：“朋友幾岁也？兄弟姊妹幾个啦？肥抑 sán？家境好抑是歹？”……in lia̍h-chòe安呢才有算了解朋友。假使汝共in 讲：“我看着一thōng起kah水噹噹佫新点点的楼仔厝，碰窗金 sihⁿ-sihⁿ，外墙又佫白晳皙(pe̍h-siak-siak)……”安呢，in 稳当想無即款厝仔到底有偌好。汝一定嗳共in 讲：“我看着一thōng 价值成百萬人民币的番仔楼。”安呢，in 一定会哀kah真大聲：“哇！有够súi的厝！”
汝若是共大侬讲：“小王子存在的证据是伊生做真súi，真好鬥阵，伊想卜挃一只羊仔囝。卜挃一只羊仔囝，這证明伊的存在。”听汝安呢讲,in 一定会hàiⁿ 頭，讲“汝即个三岁囡仔”！呣佫，汝若是共in 讲：“小王子是tùi小行星b612來的”，安呢in 一定听kah信信，嘛bōe 佫共汝問kah有一支柄通攑。in 一贯着是安呢。咱囡仔侬腹肠一定嗳放咔阔的，呣好佮in hiah-ê大侬咧计较。
話講倒转來，若会曉过日子的侬，是無咧管汰伊啥物编号呣编号！我實在足ǹg-bāng会当亲像咧“讲神古”安呢來开始即个故事。我真想卜安呢讲：
“古早古早，有一个小王子，伊tòa 伫一个佮伊的身軀平大仔平大的星球顶面，伊真ǹg-bāng有一个朋友……”对会曉过日子的侬來講，安呢讲会咔真。
我是無嗳侬凊凊采采讀我的册，卜讀汝着注心讀。我咧讲过去的時，心肝頭總是艰苦艰苦。我的朋友chhōa著伊的羊仔囝离开我已经六年也。我会坫遮骨力寫，是因为我驚我会共伊放bōe 记。共朋友放bōe 记，這實在是一層悲哀的代誌。呣是所有的侬拢有朋友。Ah我嘛無可能佮hiah-ê大侬共款，kan-taⁿ对数字感兴趣。着是安呢，我才会去買彩墨佮铅笔。我食遘即款岁頭，一世侬，kan-taⁿ六岁迄年捌画过破腹佮無破腹的锦蛇，此去着呣捌佫试过，即阵，食老才佫來學pûn鼓吹，硬liau哦！呣佫，我定着嗳尽量画互会成 (sêng)，虽然無啥把握。一幅画了hàm-hàm，另外一幅着真正害。上害的是伊（小王子）的体格寸尺hâ 拢bōe 准，有寡仔所在画了伤奒(hai)，有寡仔所在画了伤细；衫裤的色緻oân仔lia̍h bōe 啥会凖。姑不将，噯即爿改改咧、迄爿 chhiâu-chhiâu 咧，画出一个大概。hoān-sè有寡仔重要的部分画了走精(cháu- cheng/cháu-cho̍ah)去，请恁逐个嗳体諒，因为我即个朋友，伊家己着拢罕咧共我讲kah真明。伊认为我oân仔佮伊共款。呣佫，實在诚遗憾，我无法度看着kheh仔内迄只羊仔囝。我kán-ná 那來那亲像hiah-ê大侬，我看我是老也。
第5部
我差不多逐工拢会当了解着一寡仔佮小王子有tī-tāi的信息,可比讲in 迄粒星球啦，伊是安怎卜出外啦，伊的行程啦……chiah-ê信息拢是伫無意中ta̍uh-ta̍uh仔了解着的。第三工，我着了解着一層互侬伤心代誌，he是一齣掺一种號做“猴面包树”有牽连的悲剧。
即擺共款佮羊仔有tī-tāi。
迄阵，小王子呣知咧操烦啥物代誌，雄雄问我讲：
“羊仔敢正實会食细欉树仔？有影無影？”
“有影啦，正實的。”
“啊，我足歡喜的。”
我想無“羊食树仔栽”即款代誌有啥通歡喜的。小王子佫讲：
“着是讲，羊仔共款会去食猴面包树呣？”
我共伊讲，猴面包树呣是细欉树仔，是一款大kah若像天柱(thiⁿ-thiāu)的树仔；凖讲有一群象做伙來跋(pe̍h/pu̍ih)一欉猴面包树，嘛無法度共伊跋振动。
小王子伊soah起嗳笑：
“呵呵~~若安呢，chiah-ê象，呣着嗳一隻一隻叠叠(thia̍p)起來？！”
看起來伊佫是不止仔内行，伊共我讲：
“猴面包树oân仔有暴芛(puh-íⁿ)的时阵...”
“嗯。是讲，汝乜代(mih-tāi)卜放羊仔去食猴面包树栽咧？”
伊应我讲：“唉！這也(ā)使讲！”聽伊的意思是讲即个道理通侬知，无需要佫解说(kái-soeh)。不而过我是真正無瞭解，我定定嗳了真儕工、了真儕心神才有法度瞭解伊講的代誌。
我尾仔才瞭解小王子in 迄粒星球oân仔佮别个星球共款，涂骹兜的草仔嘛是有好bái草的差别。好草会结好籽，当然歹草伊着会结歹草籽；呣佫草仔籽無 tè看，透底互汝分bōe 清是好抑是歹。草仔籽tâi伫涂骹底，时阵若遘，伊自然会生根暴芛(puh-íⁿ)。设使暴出來的新芛是菜頭、玫瑰，若安呢咱着由在伊生湠、由在伊大欉。设使是暴出來的是一欉歹草種，咱著嗳冗早(liōng-chá)共伊抠献捒(khau hìⁿ-sak)，咔bōe日後起敗害。聽讲伫小王子in 星球hia，有一种kài恐怖的种籽仔——着是猴面包树的种籽仔啦。伫in 迄搭，即种呣成(m̄- chiâⁿ)种籽仔湠(thòaⁿ) kah規四界(sì-kè)，并且成做一种災難。這猴面包树的树仔栽，原在真奇怪，细欉的時若無赶紧共伊抠捒，聽候(thèng-hāu)互伊略仔咔大欉的，有時连神仙也抠伊bōe 振动。時间一下久，伊会愈湠愈厉害，树仔根会钻按地心去，那钻那深，遘尾規粒星球著拢總互伊钻thàng-thàng。若是星球本身着有够细粒，ah猴面包树又佫真儕，安呢遘尾仔規粒星球着會必了了、崩了了、散了了。
“这算纪律问题。”尾仔，小王子有解说(kái-soeh)互我听。“透早睏精神，頭面洗洗咧，嗳赶紧去门去拔(pu̍ih/pe̍h)猴面包树栽。即种树仔栽细欉的時陣掺玫瑰相亲像，看清楚了後，嗳赶紧來共拔献捒(pu̍ih hìⁿ-sak)。做即项工课(khang-khòe)實在诚無義量(bô-gī-niū)，呣佫诚简單。”
