2009.02.06
新正初一尾暗仔六點外，二姐的車駛來到民宿的停車場，伊是上落尾到位的一台車。二姐夫落車行著蹁蹁，精神無啥好，伊..又閣陷落下睏眠障礙的萬丈深坑，可憐！清醒時精神無好就啉提神的飲料、欲睏睏袂去就食愛睏藥仔，藥效抑未行伊當做無效，家己共藥劑加量吞落腹，年久月深人鈍鈍。過年時袂放心放伊家己佇厝裡，規家伙仔tshuā-tshuā咧，來民宿參逐家做伙過新年。
過年進前佇華山訂一間團體房，另外閣訂一間細間房予tshuā幼嬰仔的查仔孫仔怹蹛。
團體房唯入門頭一位睏阮大姐夫到上落尾一位是阮阿爸，攏總十外外个人。這長長的總鋪，像細漢時參兄姊暗時睏中間仔的總鋪，小妹仔無來我較毋甘，伊本成佇我訂民宿、發通知了後頭一个報名，歡喜講今年會當來參加，往過佇民宿過暝的活動，伊毋捌參加過，佇過年前一工，煞打電話講伊袂當來，kan-na講臨時有代誌袂當參加。佇電話中無好問傷濟，等見面才問詳細。
自開始阮就有一个共識，這个活動請逐家儘量參加，但是無勉強。因為隨人一家一業，途合無仝，凡事順其自然較適當。後來初三佇哥哥遐參小妹仔見面時，詳細問伊無來的原因；伊講年仔節仔逐擺轉去翁婿的祖厝，攏是大姆仔款便便，過年時，伊初一無轉去共人鬥跤手，所以無參加外家的民宿旅遊。我會當體會，小妹仔是阮四个姊妹仔內底，嫁予較傳統的家庭，序大人真疼惜，伊嘛真會曉想。
欲睏進前，大姐較老根節，交代講生份所在半暝仔起來愛細膩，我笑伊像老歲仔人按呢赫厚操煩。後來才知影，伊的擔心毋是無理由。
民宿佇山區，氣溫誠低，窗外夜蟲無睏哮出聲，唱規暝的歌予阮聽。窗內眠床頂頭，一个仔一个拚看誰人鼾〔honn〕眠較大聲；有像大卡車駛袂行、有像發財仔車咧起崎、阮翁婿阿勳仔歹睏癖，若是伊的鼾眠像o-to-bai2發袂行，躺佇眠床誠久毋肯加入鼾聲的隊伍，我共伊講：緊睏、加油、共怹拚….。
勳仔睏佇我正手爿、勳仔閣過去是阮伊呀；囡仔睏佇我倒手爿，囡仔閣過去是阮阿爸，我是何等幸福的查某人啊，親情溫暖這个寒冷的冬天。真久無參囡仔睏做伙矣；會記得921彼暗，我嘛是睏佇怹兩爸仔囝的中央，後來囡仔那來那大漢，母心不變，想欲共伊惜，伊已經哪走哪遠，我定共伊講我的母愛抑未用完咧，尾仔伊聽我講濟煞叫我閣生一个來疼。
享受規厝間的親情，付出的代價就是忍受起起落落的鼾眠聲。二姐講鼾聲有緊有慢，將佛號鬥入去鼾聲的節奏，一聲一聲慢慢仔趖入去淨土探頭，有水聲、有樹葉仔聲、聲聲是佛音。我的道行無夠懸，kan-na會當綴窗仔外的夜蟲去遊暝時的山野。阿爸講二姊信佛信甲走火入魔。毋著！是走火入佛。我講伊若無將佛揪牢牢，二姐夫一日到暗出狀況，伊無掠狂才奇怪。大姐夫自早參二姐夫行真倚，看伊唯一个古意人變甲這个款，大姐夫講其實二姐夫家己嘛無愛這咧形，咱愛同情伊、毋通責備伊的行為。這點阮了解，逐家學習包容的心對待。
