鹭水芗南－闽南语部落

《一隻鳥仔吼lê-lê》（闽南囡仔歌）

Fri, 14 Apr 2006 12:51:47 +0800

☆★☆ 本文二條囡仔歌，頭一條流傳佇福建漳州龍海市；第二條流傳佇台灣的宜蘭。小等一下，咱咧念歌的時陣，全部beh用即兩个所在的腔口來念。

一、漳州龍海的囡仔歌：《庵蜅蠐，吼lê-lê》

Am-pó·-chê, háu-lê-lê, háu beh kè.
庵蜅蠐，吼lê-lê，吼卜嫁。
（蟬寶寶，哭哭啼，哭訴要嫁人）

Kè tá-lo̍h ? Kè chhiâng-chhiū-á-bóe.
嫁tá落？嫁榕樹仔尾。
（嫁哪裡？嫁榕樹梢。）

Chhiâng-chhiū-á-bóe bô hóe-hun, kè chiang-kun.
榕樹仔尾無火薰，嫁將軍。
（榕樹梢沒人煙，只好嫁將軍。）

Chiang-kun bô le̍k-tāu, kè-tio̍h hāu.
將軍無綠豆，嫁着鱟。
（將軍無綠豆，只好嫁鱟魚。）

Hāu beh thâi, kè siù-châi.
鱟卜刣，嫁秀才。
（水鱟將被宰，只好嫁秀才。）

Siù-châi beh lin-long, kè sai-kong.
秀才卜玲瓏，嫁司公。
（秀才要四處轉悠，只好嫁道士。）

Sai-kong beh liām-keng, kè-tio̍h leng.
司公卜念經，嫁着奶。
（道士要念經，又嫁給乳房。）

Leng beh chūiⁿ, kè-tio̍h nūi.
奶卜chūiⁿ，嫁着卵。
（乳房要給人家吸，只好又嫁給蛋。）

Nūi beh tok, ti-á phah-lok-sok.
卵卜啄，豬仔拍橐束。
（蛋將欲破殼，一隻豬四腳被束縛。）

二、台灣宜蘭的囡仔歌：《一隻鳥仔，吼lê-lê》

Chi̍t-chiah chiáu-á háu-lê-lê, háu beh kè.
一隻鳥仔，吼lê-lê，吼卜嫁。
（一隻鳥仔，哭哭哭啼啼，哭着說嫁人。）

Kè tó-ūi ? Kè chhiū-bóe.
嫁tó位？嫁樹尾。
（嫁何方？嫁樹梢。）

Chhiū-bóe bô hóe-hun, kè ian-thun.
樹尾無火薰，嫁鵪鶉。
（樹梢無人煙，嫁給鵪鶉。）

Ian-thun bô âng-tāu, kè chúi-hāu.
鵪鶉無紅豆，嫁水鱟。
（鵪鶉無紅豆，嫁鱟魚。）

Chúi-hāu hái-lāi siû, kè siā-liû.
水鱟海裡泅，嫁謝榴。
（鱟魚海底遊，只好嫁石榴。）

Siā-liû beh kiat-chí, kè niáu-chhí.
榭榴卜結籽，嫁鳥鼠。
（石榴將欲結果，只好嫁給老鼠。）

Niáu-chhí beh ó·-khang, kè hō· tiò-hî-ang.
鳥鼠卜摀空，嫁互釣魚翁。
（老鼠欲挖洞，只好嫁給翡翠鳥。）

Tiò-hî-ang beh tiò-hî, kè hō· chiuⁿ-chî.
釣魚翁卜釣魚，嫁蟑蜍。
（翡翠鳥欲釣魚，只好嫁給蟾蜍。）

Chiuⁿ-chî beh sahⁿ-báng, kè chhek-tháng.
蟑蜍卜趿蠓，嫁粟桶。
（蟾蜍欲捉蚊子，只好嫁給盛穀桶。）

Chhek-tháng beh kek-chiú, kè sàu-chhiú.
粟桶卜激酒，嫁掃帚。
（穀桶欲釀酒，只好嫁給掃帚。）

Sàu-chhiú beh sàu-tè, kè hō· bē-cha̍p-sè.
掃帚卜掃地，嫁互賣雜細。
（掃帚欲掃地，只好嫁給賣雜貨郎。）

Cha̍p-sè beh lin-long, kè sai-kong.
雜細卜玲瓏，嫁司公。
（雜細欲四處走動叫賣，只好又嫁道士。）

Sai-kong beh liām-keng, kè hō· leng.
司公卜念經，嫁互奶。
（道士欲念經，只好嫁給乳房。）

Leng beh chūiⁿ, kè hō· nūi.
奶卜chūiⁿ，嫁互卵。
（乳房要吸，只好嫁蛋蛋。）

Nūi beh tok, kè hō· khan-ti-ko-á-peh.
卵卜啄，嫁互牽豬哥仔伯。
（蛋蛋欲破殼，嫁給牽種豬接種的老大伯）

〖講解〗

這是流傳佇我的家鄉，福建漳州龍海市白水鎮即箍le̍h仔的一條囡仔歌，佫另外一條是流傳臺灣宜蘭hit爿的囡仔歌。即款的囡仔歌，攏是咧kâng講：一隻庵蜅蠐（蟬）大漢了後，吼卜嫁翁，嫁伊也呣得，嫁伊呣得，嫁來嫁去，嫁kah卌八嫁，嫁攏無儂ti̍h。