有一工，伊共我苦劝，叫我着嗳注心画一幅真súi真súi的图，伊讲安呢阮厝迄搭的囡仔着永远会记咧即層代誌。伊讲：“假使有一工，囡仔兄出外去旅行，这对in 來讲原在真有路用。有时，咱会chhōe借口，超工無嗳做工课(khang-khòe)，若像嘛無啥物败害；不而过，猴面包树栽若一工無抠，尾仔一定会造成大灾难！我捌去过一粒星球，一个贫憚(pîn-tōaⁿ)侬tòa 伫hia，有三欉树仔栽伊抠無离，结果……”
自安呢，小王子伫邊頭那介绍，我那画，尾仔規粒星球拢画起來。我从来(chêng-lâi)呣爱學大人物的口氣讲话，實在是因為猴面包树伤过危险，逐个佫拢無啥了解，对hiah-ê 來小行星的侬來讲，佫咔是危險，所以即擺，我卜用一款佮以早拢無共款的聲嗽(siaⁿ-sàu)來共逐个儂
交代。我讲：“囡仔兄啊，嗳致意(tì-ì) hiah-ê猴面包树哦！”我卜叫我chiah-ê朋友做伙來张弛(tiuⁿ-tî)即个危险——in 掺我共款，长期以來危险着存在伫咱的身軀邊，呣佫逐个soah拢激放放、若像無要無紧。我诚認真咧画，画诚久才共即幅图画出來。我共逐个讲的即个教训真正重要，所以我家己加做一寡仔，我感覺有價值。hoān-sè 恁會僥疑僥疑，是安怎册底其它的图拢無像即幅hiah-ni̍h lè斗？真简單：我嘛真想卜画咔súi的，呣佫soah画拢bōe 出來。颠倒是即幅猴面包树，我咧画即幅的時，kán-ná有一种意志一直咧共我鼓励。
第6部
啊！小王子……佮汝斗阵，我才通ta̍uh-ta̍uh仔了解着汝的生活、汝的苦衷。汝總是恬恬仔(tiām-tiām)坐坫hia，看日頭咧落山，這是汝唯一興做的代誌，我遘第四工才发现。迄阵仔，汝安呢共我講：
“我爱看日頭落山，行，咱斗阵來去看！”
“是讲，這嗳聽候(thèng-hāu)……”
“聽候啥？”
“聽候日頭落山啊。”
代先，我看汝gông-ngia̍h一下。尾仔，連汝家己嘛爱笑......汝讲：
“我雄雄 bōe 記咧，想讲(siūⁿ-kóng / lia̍h-chún)是伫阮hia！”
有影啦，逐个拢嘛知，美国若中昼(tiong-tàu)，法国拄好日頭卜落山，tòa 伫美国的侬若有法度随赶去法国，安呢拄好会当看着黄昏的日頭！是讲，法国是hiah-ni̍h仔远。不而过，伫恁迄粒小行星，骹步小可仔徙动(sóa-tāng)一下，汝随时著会得看着想卜看的夕阳佮红霞……
“我一日，上儕捌看过四十三擺日頭落山。”
佫过有liâm-mi-á，汝又佫讲：
“汝敢知影，有時仔汝若感覺bōe 快活，汝着想卜去看日頭落山。”
“一工看四十三擺，汝哪會chiah-ni̍h鬰悴？”
小王子伊無应(ìn)。
第7部
第五工，猶原是羊仔的代誌，互我通全部了解着小王子的秘密。佮前幾工相亲像，我無閒我的工课(khang-khòe)，伊想伊的代誌。伊恬恬(tiām-tiām)思考真久，若像是想着啥物道理，雄雄無頭無尾着共我問：
“羊仔若卜食树仔栽，安呢伊敢呣是共款会食花？”
“伊看着啥食啥。”
“连有刺的花嘛食落去呣？”
“有刺的嘛食去！”
“安呢刺有啥路用？”
我呣知卜安怎应伊。迄時我拄好咧扒一粒撰(sōan) kah 真ân 的螺丝。機器的故障kán-ná真严重，水嘛啉卜了也，我真烦恼遘尾無法度行出即片沙漠，心肝頭真正食急。
“若安呢刺有啥路用咧？”
小王子若有问题，無問kah清楚透白，伊是bōe 准煞(bōe-chún-soah)。Hit粒夭寿螺丝害我氣kah phut-phut-tiô，我凊采共伊应一句：
“刺哦，無路用啦，he根本着是伊的出頭。”
“噢！”
伊考虑tak久仔，我感觉伊即擺共我应话略仔歹歹：
“我呣信！花hiah-ni̍h 软chiàⁿ，hiah-ni̍h 温纯，in 千方百计保护家己，in lia̍h准講有刺伫咧，侬才会当感覺着in 的súi…”
我恬恬無做聲。我迄阵kan-taⁿ想讲卜赶紧共迄粒螺丝搤(iah)起來，若無着卜攑铁锤共(kā)啄献捒(tok hìⁿ-sak)。無疑悟，小王子又佫来共我tâⁿ：
“你soah讲是花咧…”
“好也，好也！我啥物拢無讲！我是凊采共汝应应的niā。拜托的，我有正经的工课(khang-khòe)卜做。”
伊感覺真驚惶(kiaⁿ-hiâⁿ)，伊想bōe遘我會安呢共伊喝。
“正经工课？”
他看我雙手ba̍k油ba̍k kah烏臭臭，一手攑鐵锤仔，一手hōaⁿ tòa 一个生做三角六耳的機件顶頭。
“汝讲话佮hiah-ê大侬共款！”
伊讲安呢，我soah感覺真狼狈(liông-pōe)。了後，伊變kah愈野赤:
“汝是非無分…逐项滥滥做一下！”
伊氣kah phi̍h-phi̍h-chhoah，頭壳hàiⁿ來hàiⁿ去、红頭毛弄起弄落。
“我捌去过一个星球，hiatòa 一个红面仙。伊根本呣捌闻过花的芳味；嘛呣捌看过天顶的星生做圓抑扁。伊無交半个朋友，伊kan-taⁿ知影算数(sǹg-siàu)，偆的逐项呣捌做过。伊規工拢佮汝共款，定定讲有正经代誌卜做。即款侬實在真假仙，伊根本着呣是侬，伊是蘑菇。”
“是啥货？”
“是蘑菇！”
小王子正實氣kah一支面白苍苍。
“千百年來，花生成着是会發刺，羊仔生成着是会食花。汝噯知影花是安怎直透咧制造hiah-ê無路用的刺仔，这敢讲着呣是正经代誌？敢讲羊仔佮花的矛盾着無重要呣？这敢無比迄箍阿肥仔红面仙的数目(siàu-ba̍k)咔要紧？假使即个世间kan-taⁿ偆一蕊花，即蕊花kan-taⁿ開伫阮迄粒星球，不而过soah去互一只羊仔無講無呾(tàⁿ)共拆食落腹，安呢敢讲無重要？”
