October 26, 2006

候時機

「台灣閩南語羅馬字拼音方案」（簡稱“台羅”／TL）。
「……閩南語言與文化是臺灣寶貴的資產，為了傳承，整合一套實用適寫的標音方式，是社會各界及母語教學現場師生長期的期待。而各拼音系統經過多年的辯證，教育部通過並公告「台灣閩南語羅馬拼音方案」，在兼顧拼音系統標準化與尊重其他版本之原則下，終為閩南語拼音系統爭議畫下句點……」（——教育部國語會）
真真正正，“台羅”生做圓抑扁，是緣投，抑是怯勢；是躼跤，抑是矮肥，咱猶未驗明正身，呣敢烏白thi̍h、亂姿hōe。不而過，聽咧講伊佮白話字（POJ）生做共面（kāng-bīn）共面。總是，對著即个濫血的紅嬰仔，咱嘛真心向望（ǹg-bāng）伊 歹竹出好筍，會通（ē-thang）有好枝骨、好面貌，gâu大漢，佫會健身（kiāⁿ-sin）。

我從（chêng）會曉寫閩南文遘taⁿ，獨獨POJ niā，無別物（pa̍t-mi̍h）。講我封建也好，講我老古板、蠻柴頭（bōe曉 tè時行）也罷，橫直 我是憶著（it-tio̍h）這 舊籠床（lâng-sn̂g）好炊粿，舊柴頭好燃火（hiâⁿ-hé），ah 臨當時（liâm-tong-sî）喝（hoah）講卜換，無定（bô-tiāⁿ）soah 會起礙瘧（ngāi-gio̍h）。一个儂慣勢做啥物代誌，有時仔真正oh得改變，這可比是 和尚划船（kò-chûn）——無髪渡（無法度）的代誌。

卜論真講，白話字是佇咱廈門生根puh-íⁿ的，是ùi福建湠出去的。我是福建儂，加減嘛是會惜略（sioh-lio̍h），佫咔 莫講（bo̍h-kóng）chêng-kah-taⁿ 咱是hiah-ni̍h-á 死忠。雖然，即mái佇福建看bē著POJ 啊（死kah無身屍、無骨灰啊～:p……即mái 差不多攏台灣儂咧變弄（pìⁿ-lāng）即號古董），總是，三魂七魄猶未全散。

先mài 講伊是帶（tài）著啥物目的來遘人世間，bak著偌儕“政治家”的跤癬手液（chhiú-sio̍h）？我kan-ta知影“台羅”呣是佇咱福建出世的，伊無食過咱的水，互咱感覺生份生份、礙瘧礙瘧，bē親著是bē親，he bē hau-siâu咧。

不而過，話bē-ēng講siuⁿ過頭，文化的物件，著親像是hit-lō甕底酒，囥愈久是愈芳（phang）。將心比心照實講，往當時（éng-tang-sî），白話字嘛是帶著任務來出世的。

無的確，此去 我嘛會換寫台羅。不而過，台羅 未 徛tiâu跤 進前，我bē放捒白話字。

Posted by limkianhui at 天空部落 │19:07:30 │ 回應(2) │ 引用(0) │言語文字
回頁首▲