往過，佇hit 款農業社會的時代，逐个攏真散，所趁無儕，iah厝裡底的囡仔頭喙，有噹時仔一下儕，也beh食，也beh穿，佫beh開用，上蓋操煩的往往是厝裡底的序大儂，講一句咔無哺舌的，真正有影頂頓食了無下頓，早頓食了等下昏，食kah強卜吊鼎，一家夥仔散kah鬼卜掠去。厝裡窮赤，序大儂儉腸neh肚，日操暝做，攏是為著一家夥仔大細有一喙飯通好食。做囡仔的儂，細漢呣捌代誌，猶佫 bōe當體會着父母的辛苦，透早出門溜溜去，chhit-thô kah夠氣夠氣，chiah有想beh倒轉來。Hit 陣的囡仔，攏顧in兩支跤，無咧顧時頓。無通食，顧chhit-thô，十个囡仔九个sán-pi-pa，chhun一个餓死佇咧眠床跤。散赤囡仔，佇外口看儂食鉸剪糖啦、糖含仔啦，是giàn kah 流口瀾，走轉去厝兮kô阿爸阿母、阿公阿嬤，講伊也卜食啦。卜食啥？厝裡chiah散，ah是卜tó生？咔kô嘛是無路用，遘尾仔嘛是「棕蓑蝴蠅——食毛（食無）」。無通食，我着吼互汝看。吼，是囡仔上蓋gâu的撇步。大儂nā咔軟心的，看bē做得，着凊採iam一半角銀仔互伊去；ah無着是據在伊囡仔去吼，管汰伊卜吼kah tī 時。囡仔nā吼，攏嘛吼真久，吼kah伊過giàn chiah會靜（chēⁿ）。Nā是hit-lō諸姥囡仔愛吼，厝邊兜的儂看著，着kā伊「啾啾啾」，笑伊講重食兼愛哭，別日嫁翁嫁無儂ti̍h；ná kā伊笑，着ná念「庵蜅蠐，吼gê-gê，吼卜嫁」即條歌來kā 詼（khoe）、來kā keng-thé。愛哭的囡仔看儂咧kā笑，會畏見笑，着趕緊激tiām-tiām，呣敢佫做聲。

圓仔花（閩南·囡仔歌）

Thu, 13 Apr 2006 12:17:44 +0800

☆☆☆即篇「囡仔歌」是用同安腔⁰念的。

îⁿ-á-hoe, chhiò-bi-bi, chhiò lú chheng-chhun bô-liáu-sî.
圓仔花¹，笑眯眯，笑汝青春無了時²。

Ū kiō pàng-lâi chē, ū bé khan-lâi khiâ.
有轎放來坐，有馬牽來騎。

Bé-oaⁿ kòa chiūⁿ-soaⁿ, bé-bé moa kim-oaⁿ.
馬鞍挂上山，馬尾幔³金鞍。

Tâng-oaⁿ-siâⁿ, hō· lín cha-bó·-á chòe-chhin-chiâⁿ.
同安城，互恁諸姥仔⁴ 做親情⁵。

Chòe tó-lo̍h ?
做叨落⁶？

Chòe tōa-lō·.
做大路。

Tōa-lō· lâng thâi-tu, sió-lō· lâng thâi-iûⁿ.
大路儂刣豬，小路儂刣羊。

Phah-lô phah-kó· tán sin-niû.
拍鑼拍鼓娶等新娘。

Sin-niû hō· hé-sio, kiáⁿ-sài poa̍h-lo̍h kiô.
新娘互火燒，囝婿跋落⁷橋。

Kiô chi̍t-khih, ku kā pih.
橋一缺，龜咬鱉。

Pih lun-thâu, sih-sut kā tō·-kâu.
鱉圇頭⁸，蟋蟀咬杜猴⁹。

Tō·-kâu pak-tó· chi̍t-le̍h.
杜猴腹肚一裂¹⁰。

Tāu-hū chú tāu-che.
豆腐煮豆渣。

Tāu-che iù-boa̍h-boa̍h, chia̍h-tio̍h chiâⁿ khoàⁿ-oa̍h.
豆渣幼末末¹¹，食着誠¹²快活！

〖注解〗（普通話）

0、同安腔：界於泉州腔和廈門腔的一種閩南語口音。同安，舊時是屬泉州府管轄的一個縣，中華人民共和國政府成立後，劃歸廈門市管轄，並於1990年代中後期撤縣改區。同安腔的閩南語，分佈範圍主要是：同安區、翔安區、集美區、金門縣以及東南亞一帶，此外，在台灣西海岸新竹一帶也可尋到同安腔的遺音。同安腔，聲母一如泉州腔、廈門腔，即沒有/dz/；元音也沿襲泉腔，有/ɯ/（台灣學者常標為/ɨ/）、/ə/。同安腔雖聲、韻母與泉腔類似，不過，其聲調及變調規律，整體而言還是偏漳多一點，但泉腔的痕蹟也相當明顯。同安腔有一個十分個性化的標志，一些在廈門腔讀
為/iŋ/、/iam/、/ian/的，同安腔的白讀音，都讀成鼻化韻/ãĩ/，比如：閒、前、還、筅、店、殿、蓮……

1、圓仔花：生長於南方，一種四季常有的花草，小小株，花瓣小小的（大概兩三公分大的直徑），紅紅圓圓的。閩南人嫁娶的時候，常拿它作為一種隨嫁襯物。

2、無了時：沒指望、不會有結果。

3、幔：當動詞用，是指「披挂」；當名詞用，是指「大衣、外套」

4、諸姥仔：cha-bó·-á，泉州與同安話，指「女兒」，即廈門話的「諸姥囝」（chá-bó·-kiáⁿ），漳州話的「cháu-á」（此仍「諸姥囝」三字的合音），金門和台灣也有念成「chó·-kiáⁿ」(這也是「諸姥囝」三字的另一種合音)。

5、做親情：chòe-chhin-chiâⁿ，說親。

6、叨落：tó-lo̍h，也說「tó位」，指「何處」，閩南本土廈漳泉三地都有這一說法，不過，台灣罕見。不過，漳州讀為「tá-lo̍h」或「tá位」。

7、跋落：跌入。

8、圇頭：縮頭。

9、杜猴：即螻蛄，屬於蟋蟀的一種，但在閩南語中，蟋蟀和杜猴是不能混用的，見下圖。

圖1、圖2 是「杜猴」

圖3、圖4是「蟋蟀」

10、一裂：chi̍t-le̍h，指一道長長的傷口。

11、幼末末：iù-boa̍h-boa̍h，磨得很細、成粉末狀。

12、誠：chiâⁿ，很。

眠床因何會叫歌（閩南·囡仔歌）

Wed, 12 Apr 2006 13:30:43 +0800

Tō·-ún pê nńg-soa, in-hô i káⁿ ē kiò-koa ?
杜蚓¹爬軟沙, 因何伊敢會²叫歌？

Tō·-ún i sī sin-io tn̂g, sin-io nńg, i chiah ē kiò-koa.
杜蚓伊是身腰長，身腰軟，伊才會叫歌。

Chhân-ni ā-sī sin-io tn̂g, sin-io nńg, in-hô i káⁿ bōe kiò-koa ?
田蛉³也是身腰長，身腰軟，因何伊敢bōe 叫歌？