伊那讲那受氣：
“假使規个宇宙kan-taⁿ偆一支花，假使有侬真合意即支花，安呢，即个侬逐擺眈(taⁿ)頭看天星的時，伊一定会定定感覺真福氣。他聽好(thèng- hó)大聲共侬讲：‘我迄蕊花伫叨一粒星球顶面…’，呣佫，若是不幸花去互羊仔食去，安呢对伊來讲，着若像天顶所有的星一目匿(chi̍t-ba̍k- nih)拢總變暗淡去！敢讲這oân仔無重要呣？！”
他已经讲bōe 落去也，坫hia咧目屎四湳涶，哭kah呣知今仔日拜幾。
天卜暗也，我手头的工课做bōe完，只好佫放咧。啥物"锤子、螺钉、枵寒(iau-kôaⁿ)、死亡…"，我已经拢總bōe 記去也。伫即个宇宙内底，伫一粒星球顶，伫一粒行星顶，伫我tòa 的行星顶，伫咱的地球顶，有一个小王子真需要我的安慰！我共伊揽伫身軀邊，揽稠稠(tiâu -tiâu)。我摇伊的身軀，共伊讲：“汝合意的迄蕊花無危险啦…我画一間 羊 tiâu 共迄只羊仔關起來…我画一领戰甲共汝的花幔(moa) 起來…我…”我實在呣知影嗳佮伊讲啥。我感觉得家己變kah真頇颟(han-bān)。我呣知卜安怎去共伊安搭…唉，目屎，目屎永远是赫呢仔奇妙啊！
第8部
真紧，我对迄蕊花有进一步的了解。往过，伫小王子in hia，花开的時，花瓣透底kan-taⁿ结一重(têng) niā。花拢诚细蕊，bōe 镇位，嘛bōe 互侬感覺cha̍k-chô，往往是透早开，暗時随敛去(lian--khì)。一时阵仔，嘛呣知tùi叨位吹來一粒草仔籽，尾仔即粒草仔籽又佫暴芛(puh -íⁿ)。迄阵，小王子特别注意即欉新芛，代先伊oân仔咧僥疑(giâu-gî)，想講敢會是别种猴面包树。呣佫，过無偌久，即欉新芛着無佫直直大欉起來，并且开始有咧结苞，看勢是卜开花也。不而过，尽管小王子逐工守伫伊的边頭，伊偏偏着是呣开花。小王子咧想：即蕊花稳当是覕(bih)伫花苞内底直透咧梳妆打扮，伊一定足爱súi的，若無装kahsúi噹噹、抹kah芳貢贡，伊是bōe hia紧出來的。对对(tùi-tùi/果然)是安呢，遘kah有一工透早，日出的時，花嘛开也。
花卜出世進前，虽然注心准备kài久，呣佫现出來，伊着假空咧哈耳(hah-hī)：
“失禮啦，我拄睏精神niā，汝看我的頭毛佫sàm-sàm…”
迄時小王子已经激动kah无法度控制：
“哇！súi súi súi！實在有够súi……”
花蕊宽宽仔(khoaⁿ-khoaⁿ-á)共伊应讲：
“喺啊(hēⁿ--a)，我是hām日頭同齊出世的咯(koh)…”
小王子感覺花蕊有淡薄仔咧展風龟，不而过，论真讲，伊确實是súi kah會驚死侬。
伊对小王子讲：“即mái应该是食早頓的时阵ho·ⁿ，请汝顺紲共我攢(chhôan)一份來…”
小王子soah歹勢歹勢，赶紧去攑喷桶(phùn-thàng)喷槍，舀水來沃花。
即蕊略仔爱風龟、又佫厚疑心的花，自安呢逐工咧拖磨、咧差教小王子。可比讲，有一工，伊对小王子讲起伊身軀顶迄四支刺：
“虎豹仔hiō·，汝共in 讲，叫in 做汝來！我無咧驚in ！”
小王子共应讲：“阮遮無虎豹仔，虎豹仔嘛無咧食草仔”。
花蕊细聲应讲：“我呣是草仔。”
“失禮啦。”
“我是無咧驚虎豹仔啦，不而过我讨厌即港(káng)生凊风(chhiⁿ-chhìn-hong)。汝有風堵(hong-tó·)通閘風(cha̍h hong)無？”
小王子咧想：“讨ià生凊風…這对植物來讲，运氣實在有咔害淡薄...即蕊花佫是诚歹伺候哩…”
“我看暗時汝嗳共我顧互好。恁即个所在有够寒、有够gàn (gân)。我坫恁遮tòa bōe 惯勢，侬我往过tòa 伫…”
伊讲遘遮，家己soah恬去(tiām--khì)。伊拄來的时阵不过是一粒草籽仔。伊根本無捌見过外口的世界。伊知影家己讲白贼讲kah煏空 (piak-khang)去，soah見笑转受氣，超工khām嗽两三声。伊使(sái)即招，其實是咧提醒小王子，頭先吩咐的代誌猶未做，伊催小王子：
“風堵咧？”
“我随來去攑(giâ)。是讲，汝頭拄仔講he…”
花蕊赶紧佫再大聲假khām嗽，意思bōe 输是咧讲：好也啦，汝佫呣紧去攢！
虽然讲，小王子本然是真心咧佮意即蕊花，呣佫，鬥阵一暂了後，伊soah开始对即蕊花产生僥疑。小王子着是安呢，侬讲一寡仔無要無紧的话，伊soah看真重，结果是害家己咧加烦恼。
有一工，小王子共我讲：“我無应该相信伊的话，無应该相信hit蕊花讲过的话……憖看to̍h看、憖鼻to̍h鼻，安呢着好也咯！我迄蕊花虽然是芳嗆嗆(phang-chhèng-chhèng)，呣佫我是bōe 曉通享受。迄擺，伊讲着虎豹，本然我是应该嗳同情伊，呣佫颠倒soah互我感覺诚怨嘆…”
不而过，真紧小王子又佫讲：
“迄阵仔我逐项呣捌！我實在無应该kan-taⁿ凭伊讲的话着來咧判断伊的好歹，照道理，我是嗳佫看伊作为才着。是伊丰富着我的生活，我實在無應該放捒伊做我一个侬走出來。我kan-taⁿ看着伊的虚華，soah bōe 曉去感受囥伫虚華后壁的温情。花的内心其實是hiah-ni̍h 仔矛盾！怪我当時伤chhóng-pōng，伤过呣捌代誌，bōe 曉通疼惜伊。”
第9部