我的心走去參夜蟲踅山野，踅啊踅，踅入去夢中享受一个溫暖的世界。
當落眠的半暝仔……烏暗中一聲「碰！」、續落一聲「哎哦！！」有人跋倒；大燈切開…..坐佇塗跤的是二姐夫。
所有的人攏精神，伊頭摃著壁，無受傷，阮才知影民宿是枋仔裝潢的壁，佳哉毋是磚仔角做的，若無這聲跋落下到地一定真食力！
二姐夫這一下跋，逐家精神咧開講；問阿爸是毋是去夆吵精神，阿爸講伊抑未睏。講著睏眠障礙，阿爸一直嘛有這種困擾，頂年仔用愛睏藥仔控制，毋拘藥劑的輕重真痞喬，食少無效果、食濟日時人袂清爽，後來阿爸放棄食愛睏藥仔，伊將睏袂去當做是身體無需要睏眠，倒佇眠床準做歇睏，就按呢，有時一暝目睭金金到天光、有時一暝睏一點鐘、有時天光才睏去。
頂站仔我暗時睏袂好勢，醫生開愛睏藥仔，提予我的時交代講：儘量莫食。醫生講伊唯米國轉來，時差調袂好勢，食一擺愛睏藥仔，知影食了的副作用真艱苦。愛睏藥仔食了身軀像用強力糊粘佇眠床彼款的感覺，無法度起床，這是我的經驗。
二姐夫愛睏藥仔愈食愈重，食到尾矣愛睏藥仔變無效，有時行路蹁蹁、有時講話癲癲。辛苦著二姐佮伊的序細。一直鼓勵伊解掉無必要食的藥仔，伊清醒時決心欲改，毋拘．．．嘛毋知底時才會真正的清醒。
阿爸講阮阿公年老時嘛有睏眠的障礙，曾經為著這个症頭鬱悴甲強欲想袂開，暗暝起床去摃竹欉趕走暝時咧叫的鳥仔。原來這毋是現代人才有的症頭，古早人阮阿公就有文明病矣！我只是得著真傳，應該學阿爸這咧步數，脫離藥物的控制，順其自然。
二姐夫會跋倒，原來是為著欲出去外口食薰，癮薰治好倒落床，就隨閣睏去，發出大聲的鼾〔honn〕眠；伊愛睏藥仔應該食袂少。
第二工透早阿維參二姐去廚房幫民宿的頭家娘煮早頓，煮好入來叫逐家起床；阿維講有菜園仔現挽的青菜哦；慢來會食無。
濟人好食物，我空課做輸人，食飯當然愛走第一嘍！
鐵鞋提來欲穿…….啊～哪會按呢？鐵鞋正跤扁去、倒跤開去…….穿袂落去矣！哪會按呢？定著是二姐夫暗時跋彼下，矺一下害去矣！我看一下毋知欲哭抑欲笑，活動才頭一工呢，續落去欲閣去嘉義、台中．．．．無鐵鞋通穿像無跤共款，欲按怎？
阿維共民宿頭家借摃捶仔，扁去的正跤摃予開、開開的倒跤摃予倚……舞一睏仔，修理甲差不多矣，拗曲的關節部位猶是khe5 khe5袂順，閣去借針車仔油點看咧，勉強會用得毋拘無夠活，原來鐵鞋這个物件做甲這精密，一旦故障，毋是摃捶仔摃會好、毋是針車仔油有法度解決的問題，莫怪赫貴。年底訂做一雙愛兩萬外箍，政府補貼了後尾手家己閣開八千箍，孤門獨市無法度講價，阮儉儉仔用，一雙總是共穿欲成十年，年底預訂彼雙本成是欲提來做備用，都抑未做好咧，這雙就被迫退休；自去仁愛學校讀冊到今，穿過幾何雙鐵鞋，毋捌拄過這款代
二姐夫講歹勢啦，毋是特工的。我知，無怪伊。
二姐夫若會當唯藥癮的夢境醒起來，閣較濟雙鐵鞋予矺痞去攏無要緊.......天公伯仔，這呢卑微的祈求，請你同意！
