不留名山寨

今日不留名终於軆會到原來Masjid James地鐵站的确喺一個卧虎藏龍嘅地方，點解？因為個個落得嚟呢喥都講得上係身懷絕技吖...皆因不留名已响呢嗰龍蛇混雜中与不少高手過招，今日不留名更敗俾幾名使出慢版乾坤大娜移嘅女中豪傑吖...講出嚟真喺笑爆同道中人嘅口吖...唉...失敗也！
當回看呢啲身懷絕技武林高手所使出嘅絕技之中，而能够令不留名大開眼界嘅絕世武功就可以列為以下呢幾招：-

第一絕：死攝爛攝功
此絕常運用於列車門口，即係當眼前已冇晒位嘅時候...而咁啱又有區區個一尺夹六吋位嘅嚹俾啲所謂女中豪傑睇上咗之後...你就有機會目睹此絕！睇佢哋點使出呢式「死攝爛攝」，呢一絕的确好犀利...並非凡凡之輩吖。如果你錯過就嘥料！

第二絕：雄厚嘅内功
此絕常運用於列車門口，亦即係當眼前已冇晒位嘅時候...啲高手就會浑身發功，逼出軆内股内力將你震到尺幾遠去...輕則俾夹一夹，重則内傷！

第三絕：哼功地上飄，又稱之為「攝青鬼無影腳」
此絕常用於上列車嗰一刻，一般啲高手睇到入口有少少混亂時就會使出呢一絕喇。响電光火石之間...啲高手就由遠處一飄就飄到你眼前...好鬼犀利！

第四絕：霹雳迷煙功 *此絕乃發現於無名大侠
此絕適用於列車内外每一刻，此絕就有如啲身穿夜行衣响瓦頂穿梭啲飛賊所放啲迷晕煙咁，非常之毒辣！而此絕萬萬不能學...否則终生後悔吖...事關此絕係會与习者二合為一軆嘅絕學，係極之入骨！不留名都係奉勸大家都係唔好眷戀此門絕學。

第五絕：打狗棒法
如果唔想與各路人馬閗個你死我活而落到列車内又想舒舒服服有個位坐嘅話...照咁睇嚟，你必定好使出丐幫洪七公幫主嘅「打狗棒法」咗。此絕非常犀利，而且又適用於任何一刻...既可以打狗棒自保亦可以用打狗棒殺敵。就好似打狗棒法第一式咁，“棒打雙犬腳”（即係將手中黑白棒左右晃動兼喺咁叉地）。只可惜此絕不易學，需要黑白棒一枝同雙眼要向上一反...咁先至講得係發揮得淋漓盡致吖！

單係呢LRT五絕...不留名已甘拜下風。佩服！佩服！