我约(ioh/猜)小王子大概是趁一群候鸟搬岫的時，顺紲走出来的。卜出來的迄日透早，伊共星球顶的大细项的物件拢款kah诚齊整(chôe- cháⁿ)、诚四序(sù-sī)，连活火山嘛拢拼扫kah清氣tak-tak。—— in hia有两座活火山，早起时燃(hiâⁿ)寡仔饮糜(ám-bê)原在真利便。這以外，猶有一座死火山，卜出來進前，伊嘛顺紲去共(kā)清清拼拼咧。伊咧想，無定著死火山日後會佫變活起來嘛無一定！共拼拼扫扫咧，伊自然着会匀匀仔滚绞(kún-ká)，咔bōe 雄雄爆发起來。火山爆发，着若像迄号烟筒(ian-tâng)咧喷火煙共款。是讲，咱地球的人口實在猶無够儕，無法度去拼扫火山，所以咱遮的火山才会hiah-ni̍h 仔"费氣"。
小王子共偆的幾欉"猴面包仔树栽"全部拢抠抠起來。伊感覺心肝芛仔(sim-koaⁿ-íⁿ-á)略仔酸酸。伊想講hoān-sè bōe 佫倒轉來也。迄工，伊感覺hiah-ê普通時逐工咧做的工课，taⁿ做著加真親切。小王子最后一擺去沃花，有按算卜共伊藏(chhàng)起來。伊感覺鼻頭酸酸，目屎险险辗(lìn)落來。
“Bye...”小王子准备卜佮花蕊讲再會。
呣佫花kán-ná無共伊应。
“Bye-bye......”小王子又佫讲一遍。
"khe̍h...khe̍h...khe̍h..."花蕊ka嗽一辄(tiap)久仔，不而过無成(sêng)染風寒的款。
尾仔，花蕊總算开喙讲话：“我頭拄仔實在有够天tho̍h。请汝原谅我。我希望汝会幸福。”
花蕊無怨叹，小王子昂愕(gông-ngia̍h)一下，手摕花罩(hoe-tà)，柴柴(chhâ-chhâ)在(chhāi)伫hia，soah呣知卜安怎。伊想無花蕊哪會雄雄變kah chiah-ni̍h tiām、chiah-ni̍h温纯。
“無呣着，我爱汝。”花蕊共小王子讲：“Ah呣佫，因为我的懵懂(bóng-tóng)，互汝烦恼，ah汝拢吞忍(thun-lún)落去。這拢無重要啦。不而过，汝soah佮我平(pêⁿ)愚tû(gû-tû/愚蠢)……祝汝幸福。花罩仔汝收起來，我应该呣免佫用着這。”
“若起风落雨卜安怎？”
“我感冒無kài严重…暗仔時的臭凊風(chhàu-chhìn-hong)颠倒对我有好無bái……我是一蕊花。”
“若有蛇抑是蜈蚣趖过來咧?若是野兽咧？…”
“這汝放心，我若决心卜佮美蝶仔(bé-ia̍h-á)交陪，我是無可能會驚迄啰(hit-lō)跷痀仔虫(kiau-ku-á-thâng)來车盘。我相信這应该是一段传奇的故事才着(tio̍h)。若無，是啥侬卜來看我？Ah汝嘛卜去真远真远的所在也。汝呣免驚大mau的野兽，我有爪仔 (jiáu-á)，呣免驚。”
讲煞，伊佫攑(gia̍h)起迄四欉刺起來展……
“Mài 佫拖soa ah啦…哦！汝有够cha̍k--ê neh！汝既然卜走，嗳趁早，紧去啦！”
伊是驚小王子看着伊咧哭。伊是一蕊个性儼硬(giám-ngē)的花…
第10部
伫附近的宇宙空间内底，猶佫有325、326、327、328、329、330等等的小行星。小王子开始去访问即寡仔星球，伊想卜伫hiah chhōe寡仔工课來做，顺绁学寡仔智識kah经验。
第一粒星球顶面tòa 著一个国王。国王穿一领茄花色（紫色）透滥白底烏花毛皮做的大礼服，坐tòa 一隻体形简单呣佫真正英威的宝座顶頭。
国王看着小王子的時，喝一声：
“哦，来一个臣民。”
小王子家己咧想：“伊也呣捌看过我，哪会捌我？”
小王子哪知影，伫迄个国王的心目中，世界其實真简单：所有的侬拢是伊的臣民。
国王诚氣頭(khùi-thâu)，因为伊總算成做某一个侬的国王。伊对小王子讲：“徛咔过來的，互我斟酌bāi一下。”
小王子四界嘪嘪咧，想卜chhōe一个仔所在坐落來，不而过，規粒星球差不多去互国王迄领水噹噹的大禮服勘勘去(khàm-khàm--khì)也。 chhōe無所在通坐，小王子只好徛咧。呣知是呣是徛了伤久伤僐，抑是本成(pún-chiâⁿ)着诚thiám，小王子soah伫hia咧哈耳(hah- hī)。
国王对伊讲：“伫一个国王的面頭前哈耳，是無禮體、呣捌禮数。我禁止汝拍哈耳。”
小王子感覺诚見笑：“歹勢啦，我實在控制bōe tiâu 才会安呢，我是按真远真远的所在，一路踅(se̍h)來遘恁遮，遘taⁿ 拢猶未睏的neh。”
国王应讲：“安呢哦...好啦，我命令汝开始哈耳。我已经幾若年呣捌看儂咧哈耳也。对我来講，拍哈耳，hoān-sè 是一層趣味的代誌。来，汝佫哈耳一下！这是命令。”
“安呢哦，這...我soah略仔紧张紧张…我雄雄soah哈耳bōe 出來…”小王子感覺真歹勢。
“嗯…嗯…”国王共伊应講：“若安呢，我…命令汝liâm-mi哈耳，liâm-mi…”
国王家己咧嘀嘀嘟嘟、踅踅念(se̍h-se̍h-liām)，好親像略仔有咧受氣的款。
国王一心想卜展伊的英威，噯儂尊敬伊。伊無法度吞忍臣民呣聽伊的命令。伊是一个正港的君王。不而过，他嘛真善良，伊的命令透底有一定的道理。
伊定定安呢讲：“假使我命令一位将军变做一只海鸟，呣佫将军無服从我的命令，安呢，這bōe 當算是将军的过错，有过错的侬是我。”
小王子诚细腻(sòe-jī)來咧問伊：“我敢会使坐落來 ？”
“我命令汝坐落來。”国王那(ná)吩咐(hoan-hù)，那(ná)徙动伊迄领大禮服。
是讲，小王子實在感覺诚奇怪，行星chiah-ni̍h仔细，国王是咧统治啥货？
伊对国王讲：“万岁爷…请汝原谅，我想卜请教汝…”
国王赶紧抢伊的话尾讲遘：“我命令汝问我。”
“万岁爷…汝拢咧统治啥？”
国王简單共伊应讲：“我统治一切。”
“一切？”
国王轻轻仔用指頭仔(chéng-thâu-á)指著——伊tòa 的行星、别粒行星、佮所有的星。
小王子讲：“统治这一切？”
“统治这一切。”
路尾，小王子才知影，伊不但是一个真真正正的君王，而且佫是整個(chéng-kô)宇宙的君王。