Chhân-ni i sī la̍k-kha kah sì-si̍t, i chiah bōe kiò-koa.
田蛉伊是六跤佮四翼，伊才bōe 叫歌。

Am-pó·-chê ā-ū la̍k-kha kah sì-si̍t, in-hô i káⁿ ē kiò-koa ?
庵蜅蠐⁴也有六跤佮四翼，因何伊敢會叫歌？

Am-pó·-chê i sī pak-tó·-ē chi̍t-ê chhùi, i chiah ē kiò-koa.
庵蜅蠐伊是腹肚下一个喙，伊才會叫歌。

Mô·-hōe ā-sī pak-ē chi̍t-ē chhùi, in-hô i káⁿ bōe kiò-koa ?
毛蟹也是腹下一个喙，因何伊敢bōe 叫歌？

Mô·-hōe i sī chúi-lāi phû, chúi-lāi tîm, i chiah bōe kiò-koa.
毛蟹伊是水裡浮，水裡沉，伊才bōe 叫歌。

Chhân-kap-á iā-sī chúi-lāi phû, chúi-lāi tîm, in-hô i káⁿ ē kiò-koa ?
田蛤仔⁵也是水裡浮，水裡沉，因何伊敢會叫歌。

Chhân-kap-á i sī chhùi khoah si̍t-táu tōa, i chiah ē kiò-koa.
田蛤仔伊是喙闊食斗⁶大，伊才會叫歌。

Chúi-kng iā-sī chhùi khoah si̍t-táu tōa, in-hô i káⁿ bōe kiò-koa ?
水缸也是喙闊食斗大，因何伊敢bōe 叫歌？

Chúi-kng i sī thô· lâi chòe, hóe-lāi sio, i chiah bōe kiò-koa.
水缸伊是土來做，火裡燒，伊才bōe 叫歌。

Thô·-pi-á iā-sī thô· lâi chòe, hé-lāi sio, in-hô i káⁿ ē kiò-koa ?
土嗶仔⁷也是土來做，火裡燒，因何伊敢會叫歌？

Thô·-pi-á i sī nn̄g-khang sio-lāng-thang, i chiah ē kiò-koa.
土嗶仔伊是兩空相弄通⁸，伊才會叫歌。

Tek-hé-kńg iā-sī nn̄g-khang sio-lāng-thang, in-hô i káⁿ bōe kiò-koa ?
竹火管⁹也是兩空相弄通，因何伊敢bōe 叫歌？

Tek-hé-kńg i sī tek lâi chòe, chàu-tóe pûn, i chiah bōe kiò-koa.
竹火管伊是竹來做，灶底pûn，伊才bōe 叫歌。

Phín-á iā-sī tek lâi chòe, lâng lâi pûn, in-hô i káⁿ ē kiò-koa ?
品仔¹⁰也是竹來做，儂來pûn，因何伊敢會叫歌？

Phín-á i sī ti̍t-liu-liu, ū chǹg-khang, i chiah ē kiò-koa.
品仔伊是直溜溜，有鑽空，伊才會叫歌。

Tâng-hoe-chiam iā-sī ti̍t-liu-liu, ū chǹg-khang, in-hô i káⁿ bōe kiò-koa ?
銅花針也是直溜溜，有鑽空，因何伊敢bōe 叫歌？

Tâng-hoe-chiam i sī tâng lâi chòe, bô khang sio-lāng-thang, i chiah bōe kiò-koa.
銅花針伊是銅來做，無空相弄通，伊才bōe 叫歌。

Tâng-tōa-lô ā-sī tâng lâi chòe, in-hô i káⁿ ē kiò-koa ?
銅大鑼也是銅來做，因何伊敢會叫歌？

Tâng-tōa-lô i sī lâng lâi kng, lâng lâi khà, i chiah ē kiò-koa.
銅大鑼伊是儂來扛，儂來撽¹¹，伊才會叫歌。

Nńg-chóa-chîⁿ iā-sī lâng lâi kng, lâng lâi khà, i káⁿ bōe kiò-koa ?
軟紙錢¹²也是儂來扛，儂來撽，伊敢bōe 叫歌？

Nńg-chóe-chîⁿ i sī chóa chòe--ê, lâng kô·--ê, i chiah bōe kiò-koa.
軟紙錢伊是紙做的，儂糊的，伊才bōe 叫歌。

Hong-chhe-lián iā-sī chóa chòe--ê, lâng kô·--ê, in-hô i káⁿ ē kiò-koa ?
風吹輾¹³也是紙做的，儂糊的，因何伊敢會叫歌？

Hong-chhe-lián i chia̍h poàⁿ-thiⁿ-hong, i chiah ē kiò-koa.
風吹輾伊食半天風¹⁴，伊才會叫歌。

Tang-sai-thah ā chia̍h poàⁿ-thiⁿ-hong, in-hô i káⁿ bōe kiò-koa ?
東西塔¹⁵也食半天風，因何伊敢bōe 叫歌？

Tang-sai-thah i sī chio̍h chòe--ê, i chiah bōe kiò-koa.
東西塔伊是石做的，伊才bōe 叫歌。

Chio̍h-cheng-khū ā-sī chio̍h chòe--ê, i káⁿ ē kiò-koa ?
石舂臼也是石做的，伊敢會叫歌？

Chio̍h-cheng-khū i sī kun ta̍h niû chhio̍k, i chiah ē kiò-koa.
石舂臼伊是君踏娘chhio̍k¹⁶，伊才會叫歌。

Chhâ-lâu-thui iā-sī kun ta̍h niû chhio̍k, in-hô i káⁿ bōe kiò-koa ?
柴樓梯也是君踏娘chhio̍k，因何伊敢bōe 叫歌？

Chhâ-lâu-thui sī chhâ chòe--ê, i chiah bōe kiò-koa.
柴樓梯是柴做的，伊才bōe 叫歌。

Chhâ-bîn-chhn̂g iā-sī chhâ chòe--ê, i káⁿ ē i̍h-oa̍ihⁿ-si̍h-soa̍ihⁿ leh kiò-koa ?
柴眠床¹⁷也是柴做的，伊敢會 i̍h-oa̍ihⁿ-si̍h-soa̍ihⁿ ¹⁸咧叫歌？

