下港的風‧詩響起

入冬了後
大樹的山坪老了
高屏溪嘛偆一條線索
通探查玉山的底細

只有予展翅的
斜張橋護衛的
佛光山大佛
以四季無變的笑容
塊斟酌遠遠的舊鐵橋
嘛塊觀照佇高屏橋頂
來來去去的芸芸眾生

佇淡薄仔生冷的溪風中
玉荷包睏去矣
17號仔王梨嘛隱遁去矣
所有秋天的故事
攏逢收藏起來矣
但是，大樹的塗跤底
煞有一種規律的振動
千軍萬馬

聽講，是塊等待
開春後的第一滴
汗

原刊佇《台文戰線》第13號 
2008年教育部文藝創作獎特優獎作品

【註解】

兩三百年來       
月光山照顧的
是一齣單單純純的
春夏秋冬
田園飽淀的稻穗
是伯公發酵的
一款虔誠
風姨所唱的
攏是客家硬頸的曲調

浸佇緣分內底的油紙傘
用美濃的山山水水
四界發聲
穿佇藍衫內面的阿婆
一針一線塊掭老故鄉的心悶
泅過粿仔佮豬跤的嘴唇
無分人客抑是客人
只有加添相思的次方

雙溪的蝴蝶是原鄉人
流動的情話
聲聲句句攏收藏佇
朝元寺的鐘聲內底
三不五時仔，會順雙溪的溪水
灌溉這片略略仔躊躇的土地

回頭的時，歸千斤的感動
攏有摻著山歌歡喜的目屎
酸酸鹹鹹是美濃正港的口味

原刊佇《台文戰線》第13號 
2008年教育部文藝創作獎特優獎作品

【註解】

飽淀：飽滿。
伯公：美濃人對土地公的稱呼。
掭：thinn7 縫補。
粿仔：粄條。

枝仔冰城的城牆
予歲月撞著
記池的磚仔角
落甲老街滿四界

清擱脆的聲音
是日本大人佇酒樓唱的軍歌
是五分仔火車奏出來的望春風
是阿亮叔仔佇一江山的結婚進行曲

時間和旗山溪水走相逐
老街佮歷史塊喝酒拳
毋管輸贏
新世紀的五花十色
一步一步湠入來
但是，染袂掉媽祖廟邊的
臭豆腐佮綠豆湯所滋養的青春

徛佇十字路口的舊火車站
是旗山上大的徘徊
伊的命運攏綴老街
浮浮沉沉
只有圓拱形的石亭仔跤
以堅實的弧度
共旗山圓一半

另外一半
著聽候遊客的嘴角來
圓

原刊佇《台文戰線》第13號 
2008年教育部文藝創作獎得獎作品

【註解】

──以雙園大橋所見為例

夜空是一份上新的暗報
佇讀無半粒星的暗暝
跨過大武山的月
是盈暗的頭條新聞
所有讀過頭條新聞的
溪埔佮田園
攏開始議論紛紛

林園工業區
以千千萬萬的閃熾
掩崁伊無暝無日的
踳踏

月光繼續沿高屏溪水
一步一步欲泅轉去玉山
留幾條仔光絲佇汕尾出海口
塊搵台灣海峽的風

菅芒花綴夜蟲的節奏
搖搖擺擺
塊複習秋天的發展史

雙園大橋頂
一台無閒歸日的貨車
載歸車斗的月色
趕欲轉去和厝裡的人
分享

等待露水化開的心情
敢會是明仔再日報的頭條