“若安呢，chiah-ê星，敢拢服從汝？”
“He定著的！”国王共伊讲，“in 随時拢嗳服从。我是呣允凖無纪律的。”
即款的權力,實在互小王子感覺真驚惶(kiaⁿ-hiâⁿ)。设使真正掌握着即款的權力，安呢，国王一工着呣若(m̄-nā)看会著四十三擺日落山niā，伊聽好看七十二擺，一百擺，二百擺，横直爱幾擺着有法度看幾擺！嘛呣免捷捷(chia̍p-chia̍p)來咧chhiâu椅頭仔！想着安呢，小王子又佫想起互伊
放捒的小星球，雄雄心肝頭感覺真艰苦。伊大胆对国王提出一个请求：
“萬嵗爺，我想卜看日落山，拜托汝…命令日頭落山好無…”
国王共伊应讲：“汝想看māi，假使我命令一位将军，叫伊嗳親像一隻美蝶仔(bóe-ia̍h-á)安呢飞來飞去，抑是讲命令伊写一出悲情的剧本，抑是讲叫伊着嗳变做一只海鸟，呣佫即个将军伊無爱执行，安呢，汝讲是伊呣着(m̄-to̍h)，抑是我呣着？”
“安呢当然是汝呣着。”小王子真肯定來回答伊。
“無呣着，”国王讲，“共别侬提出要求，着嗳看侬做会遘抑是做bōe 遘。若讲權威，代先应该是建立伫咧理性的基础上。假使咱若命令百姓去跳海，in 一定会攑刀攑枪(gia̍h-chhiuⁿ)來佮汝車拚。我的命令是合理的，所以我有权要求别儂服从。”
“若安呢，我头拄仔讲的日落山，這...”小王子見若(kiàn-nā)提出问题，無问透機是bōe 凖煞。
“‘日落山’呣，汝看会着啦。我定著嗳吩咐(hoan-hù)日頭落山，不而过按照我的科学统治，這一定嗳等候条件成熟。”
小王子问讲：“若安呢，嗳等遘底噹時(tī-tang-sî)咧？”
国王未应進前，先hiau出一本厚phiang-phiang的暦日佇咧反(péng)，那掀(hian)那咧唸：“嗯…嗯…這日落山，量其约伫咧…伫咧...下暗(e-àm)七點八字的檻站！迄陣，汝着会当看着日頭落山，遘kah迄阵，伊自然會执行我的命令。”
小王子又佫开始哈耳。Bōe 當看着日落山，他感覺诚遗憾。伊感覺诚無議量(bô-gī-niū)，chôan对国王讲：“我無必要佫留坫遮。我卜來走也。”
因为拄拄chiah有一个臣民，国王加真氣頭(khùi-thâu)，伊用命令的口氣对小王子讲：
“呣好(m̄-hó·ⁿ)走，呣好走。我任命汝做大臣。”
“啥物大臣？”
“嗯…司法大臣！”
“不而过，汝遮kán-ná也無啥物仔儂通审判断咯。”
“He無的确啦”，国王讲，“我老也，我即个所在又佫细，拢無位通排我的銮驾。我若行路，着诚thiám，遘taⁿ 我猶呣别巡視过我的王国lio·h！”
“噢！hia我拢去看过也。”小王子那讲，那越頭去看星球的另外一角勢，"是讲，hia嘛共款無半个儂哩..."
“若安呢，汝着审判汝家己咯！”国王应讲，“这有影咔oh啦，审家己定著嗳比审别侬咔oh！汝若有法度好好仔审判汝家己，汝着是一个真正有才情佫有智慧的儂。”
“我喺(hehⁿ)，凊采啥物時陣拢有法度审判家己，無一定嗳坫遮审。”
国王佫讲：“嗯…嗯…我本然是想讲...我遮有一隻老鳥鼠，下昏時定定安呢喌喌叫(chiu̍h-chiu̍h-kiò)，吵kah我拢bōe睏咧。汝会当來审判伊，会当捷捷(chia̍p-chia̍p)判伊死刑。所以，伊的生死完全teⁿ伫汝的手頭。呣佫，汝嗳撙節用汝的權力，汝逐擺判伊死刑了後，著嗳随赦免伊，因为即搭kan-taⁿ一隻鳥鼠niā。”
“呣佫，我呣爱判儂死刑，我看我猶是來走咔好。”小王子讲安呢。
“Bōe-ēng--ê。”国王小可咧起狂。
不而过，小王子已经款好勢也。为着無卜互老君王感覺伤过悲伤，小王子共伊讲：
“假使万岁爷只是想卜得着一个實實在在的服从，汝会當互我一个合理的命令啊。比論講，汝會當命令我，伫一分钟内离開。我认为即个条件已经成熟也…”
国王啥物拢無应。頭起先，小王子佫頓蹬頓蹬(tùn-tiⁿ)，尾仔，伊咽一口氣，着做伊行囉…
“我派汝做我的大使(tāi-sài)。”国王赶紧佫喝(hoah)一聲。
小王子越頭，看著hit-ê国王又佫激一个真英威的甫士……
小王子伫旅途当中，家己咧想：chiah-ê大儂實在有够奇怪。
第11部
第二粒行星顶面tòa 一个爱風龟的儂，咱暂時著叫伊"風龟神兮"、抑是"謗風水鷄"着好也。
“哎哟！汝共(kā)看！一个欣慕我的儂來也！”即个爱虚華的儂远远仔看着小王子行过來，着 thiòng kah 、哀kah大聲细聲。
对hiah-ê爱風龟的儂來講，其他儂拢是伊的崇拜者。
“汝好！”小王子对伊讲，“汝的帽仔足奇怪的。”
“哦，这是共(kâng)接禮的時卜用的。”風龟神兮应讲，“若有儂对我表示歡迎佮尊敬的時，我着噯褪帽仔共in 接禮。不而过，遘taⁿ 拢無儂來行踏(kiâⁿ-ta̍h)。”
小王子無理解，chôaⁿ問伊講：“hâⁿ？敢有影？”
風龟神兮chôaⁿ共小王子提一个建议：“汝用倒手拍正手看māi 咧。”
小王子chôaⁿ聽伊的話，伫hia咧拍撲仔(phah-pho̍K-á)。Ah迄个風龟神兮，嘛随褪帽來答禮，看伊是假kah 赫呢仔谦卑，又佫有風度。
小王子心肝内咧想：“这比访问迄个国王咔趣味。”伊感覺诚好sńg，chôaⁿ直透咧拍撲仔。風龟神兮看伊佫咧拍撲仔，赶紧佫溜(liù)帽仔來答禮。
小王子chhit-thô差不多成字久(chiâⁿ-jī-kú)了後，soah感覺親像诚無義量、诚無趣味。伊对風龟神兮讲：
“有啥物好步数，会当互汝的帽仔落落來(lak--lo̍h-lâi)？”
風龟神兮假意無聽見，凡若(hōan-nā)爱展風神的儂，透底憖(giàn)儂呵咾，無噯儂嫌。