Chhâ-bîn-chhn̂g i ū kun lám niû, niû lám kun, tī-leh i̍h-oa̍ihⁿ-si̍h-soa̍ihⁿ, m̄ chiah-ē kiò-koa !
柴眠床伊有君攬娘，娘攬君，佇咧 i̍h-oa̍ihⁿ-si̍h-soa̍ihⁿ，呣才會叫歌！

〖注解〗（普通話）

1、杜蚓：/tɔ²² un⁵³/，蚯蚓。
2、敢會：/kã⁵³ e²²/，怎麽能。敢bōe：/kã⁵³ bue²²/，怎不能。
3、田蛉：/tsʰan²⁴ ni⁴⁴/，蜻蜓。
4、庵蜅蠐：/am⁴⁴ po⁵³ tse²⁴/，蟬。龍海腔讀為/am⁴⁴ po⁵³ tsɛ²⁴/，其中「庵」，一般寫為「虫+奄」；「蠐」實際也非本字，因為龍海腔（漳州話）讀/ tsɛ²⁴/，可見「蠐」並非本字，該字疑為擬聲詞，即蟬的叫聲「/ tsɛ²⁴/」，漢字無妨寫為「喳」。
5、田蛤仔：/tsʰan²⁴ kap³² a⁵³/，青蛙。
6、食斗：/sit⁴ tau⁵³/下巴，一般用於動物。
7、土嗶仔：/tʰɔ²⁴ pi⁴⁴ a⁵³/，陶笛。
8、相弄通：/sio⁴⁴ laŋ²² tʰaŋ⁴⁴/，相通。
9、竹火管：/tik³² he⁵³ kŋ⁵³/，竹制火管，舊時伙房燒飯時用來吹旺爐火的工具。
10、品仔：/pʰin⁵³ a⁵³/，笛子。
11、撽：/kʰa²¹/，敲、打。
12、紙錢：/tsua⁵³ tsĩ²⁴/，紙錢、冥紙。
13、風吹輾：/hɔŋ⁴⁴ tsʰe⁴⁴ lien⁵³/，一種仿小風車的玩偶。
14、半天風：/pũã²¹ tʰĩ⁴⁴ hɔŋ⁴⁴/，半空中刮過的風。
15、東西塔：/taŋ⁴⁴ sai⁴⁴ tʰaʔ³²/，泉州【開元寺】，寺中有兩座世界最大的石塔，一東一西，當地稱為「東西塔」，建於宋代。
16、chhio̍k：/tsʰiɔk⁴/，踩踏。
17、眠床：/bin²⁴ tsʰŋ²⁴/，床。
18、i̍h-oa̍ihⁿ-si̍h-soa̍ihⁿ ： /iʔ⁴ ũãĩʔ⁴ siʔ⁴ sũãĩʔ⁴/，擬聲詞，指物件拼接不牢靠，發生吱哩呱啦的聲響。

白翎鷥（閩南·囡仔歌）

Tue, 11 Apr 2006 13:16:27 +0800

白翎鷥（一）／ PE̍H-LĒNG-SI¹

Pe̍h-lēng-si, taⁿ pùn-ki, taⁿ kàu káng-piⁿ ke-á-kîⁿ.
白翎鷥，擔畚箕，擔遘港邊溪仔墘。

Poa̍h-chi̍t-tó, khioh chi̍t-chîⁿ.
跋一倒，抾一錢。

Bé tōa-piáⁿ, pun tōa-î.
買大餅，分大姨。

Tōa-î hiâm bô-lōa.
大姨嫌無偌²。

Kho·-ke kho·-káu lâi chiù-chōa.
呼雞呼狗來咒誓³。

Chiù-chōa ū, phah sin-pū; chiù-chōa bô, phah chím-pô.
咒誓有，拍新婦⁴；咒誓無，拍嬸婆。

Chím-pô háu, khì chhōe káu.
嬸婆吼⁵，去chhōe狗。

Káu leh pūi, chhōe bô ta̍h-tùi.
狗咧吠，chhōe無踏碓⁶。

Ta̍h-tùi hó cheng-bí, chhōe bô í.
踏碓好舂米，chhōe無椅。

Í leh chē, chhōe bô phōe.
椅咧坐，chhōe無被。

Phōe leh kah, chhōe bô ah.
被咧蓋，chhōe無鴨。

Ah leh thâi, chhōe bô chek-tâi.
鴨咧刣，chhōe無燭臺。

Chek-tâi chò tùn-pâi, ji̍p-chhù chò lô·-châi.
燭臺做盾牌，入恁厝做奴才。

Pn̄g lí chia̍h, hiâm bô-gia̍h.
飯汝食，嫌無額⁷。

Tê lí lim, hiâm chhàu-phòa.
茶汝啉，嫌臭破⁸。

Í lí chē, poa̍h chi̍t-ē.
椅汝坐，跋⁹一下。

白翎鷥（二）

Pe̍h-lēng-si, taⁿ pùn-ki, taⁿ kàu ke-á-kîⁿ.
白翎鷥，擔畚箕，擔遘溪仔墘。

Poa̍h-chi̍t-tó, kioh-tio̍h chi̍t-sián chîⁿ.
跋一倒，抾着一sián¹⁰錢。

Bé tōa-piáⁿ, sàng tōa-î.
買大餅，送大姨。

Tōa-î hiâm bô-lōa.
大姨嫌無偌。

Lia̍h niau lâi chiù-chōa.
掠貓來咒誓。

Chiù-chōa ū, phah sin-pū; chiù-chōa bô, gia̍h tek-ko, lāng lāi-hio̍h.
咒誓有，拍新婦；咒誓無，攑竹篙¹¹，弄鶆鶡¹²。

Lāi-hio̍h poe kòe hái, tiám-hóe sio ti-sái.
鶆鶡飛過海，點火燒豬屎。

Ti-sái chhàu-hiam-hiam, bô iû chú tāu-chhiam, gín-á chia̍h kah siang-thâu-chhiam.
豬屎臭蘞蘞，無油煮豆籤，囡仔食kah雙頭尖¹³。