伊问小王子：“汝敢正實有钦佩我？”
“钦佩是啥物意思？”
“钦佩哦，著是講，承認我是即粒星顶...上巧的、上缘投的、上好額的、穿插上排祉(pâi-chí)的儂。”
“呣佫，即粒星顶頭嘛才kan-taⁿ汝一个儂niā！”
“為着我會當快活(khòaⁿ-oa̍h)，费神汝紧來钦佩我啦！”
小王子聽了後，肩胛頭giauh咧giauh咧，共伊应講：“好，我钦佩汝，是講，安呢汝是咧歡喜安怎？”
實在诚無議量，小王子看破做伊离开。
小王子一路行，一路咧想：“chiah-ê大儂，實在有奇怪。”
第12部
小王子紲落來访问的迄个星球，顶頭tòa 一个酒鬼仔。访问时间虽然真短，呣佫soah互小王子感觉加真伤悲。
“喂，汝咧創啥？”小王子问迄个(hit-ê)酒鬼仔。酒鬼恬恬(tiām-tiām)坐伫hia，面頭前一堆酒矸，空的、無開封的，满四界(sì-kòe)、茹苍苍(jû-chhiáng-chhiáng)。
“我咧食酒。”酒鬼仔看勢真鬰悴的款。
“你乜代(mih-tāi)卜食酒？”小王子佫问伊。
“为卜...放互bōe 记。”酒鬼回答。
小王子感覺伊诚可憐：“卜共啥代誌放互bōe 記？”
酒鬼仔頭壳勾勾，坦白共小王子講：“為了卜共我的見笑代放bōe 記。”
“汝有啥物見笑代？”小王子有心想卜共伊鬥相共。
“我興食酒，這着是我的見笑代。”酒鬼仔講煞，做伊激恬恬，無佫講话。
小王子感覺無法度理解。看破佫行。
一路行，一路那咧想：chiah-ê大儂确确實實是诚奇怪。
第13部
第四粒行星是一个實业家(大生理侬)的地盤。即个大生理侬規工無閒chhih-chhih，小王子來遘了後，對方拢無眈(taⁿ)頭看伊。
小王子先佮伊相借問：“汝好。汝的薰支(hun-ki)熄去也。”
“三加两等于五。五加七等于十二。十二加三等于十五...汝好。十五加七，二十二。二十二加六，二十八...無閒工通点啦。咔停才來点。二
十六加五，三十一。哎哟！拢總五亿一百六十二万二千七百三十一。”
“五亿啥？”
“嗯？汝佫伫咧哦？五亿一百万…我嘛记bōe 清是啥货。我的工课(khang-khòe)诚儕…我做代誌一贯拢诚點陳，無迄个閒工佮汝練仙！二加五得着七…”
“五亿一百万啥貨啦？”小王子佫再問一擺。一旦有疑问，無問kah有一支柄通攑(gia̍h)，伊是bōe 煞尾。
大生理侬眈頭看著小王子，应讲：
“我tòa 伫即个星球顶五十四年也，kan-taⁿ捌互侬扰吵过三擺。第一擺是二十二年前，呣知按叨位仔趖來一隻金龟，共(kā)我扰吵着。金龟仔的叫声“啁啁叫”，實在歹聽kah會驚死侬，害我一條数目(siàu-ba̍k)算kah重tâⁿ三四擺。第二擺，是十一年前，迄陣拄好風濕病夯(giâ)起來疼， he是我普通時欠锻炼引起的。我實在無hia儕美國時间佮汝咧喝仙(hoah-sian)。我是个诚正經、诚严gâi的侬。即擺…這是第三擺！我计算的结果是五亿一百万…”
“幾百万啥？”
Taⁿ即位大生理侬知影講即擺稳当無法度静心囉，伊看破佫共(kā)小王子应講：
“幾百萬个kài细kài细的物件，chiah-ê物仔有時会出現伫汝的頭壳顶。”
“是胡蝇呣？”
“無nò·，是一寡會艶艶爍(iām-iām-sihⁿ)的物件。”
“是蜜蜂仔呣？”
“呣是啦，是迄款黄黄、又佫金金的物件仔，即款物件仔不時引起一寡仔贫憚侬(pîn-tōaⁿ-lâng)伫hia咧烏白想。我是一个真严肃的侬。我無迄个閒工想東想西。”
“啊，敢講是天顶的星？”
“着啦，to̍h是天顶星啦。”
“汝卜用即五亿粒星创啥？”
“是五亿一百六十二万七百三十一粒。我是一个严肃的侬，我做代誌一贯拢真點陳。”
“你按算卜用chiah-ê星创啥？”
“啥创？”
“是啦，卜啥创？”
“無卜创啥。遮拢我的。”
“星拢汝的？”
“拢我的。”
“呣佫我捌拄着一个國王，伊…”
“国王無占有權，in 只不过是咧‘统治’niā。這是两回事。”
“你beh 挃(ti̍h) hiah儕星有啥路用？”
“咱若好額起來，咱着会當去買别位的星，假使有侬chhōe著新的星。”
小王子心内咧想：“即个侬考慮问题若像有淡薄仔siâng進前迄个酒鬼仔。”
不而过，小王子真緊又佫问伊一寡仔问题：
“汝敢有才调共(kā) hiah-ê星拢占tiâu-tiâu？”
“Ah無....汝講hiah-ê星是啥儂的？”大生理儂真bōe 爽，共小王子拄一句。
“我呣知，不而过，應该是無儂的。”
“若安呢，hia拢嘛算我的，因为我是頭一个考慮即層代誌的儂。”
“kan-taⁿ凭安呢呣？”
“He當然的。假使汝抾(khioh)着一粒無主侬的钻石，若安呢即粒钻仔着是汝的；凖講汝发現一座無侬知影的岛屿，安呢即座岛屿着是汝的；佫比論讲，汝若比儂咔代先想著一个好步数，安呢汝着会當去申请一个专利，即个专利著是汝的。既然進前拢無侬想卜去占hiah-ê星，安呢hiah-ê星着是我的。”
“安呢講嘛有理啦。是講，汝挃(ti̍h) he卜创啥？”小王子佫問伊。
“我咧经营佮管理chiah-ê星咯。我一遍佫一遍來咧计算in 的数量。這是一项無简单的代誌。不而过，我是一个严肃佫骨力(kut-la̍t)的儂！”
小王子原在猶未满足，伊佫講：
“对我来講，我若有一條颔巾(ām-kin )，我着会当共(kā)摕起來围，嗳卜扎去叨，着扎去叨；我若有一蕊花來讲，准讲想卜挽(bán)，我着共伊挽落來。Ah汝咧，汝敢有法度将星挽落來？！”
“我無法度，呣佫我会当共(kā)寄伫银行。”
“汝是咧讲？？....”
“我意思是講，我會使将星的数量寫伫一张纸條仔顶，了後才佫摕去锁伫桌屉(toh-thòa)内。”
“安呢着好勢呣？”
“安呢着会使得。”
小王子心肝内咧想：诚好sńg。看起來佫不止仔趣味，是讲，這敢有算真了不起的正經代誌？”
若講起啥物號做“正經代誌”，小王子的看法佮hiah-ê大儂真無共款。紲落來，小王子佫讲：
“我有一蕊花，我逐工共(kāi)沃水。我佫有三座火山，我逐禮拜去共拼扫一擺。连死火山嘛做一下拼，無儂知影伊啥物時陣会佫复活(ho̍k- oa̍h)起來。我有火山、有花，因为有我，对我的火山佮我的花來讲，绝对有好無bái。不而过，汝本身，对著hiah-ê天星，soah無啥作用…”
大生理儂聽kah戇戇(gāng-gāng)，应bōe 出來。小王子只好佫行。
小王子一路行，一路那咧想：hiah-ê大儂實在足奇怪、足奇怪的。”
第14部
第五颗行星上kài奇怪，嘛上kài细粒。细kah kan-taⁿ会當khè一葩路灯、tòa 一个顾灯的侬。小王子實在想無：chiah-ni̍h细的星，又佫chiah-ni̍h仔偏挹(phian-iap)，顶頭也無厝仔也無tòa (tòa )其他侬，呣知点迄葩燈有啥路用？Ah迄个侬是安怎卜伫hia顾燈？
小王子家己咧臭giâu疑：“kiám-chhái即个儂有淡薄仔無正常，呣佫伊稳当(ún-tàng)会比国王、風龟神兮、生理侬佮酒鬼仔咔好一寡仔，上無，伊的工课(khang-khòe)嘛咔有意義。伊若点燈，着若像是加添一粒星，抑是一蕊花；燈若禁熄，就代表星抑是花卜來歇睏囉。即项工课有影值得呵咾(o-ló)，嘛不止仔有出脱。”
小王子來遘，見面着诚有禮貌來佮点路灯的侬相借問：
“Gâu早。——汝頭拄仔是安怎卜共(kā)路燈禁熄咧？”
“Gâu早。——这是命令。”顾燈兮应话。
“命令啥？”
“命令我嗳熄灯。——哦...暗安。”
一目匿(nih)，伊又佫點着(to̍h)迄葩路燈。
“若安呢，是安怎汝又佫卜共伊點着(to̍h)？”
“这是命令。”顾燈兮照原安呢讲。
“我聽無。”小王子讲遘。
“無啥通好解説的。命令着是命令。”顾燈兮ná講ná咧做伊的工课，“敖早。”
话講拄煞niā ，燈佫再禁熄去。
小王子看伊按lak袋内iam出一條手巾來咧拭頭额(thâu-hia̍h)。
“我做即款頭路(thâu-lō·)，實在真thiám頭。往过(éng-kòe)猶佫泛泛代(hàm-hàm-tāi)，透早熄灯，下昏(e-hng)点灯，偆的時间，日時仔歇工，暝時仔睏ka睡(khùn-ka-chōe)…”
“照安呢讲，是路尾有儂改變命令呣？”
顾燈的应讲：“命令是無改啦，呣佫，會害嘛是為著這！即粒星咧踅(se̍k)，一年比一年咔緊，呣佫命令soah拢無改。”
“路尾咧？”小王子问伊。
“路尾着是像即陣安呢，一分钟伊着踅一環，我连一秒钟着無通歇。見若(kiàn-nā)过一分钟我着嗳点一擺，佫禁一擺！”
“诚趣味，敢講汝即个所在，一日kan-taⁿ 一分钟久niā？”
“實在有够無聊，”顾燈的讲，“從(chêng)頭拄仔咱开講遘taⁿ ，已經过去個外月也。”
“個外月？”
“無呣着，拢總半点钟久。三十工！——哦...暗安。”
话讲拄煞，燈火佫着(to̍h)起來也。
小王子金金共伊相，讲實的，伊诚钦佩顾燈侬chiah-ni̍h仔死忠(sí-tiong)來咧遵守命令。伊想起咔早家己嘛定定chhiâu椅頭仔來咧看日頭落山。伊真想卜帮助即个朋友。
“我共汝讲一个撇步，会当互汝偸歇睏一下，汝憖(giàn)卜啥物时陣歇睏拢会使得"。
“我定定嘛咧想卜歇睏。”顾燈兮应话。
有的侬虽然一贯真踏實(ta̍h-si̍t)、真照起工，呣佫有時oân仔會想卜小可踉港(làng-káng)一下。
小王子佫讲紲落去：“即粒星遮细，汝行三伐(ho̍ah)着聽好(thèng-hó)踅一辗(se̍h-chi̍t-lìn)。汝只卜匀匀仔行，不管时拢嘛会当看着日頭光，凖讲汝想卜歇工，汝着会使照安呢去做...汝卜嗳日偌(lōa)长，伊着有偌长。”
“汝即个撇步，对我來講应该無咔cho̍ah，其實我上希望的，是會當倒落去眠床顶的睏ka睡。”顾燈兮應伊。
“噢，安呢呣soah诚無拄好。”小王子咧咽氣。
“诚無拄好。”顾燈兮绁一句，“哦，gâu早。”
就安呢，路燈佫再禁熄......
小王子佫再继续伊的旅行，即擺，伊心肝内咧想：
“即个顾燈兮，定著会互hiah-ê 国王啦、風龟神兮啦、酒鬼猶佫大生理侬看無目地。呣佫，kan-taⁿ伊bōe 互我感覺可笑。這hoān-sè 是因为伊所关心的呣是伊家己。
小王子又佫嚥一口氣，伊对家己讲：
“本然，伊应該是我唯一会当做伙交陪的朋友。可惜，伊迄粒星球實在伤过细，两个儂根本tòa bōe 落…”
實际小王子是無勇气來承认：伊是咧留恋迄粒"儕侬呵咾(o-ló)少儂嫌"的星，特别是伫hia，二十四点钟著有法度看着一千四百四十擺日落山!