〖注解〗（普通話）

1、白翎鷥：白鷺、鷺鷥。廈門音pe̍h-lēng-si；漳州音pe̍h-liōng-si。
2、無偌：bô-lōa，不多，沒多少，不太多，份量少。
3、咒誓：chiù-chōa，詛咒。
4、新婦：sin-pū，前字"sin"受後字"pū"聲母"P"的影響，變讀為"sim"。兒媳婦。
5、吼：háu，哭。
6、踏碓：ta̍h-tùi，搗碓，舂米的工具。
7、無額：bô-gia̍h，份量很少，一丁點兒。
8、臭破：chhàu-phòa，味腥、味臭。
9、跋：poa̍h，摔。
10、sián：分，貨幣單位。一sián錢：一分錢。
11、攑：gia̍h，動詞，用手舉、持。
12、鶆鶡：lāi-hio̍h，老鷹，漳州話。泉州、廈門、同安，說為"bā-hio̍h"。弄：挑逗、挑釁。
13、雙頭尖：siang-thâu-chiam，身材瘦削，指營養不良。

刣雞刣鴨，刣牛刣馬（閩南囡仔歌）

Mon, 10 Apr 2006 21:13:07 +0800

Ke ā ke, lâng beh lia̍h lí thâi.
雞啊雞，儂卜掠汝刣。

Thâi góa chò sím-mi̍h ?
刣我做啥物？

Thâi lí m̄ seⁿ-nn̄g.
刣汝呣生卵。

Chi̍t-ji̍t seⁿ chi̍t-pah, nn̄g-ji̍t seⁿ chi̍t-lôa, beh thâi lí thâi ah.
一日生一百，二日生一籮，卜刣汝刣鴨。

Ah iā ah, lâng beh lia̍h lí thâi.
鴨呀鴨，儂卜掠汝刣。

Thâi góa chò sím-mi̍h ?
刣我做啥物？

Thâi lí bē seⁿ-nn̄g.
刣汝bē生卵。

Chi̍t-ji̍t seⁿ chi̍t-pū, nn̄g-ji̍t seⁿ chi̍t-tû, beh thâi lí thâi gû.
一日生一孵，兩日生一廚，卜刣汝刣牛。

Gû ā gû, lâng beh lâi thâi lí.
牛啊牛，儂卜來刣汝。

Thâi góa chò sím-mi̍h ?
刣我做啥物？

Thâi lí m̄ lê-chhân.
刣汝呣犁塍¹。

Téng-khu sī góa lê, ē-khu sī góa pê, beh thâi lí thâi bé.
頂坵²是我犁，下坵是我耙，卜刣汝刣馬。

Bé ā bé, lâng beh lâi thâi lí.
馬啊馬，儂卜來刣汝。

Thâi góa chò sím-mi̍h ?
刣我做啥物？

Thâi lí bē cháu-lō·.
刣汝bē走路。

Téng-lō· sī góa kiâⁿ, ē-lō· sī góa cháu, beh thâi lí thâi káu.
頂路是我行，下路是我走，卜刣汝刣狗。

Káu ā káu, lâng beh lâi thâi lí.
狗啊狗，儂卜來刣汝。

Thâi góa chò sím-mi̍h ?
刣我做啥物？

Thâi lí bē kò·-chhù.
刣汝bē顧厝。

Téng-lo̍h sī góa siú, ē-lo̍h sī góa kò·, beh thâi lí thâi thò·.
頂落³是我守，下厝是我顧，卜刣汝刣兔。

Thò· ā thò·, lâng beh lâi thâi lí.
兔啊兔，儂卜來刣汝。

Thâi góa chò sím-mi̍h ?
刣我做啥物？

Thâi lí m̄ chia̍h-chháu.
刣汝呣食草。

Chia̍h lí chi̍t pùn-ki, chia̍h lí chi̍t pùn-táu.
食汝一畚箕，食汝一畚斗。

〖注解〗（普通話）

1、塍：/tsʰan²⁴/，即「田」。
2、坵：/kʰu⁴⁴/ ,閩南語中表示「一塊田地」的量詞，相當於「塊、片」。
3、落：/loʔ⁴/，閩南語，表示「一座房屋」的量詞，相當於「座」。

雞角仔，咯咯啼（閩南·囡仔歌）

Sun, 09 Apr 2006 14:05:11 +0800

Koe-kak-á, ko̍k-ko̍k-thî.
雞角仔¹，咯咯啼。

Kim-tê-au, gûn-tê-sî.
金茶甌，銀茶匙。

Ko·-tiūⁿ chhōa ko·-î, ko·-î chhiò-bún-bún.
姑丈娶姑姨，姑姨笑吻吻²。

Pe̍h-bí sóe pe̍h-phun, pe̍h-phun lìn-lìn-tńg.
白米洗白潘³，白潘遴遴轉⁴。

Pàng-kiō kng chhiⁿ-, chhiⁿ- m̄-káⁿ chē.

放轎扛親姆⁵，親姆呣敢坐。

Pàng-kiō kng sió-bē, sió-bē kè Choân-chiu.
放轎扛小妹，小妹嫁泉州。

Bóe chiam-soàⁿ, thīⁿ ba̍k-chiu.
買針線，thīⁿ ⁶目睭。

Bóe môa-chî, kô· chhùi-chhiu.
買麻糍⁷，糊喙鬚⁸。

Bóe chháu-oê, tò-khì lín Choân-chiu.
買草鞋，倒去⁹恁泉州。

【注解】（普通話）

1、雞角：公雞。
2、笑吻吻：微微笑、笑眯眯。
3、白潘：淘米後的水，用來喂豬，也叫「鮮米潘（chhiⁿ-bí-phun）」。
4、遴遴轉：團團轉，兜兜轉。
5、親姆：親家姆。
6、 Thīⁿ：縫合。
7、麻糍：糍巴。
8、喙鬚：鬍鬚。
9、倒去：回去，返回，返家。也說「倒轉去」、「轉去」。