第15部
第六粒行星，看勢嗳比第五粒咔大成十倍。顶面tòa 一个老先生，他綿精(mî-chiⁿ)咧寫一抱(chi̍t-phō)册，一抱大部頭的册。
“喲(iŏh)！一個探险家來也(a)。”老先生看著小王子來遘，見面(kìⁿ-bīn/即時)着來咧相借问。
小王子揀一垛(tè)椅頭仔，坐tòa 桌仔邊，那咧喘大氣。伊已經行真久真久也！
“汝tùi叨位來的？”老先生问小王子。
“即本册hia大本，是啥货？汝咧創啥？”小王子倒問伊。
“我是地理学家。”老先生先應(ìn)伊。
“啥物號做地理学家？”
“地理学家，着是一种学者，伊瞭解叨位仔有海，叨位仔有溪、有城市、大山，抑是講沙漠。”
“這佫是不止仔趣味neh！”小王子講，“像這呣才有算正經頭路！”伊那講那越頭(oa̍t-thâu)四界bāi、四界看。伊從來呣捌看过chiah-ni̍h仔大的行星。
“汝即个所在诚súi neh！遮有海無？”
“这我無了解。”地理学家讲遘。
“喲！”小王子诚失望。“Ah無...有大山無？”
“这，我無了解。”
“若安呢，遮有城市、溪仔、抑是沙漠無？”
“这，我照原無了解。”
“無..汝佫講汝是地理學家？！”
“規欉好好——無错(剉)，”地理学家应讲，“不而过我呣是探察家，ah我暫時嘛無即款骹数(kha-siàu)。地理学家是無咧计算hit- lō城市、江河、大山、海洋抑是沙漠。地理学家诚重要，呣好四界抛抛走。伊bōe 使(bōe-sái)离开伊的办公室。不而过伊聽好(thèng-hó)伫办公室接見探察家。伊聽好斟酌询问hiah-ê探察家，共in 的回憶记载落下。假使伊認為某物侬的回忆有价值，安呢伊着會想卜调查对方的德行(tek-hēng)。”
“这是為啥物？”
“设使探察家若講白贼，寫出來的地理册定着会造成严重的後果，有可能是災难！佫有，爱食酒的探察家嘛共款嗳共(kā)調查。”
“这是為啥物？”
“酒醉误大事啊，本然是一个儂，互伊看做两个儂。遘尾仔，明明kan-taⁿ是一座山，soah變記做两座山。”
“我有熟似(se̍k-sāi)一个侬，若是叫伊做探察，伊稳当無够格。”小王子讲。
“有可能。所以讲，假使汝感覺一个探察家德行bōe 歹，安呢汝着会使去调查伊发現着的物件。”
“汝是讲，叫伊chhōa汝去看呣？”
“無no·h，安呢伤费氣。不而过汝会使叫探察家提供证据。比論講，设使伊发现一座大山，汝着嗳交代伊扎(chah)一寡仔石頭轉來。”……
……地理学家雄雄soah伫hia咧車東車西，呣知咧無閒啥。
“拄仔好，汝敢呣是拄拄按真遠真遠的所在來的！你着是探察家！來，汝紧共(kā)恁星球的情形介紹互我聽！”地理學家卜请小王子鬥相共(tàu-saⁿ-kāng)。
就安呢，地理学家chhiau出伊的笔记簿，又佫來咧削铅笔。伊定定先用铅笔记录一个初胚(chho·-phoe)，等待探察家提供证据了後，才佫用烏墨水正式共记录起來。
“啥物情形？”地理学家开始來咧问。
“Hăⁿ！阮hia噢...”小王子讲遘，“嘛無算啥啦，阮hia，所在诚细。我有三座火山，两座活的，一座死的。不而过，喙講‘死的’，其實嘛無一定啦。”
“無呣著。”地理学家oân仔同意小王子的看法。
“我佫有一蕊花。”
“噢，阮是無咧记录花草的。”地理学家共伊讲。
“這是為啥物？敢讲汝呣知影花是hiah-ni̍h 仔súi。”
“因为花真紧着會lian去，花的生命真短暂。”
“啥物號做短暂？”
“地理册是通世间所有的册本当中，上kài严肃的一种。”地理学家讲，“这款册是永遠bōe 过时的。真少有山咧徙位(sóa-ūi)，嘛真少有海水會凋(ta)去。阮咧寫的是一款永遠的物件。”
“是讲，死火山嘛有可能佫再复活。”小王子抵(tú)伊一句，又佫继續咧問：“啥物是‘短暂’？”
“火山有咧振動、無咧振動，对阮來讲拢共款。”地理学家讲，“阮关心的是有山無山。山的位置bōe 变。”
“呣佫...‘短暂’是啥物意思咧？”小王子问第三擺，伊若提出一个問題，着硬卜問kah清楚。
“意思是講：有可能真紧着會消失去。”
“汝是講我的花真紧着會lian去呣？”
“当然的。”
小王子自言自语來咧念讲：“我的花是短暂的，并且伊kan-taⁿ靠四欉刺咧防身！Ah我佫共(kā)伊孤一个hìⁿ tòa hia！”
这是小王子頭一擺感覺後悔，呣佫伊真紧又佫振作起来：
“汝敢是卜建议我四界去探察？”小王子問伊。
“無呣著，有一个所在，叫做地球，伊是一粒行星，”地理学家应讲，“伊真有名声…”
就安呢，小王子离开地理学家，一路行一路那咧数念(siàu-liām)伊的花。
第16部
第七粒行星，着是地球。
地球實在呣是一粒普通的行星！即搭有一百一十一个国王（烏侬国王定著嗳算在内），七千个地理学家，九十万个实业家，七百五十万个酒鬼仔，三亿一千一百万个"謗風水鷄"……安呢加加算算咧，地球顶上起碼有二十亿个大侬。
為卜互恁逐个对地球的大細有一个基本的概念，我想卜先安呢來共(kā)恁报告一下：人類猶未發明电以前，伫咧地球的六大洲，世间儂為卜点路灯，拢總需要一陣由四十六万二千五百一十一侬组成的队伍。
遠遠仔看去，實在不止仔壯觀。即支隊伍若咧行动，是可比歌剧園咧演芭蕾，是舞kah诚四序。上代先出现的是紐西蘭(新西兰)佮澳大利亚迄搭(hit- tah)的点燈侬。燈若点着(to̍h)了後，in 着随去睏。绁落來，輪着(lîn-kàu)中国佮西伯利亚的点燈侬peh上舞台。了後，in 嘛随覕 (bih)入去幕後。佫來，着輪遘(lîn-kàu)盧西亚(俄罗斯)掺印度国的点燈侬。了後，輪着非洲、欧洲迄角勢的侬。佫紲落去是南美洲，了後輪着北美洲。橫直，逐个拢照顺序來，骹步手路，實在真了不起。
北极hia kan-taⁿ一葩燈niā，南极迄爿嘛是共款；呣过，只有即两个所在的点灯侬，生活上kài轻松、快活：in 一年kan-taⁿ工作两擺。
《小王子》第１７部～第２７部（結尾）