啾啾啾（閩南囡仔歌）

Sat, 08 Apr 2006 21:16:41 +0800

Chhiu, chhiu, chhiu...
啾啾啾¹……

A-kong hoat chhiù-chhiu.
阿公發喙鬚。

Keng-chêng bē tāu-iû, tāu-iû phòe kiâm-chiáⁿ.
宮前賣豆油，豆油配鹹chiáⁿ。²

Keng-chêng bē hiuⁿ-piàⁿ, hiuⁿ-piáⁿ so· kah phang.
宮前賣香餅³，香餅酥佮芳⁴。

Keng-chêng bē bí-phang, bí-phang chhè koh tiⁿ.
宮前賣米芳⁵，米芳脆佫甜。

Keng-chêng bē gû-ni, gû-ni ū gû hiàn.
宮前賣牛ni，牛ni有牛hiàn。⁶

Keng-chêng bē ke-kiān, ke-kiān kā bōe tn̄g.
宮前賣雞腱⁷，雞腱咬bōe斷。

Keng-chêng bē iû-pn̄g, iû-pn̄g chin hó-chia̍h.
宮前賣油飯，油飯真好食。

Keng-chêng bē chhâ-kia̍h, chhâ-kia̍h hó kiâⁿ-lō·.
宮前賣柴屐，柴屐好行路。

Keng-chêng bē ah-mô·, ah-mô· bô lâng ti̍h.
宮前賣鴨毛，鴨毛無儂挃⁸。

Keng-chêng bē hoe-ki, hoe-ki hái-lāi siû.
宮前賣花枝⁹，花枝海裡泅¹⁰。

Keng-chêng bē siā-liû, siā-liû ē khui-hoe.
宮前賣榭榴，榭榴會開花。

Keng-chêng bē si-koe, si-koe tōa koh âng.
宮前賣西瓜，西瓜大佫紅。

Keng-chêng bē thô·-lâng, thô·-lâng bí lâi cheng.
宮前賣土礱¹¹，土礱米來舂。

Keng-chêng bē sî-cheng, sî-cheng ē se̍h-kho·.
宮前賣時鍾，時種會踅箍¹²。

Keng-chêng bē cha-bó·, cha-bó· chin khiap-sì.
宮前賣諸姥，諸姥真怯勢¹³。

Keng-chêng bē ku-pih, ku-pih hiâm chho·-phôe.
宮前賣龜鼈，龜鼈嫌粗皮。

Keng-chêng bē hoat-kóe, hoat-kóe sio-kún-kún.
宮前賣發粿，發粿燒滾滾。

Keng-chêng bē bí-hún, bí-hún chhiáⁿ lâng-kheh.
宮前賣米粉，米粉請儂客。

Keng-chêng bē cha̍p-sè, cha̍p-sè ū si-soàⁿ.
宮前賣雜細¹⁴，雜細有絲線。

Keng-chêng bē mī-soàⁿ, mī-soàⁿ liâm koh tn̂g.
宮前賣面線，面線粘佫長。

Keng-chêng bē tōa-tn̂g, tōa-tn̂g chhàu-sái-bī.
宮前賣大腸，大腸臭屎味。

Keng-chêng bē tōa-mī, tōa-mī soah ti-kha.
宮前賣大面，大面撒豬跤。

Ti-kha chham hó·-ka, hó·-ka ē chia̍h-pó·.
豬跤摻虎膠，虎膠會食補。

Keng-chêng bē tōa-kó·, tōa-kó· phong-phong-phong.
宮前賣大鼓，大鼓嘭嘭嘭。

Sûi-lâng pài chó·-kong, chó·-kong ū lêng-siàⁿ, pó·-pì tn̂g sèⁿ-miā.
隨儂拜祖公，祖公有靈聖¹⁵，保庇¹⁶長性命。

【注解】（普通話）

1、啾：用手指刮臉頰，嘲笑小孩。即華語的「羞、羞、羞」。
2、鹹chiàⁿ：鹹與淡，指飯菜的調味。
3、香餅：閩南地方糕點，也叫馬蹄酥，同安的香餅最出名。
4、芳：香。
5、米芳：米香，爆米花制成的茶點。
6、牛ni：牛奶。hiàn：腥味。
7、雞腱：雞肫。
8、無儂挃：沒人要。
9、花枝：烏賊、墨魚。
10、泅：遊水。
11、土礱：舊時用來舂米、去穀皮的土臼。
12、踅箍：繞圈子。
13、怯勢：長相難看、醜陋。
14、賣雜細：走街串巷賣雜貨。
15、靈聖：靈驗。
16、保庇：保佑。

鳥鼠仔倌

Fri, 07 Apr 2006 20:57:02 +0800

Niáu-chhí-á-koaⁿ, khan-gû khan-bé chiūⁿ tōa-soaⁿ
鳥鼠仔倌^①，牽牛牽馬，上大山。

Soaⁿ-téng bô bé-chháu, khan lâi-kàu lāu-chím-pô--á in mn̂g-kha-kháu.
山頂無馬草，牽來遘老嬸婆仔 in 門跤口。

Poa̍h-chi̍t-tó, kha thiàⁿ-thiàⁿ.
跋一倒，跤疼疼。

Tâu ô-kiàⁿ, ô-kiàⁿ khì bē ô.
投蚵鏡（蠔鏡）^②，蚵鏡去賣蚵。 Tâu chím-pô, chím-pô khì chò-kheh.
投^③嬸婆，嬸婆去做客。

Tâu tōa-peh, tōa-peh bē âng-ku.
投大伯，大伯賣紅龜^④。

Tâu chí-hu, chí-hu khì phah-chóa. (Chí-hu bē chho·-chóa)
投姊夫，姊夫去拍紙^⑤。（姊夫賣粗紙^⑥）

Tâu-lâi tâu-khì tâu-tio̍h góa, hāi góa sim-koaⁿ pho̍k-pho̍k-toāⁿ.
投來投去投着我，害我心肝噗噗彈^⑦。

Ke-kak oāⁿ ke-nōa, ke-nōa lìn-lo̍h chúi.
雞角換雞僆^⑧，雞僆lìn落水。

Gia̍h-chhéng phah chúi-kúi, chúi-kúi bīn o·-o·.
攑銃拍水鬼，水鬼面烏烏。

Hôe-siūⁿ giàn nî-ko·, nî-ko· cháu-khì tiàm.
和尚憖^⑨尼姑，尼姑走去坫^⑩。

Ku kā kiàm, kiàm chi̍t-khih.
龜咬劍，劍一缺。

Ku kā pih, pih lun thâu.
龜咬鼈，鼈圇頭^⑾。

Ku kā kâu, kâu lut-mn̂g.
龜咬猴，猴黜毛^⑿。

Chàng ùn thn̂g, ùn liáu-liáu.
粽揾糖^⒀，揾了了。

Phah kheh-chiáu, chiáu bô bóe.
拍客鳥^⒁，鳥無尾。

Siáu-káu-kang thau kā âng-ku-kóe.
痟狗公偷咬紅龜粿。

【注解】（普通話）

①鳥鼠仔：老鼠。「倌」，在閩南語中，相當於普通話裡的新郎官的「官」。比如，儂客倌（客官、客人）。在童謠當中，稱動物為「倌」是采用擬人手法。鳥鼠仔倌，可譯為「老鼠君」；又如「田蛤仔倌」（可譯為「青蛙郎君」）。
②蠔鏡：ô-kiàⁿ，舊時，靠養蠔（海蠣）為生的一種鈿農。
③投：指程度較輕微的狀告，也訴苦的意思。
④紅龜、紅龜粿：閩南當地一種五穀類食品。常當祭品。
⑤拍紙：打紙漿，造紙。
⑥粗紙：手紙。
⑦噗噗彈：怦怦跳（心跳加速的情形）。
⑧雞角、雞僆：分別表示公雞與未下蛋的小母雞。
⑨憖：愛好（略含貶義）。
⑩坫：tiàm，漳州話表示躺藏。相當於「覕（bih）」。
⑾圇：lun，縮進。
⑿黜：lut，脫。
⒀揾：蘸。
⒁客鳥：喜鵲。

《紅綢鞋，十八雙》（闽南·囡仔歌）

Thu, 06 Apr 2006 20:53:14 +0800

Âng-tiû-oê cha̍p-poeh siang, chháu-á cha̍p-poeh pé.
紅綢鞋，十八雙，草仔十八把。

Gû tak bé.
牛tak馬。^①

Bé bô kak,
馬無角，

Jiō-ô· tùi sái-ha̍k.
尿壺對屎礐。^②

Sái-ha̍k chhàu-hiam-hiam,
屎礐臭薟薟，

To tùi tiam.
刀對砧。^③

Tiam îⁿ-îⁿ,
砧圓圓，

Gûn tùi chîⁿ.
銀對錢。

Chîⁿ chi̍t-khang,
錢一空，

Soàn tùi chhang.
蒜對蔥。

Chhang loa̍h-loa̍h,
蔥辣辣，

Siān-thâng tùi ka-choa̍h.
蟮蟲對虼蠽。^④

Ka-choa̍h nn̄g-phiat chhiu,
虼蠽兩撇鬚，

Hoe-lê tùi thô·-liu (hô·-liu).
花螺對塗鰡。^⑤

Thô·-liu gâu chǹg-khang,
塗鰡gâu鑽空，

Iū tùi kam.
柚對柑。

Kam âng-âng,
柑紅紅，

Gín-á tùi tōa-lâng.
囡仔對大儂。

Tōa-lâng bô ì-tì,
大儂無意致，^⑥

Ka-lé oāⁿ lāu-hì.
嘉禮換老戲。^⑦

Lāu-hì bô hì-siaⁿ,
老戲無戲聲，

Sió-pâng oāⁿ tōa-thiaⁿ.
小房換大廳。

Tōa-thiaⁿ âng iū âng,
大廳紅又紅，

âng-tiû-oê, cha̍p-poeh siang.
紅綢鞋，十八雙。

【注解】（普通話）

①Tak, 本字「觸」，指人相互「爭吵」，閩南語又叫「冤家」；另指有角類動物（如牛、鹿等），用角「撥挑」的動作。
②屎礐：一個道地的閩南語，原泛指廁所。現在，中國閩南農村鄉下地方，仍有古老的旱廁存在，仍叫屎礐；而室內的廁所或城市的公廁，則大多不再沿用「屎礐」一詞，取而代之的是「廁所」（閩南地區）和「便所」（臺灣地區）、甚至直接借用普通話的「洗手間」。
③砧：指切菜的案板。
④蟮蟲，siân-thâng，壁虎。虼蠽，蟑螂。
⑤塗鰡，泥鰍。
⑥無意致，不認真，不專心。
⑦嘉禮，傀儡戲。老戲，音 " lāu-hì "，相對新戲種而言。像歌仔戲（薌劇）屬於新戲種。老戲是一種古代的戲種，已經消失了。老戲表演時，只有動作，沒有人聲，而且演員都是男子，沒有女子。故閩南有一俗語曰：「老戲無諸姥」。

閩南囡仔歌《io囝歌》

Tue, 21 Mar 2006 16:04:56 +0800

: 1、《呕呕睏》

O·ⁿ-o·ⁿ-khùn, chi̍t-mî tōa chi̍t-chhùn.
呕呕睏①，一暝大一寸；
Eⁿ--á sioh, chi̍t-mî tōa chi̍t-chhioh.
婴仔惜，一暝大一尺；
O·ⁿ-o·ⁿ-iô, chi̍t-mî tōa chi̍t-thiô.
呕呕摇，一暝大一頭。

2、《婴仔婴仔呣通吼》

Eⁿ--á Eⁿ--á m̄-thang háu, hó·-bâ tī mn̂g-kháu.
婴仔婴仔呣通吼②，虎猫伫门口。
O·ⁿ-o·ⁿ-khùn, kín-kín khùn, a-bú khì taⁿ-pùn.
呕呕睏，紧紧睏，阿母去担粪③。
Taⁿ chin kú, taⁿ bōe lâi. Hó·-bâ kā tō·-châi, kā--khì koh kā--lâi.
担真久，担未来。虎猫咬肚脐，咬去佫咬来。
Eⁿ--á Eⁿ--á m̄-thang háu, koai-koai khùn, o·ⁿ-o·ⁿ-khùn, chi̍t-mî tōa chi̍t-chhùn.
婴仔婴仔呣通吼，乖乖睏，呕呕睏，一暝大一寸。

3、《io囝歌④》

Eⁿ--á iⁿ-iⁿ-khùn, chit-mî tōa chi̍t-chhùn;
婴仔嘤嘤睏，一暝大一寸；
Eⁿ--á iⁿ-iⁿ-sioh, chit-mî tōa chi̍t-chhioh.
婴仔嘤嘤惜，一暝大一尺。
Io-kiáⁿ ji̍t lo̍h-soaⁿ, phō-kiáⁿ kim-kim-khoàⁿ,
Io囝日落山，抱囝金金看，
Kiáⁿ sī góa sim-koaⁿ, kiaⁿ lí siū hong-koâⁿ.
囝是我心肝，惊汝受风寒。
Kāng sī chi̍t-iūⁿ kiáⁿ, bōe ū nn̄g-iūⁿ sim,
共是一樣囝，bē有兩样心，
Cha-po· ā-beh thiàⁿ, cha-bó· ā-to̍h chhiâⁿ.
诸夫也卜疼，诸姥也著成。
Thiàⁿ-kiáⁿ chhiūⁿ nn̂g-kim, chhiâⁿ-kiáⁿ ū chek-jīm;
疼囝像黃金，成囝有責任；
Iúⁿ lí kàu kè-chhōa, pē-bú chiah hòng-sim.
養汝遘嫁娶，父母才放心。

4、《摇啊摇》

Iô ah iô, iô kim-kiáⁿ; iô ti-kha; iô tōa-piáⁿ. Iô bi̍t-thô, lâi sio-chhiáⁿ.
摇啊摇，摇金囝，摇猪骹，摇大饼。摇密桃，来相请。

5、《摇啊摇》

Iô ah iô, iô kàu gōa-má kiô.
摇啊摇，摇遘外嬷桥。
Âng-ku nńg-siô-siô, ti-kha siang-pêng liô;
红龟⑤软siô-siô，猪骹双爿撩；
Tōa-mī siang-oáⁿ sio, bah-oân-á chham hô·-chio,
大面双碗烧，肉丸仔掺胡椒，
Soàn-á chhá hî-piō, beh khùn to̍h pàng-jiō;
蒜仔炒鱼鳔，卜睏着放尿，
Chhut-mn̂g to̍h chē-kiō, kó·-chhoe ti̍h-ta̍h-kiò.
出门着坐轿，鼓吹⑥啲哒叫。

Iô ah iô, a-kong--á thau bán kiô.
摇啊摇，阿公仔偷挽茄。
Bán lōa-chē? Bán chi̍t pn̄g-lē.
挽偌侪？挽一饭籬⑦。
Ā-ū chia̍h, ā-ū bē, ā-ū hō· lán eⁿ--á chò tō·-chè.
也有食，也有卖，也有互咱婴仔做度晬⑧。

Iô ah iô, chi̍t-mê khùn sio-sio;
摇啊摇，一暝睏烧烧；
O·ⁿ ah o·ⁿ, chi̍t-mê khùn ho·ⁿ-ho·ⁿ;
呕啊呕，一暝睏呼呼；
Iⁿ ah Iⁿ, chi̍t-mê khùn kah kng.
婴啊婴，一暝睏遘光。

《io囝歌》

Chi̍t-hòe nn̄g-hòe chhiú leh phō; saⁿ-hòe sì-hòe thô·-kha sô.
一岁两岁手咧抱；三岁四岁涂跤趖。
Gō·-hòe la̍k-hòe sòa-sòa tōa; ū-sî thâu sio kah hī joa̍h.
五岁六岁sòa-sòa大；有时頭烧佮耳热。
Chhit-hòe peh-hòe cháu-phā-phā, kui-ji̍t kò· i nn̄g-ki kha.
七岁八岁走phā-phā，规日顾伊两支跤。
Káu-hòe cha̍p-hòe o̍h chiam-chí, kiaⁿ i sì-kè khì keⁿ-si.
九岁十岁学针黹⑨，惊伊四界去经丝⑩。
Cha̍p-it-jī hòe to̍h kà-sī, to̍h o̍h lé-māu bat tō-lí.
十一二岁着教示，着学礼貌捌道理。
(Cha̍p-it cha̍p-jī to̍h phah-mā, chhú-khì to̍h ná o̍h chò-saⁿ.)
（十一十二着拍骂⑪，此去着ná学做衫。)
Cha̍p-saⁿ cha̍p-sì chàu-thâu o̍h, chi̍t-tè toh-bīn pān ē khí.
十三十四灶頭学，一块桌面⑫办会起。
Cha̍p-gō· cha̍p-la̍k beh tńg-tōa, m̄-thang tòe lâng khì hong-hoa.
十五十六卜转大⑬，呣通tòe侬去风花⑭。
Cha̍p-chhit cha̍p-poeh chò chhin-chiâⁿ, sim-thâu hoaⁿ-hí bīn chheⁿ-kiaⁿ.
十七十八做亲情⑮，心頭欢喜面生惊⑯。
Chi̍t-poàⁿ hoaⁿ-hí chi̍t-poàⁿ kiaⁿ.
（一半欢喜一半惊。）

〖釋義〗（閩-普）

1、呕呕睏：呼呼睡。呕，原为拟声词，可转为动词，比如"呕婴仔睏"（哄婴儿睡觉）；摇篮，闽南语亦可讲为"呕篮"。

2、吼：háu，亦即"哭"。

3、粪：指肥料。旧时在闽南农村，垃圾场叫做"粪te"，垃圾可当肥料，供给农作物生长。

4、io囝：育儿。io，是动词，意思是"抚育"。

5、红龟：也叫"红龟粿"，一种闽南地方糕点，过年过节时充当拜神明的供品，以糯米做成，外型呈巴掌大的椭圆状，通常一~二公分厚，外表面印有龟壳花纹。

6、鼓吹：kó·-chhoe，乐器，唢呐、喇叭。

7、饭籬：pn̄g-lē，炊具，笊籬，一种漏勺，用于从煮熟的稀饭中捞取米颗粒。

8、度晬：一种习俗仪式。长辈为年满一周岁的婴儿所办的庆生仪式。

9、针黹：针线活。

10、经丝：keⁿ-si / kiⁿ-si，原义为蜘蛛等爬虫吐丝结网，引申为"到處招引、招惹"。

11、拍骂：打骂。

12、桌面：指饭局、酒席。

13、转大：tńg-tōa，青少年长大成人。
14、风花：这里指"四处游荡"、"到处风骚"。
15、做亲情：chò-chhin-chiâⁿ，指"说亲、提亲"。"亲情"，另有"堂亲"之意。
16、生惊：chheⁿ-kiaⁿ / chhiⁿ-kiaⁿ，惊慌、惶恐。