麵包西點篇(4)
終於"的"起心肝，買左隻雞返屋企原隻燒~
用左我最仲意既泰式醃法，
正到不得了!!原來原隻燒比半隻燒D肉汁豐富好多架!!外面脆，入面滑~真係唔講得笑!!
不過最可惜唔夠時間醃，如果醃過夜仲好味~
當然，一隻雞點食得哂吖，淨返果D要黎整宵夜.............
岩岩抹完個焗爐，又要焗過???
求其白鑊煎一煎，落埋用淨既椰漿，少少胡椒，醃雞時既汁料，煮埋一碟.....
感覺似葡國雞.....正想影返張相時.....已經比老公食左半碟.......佢仲話好食過之前.......係咪玩野!!!
泰式烤雞:
雞一隻
醃料:
魚露2湯匙
黑胡椒碎一茶匙
咖哩粉2茶匙
椰漿 1/3小鑵
老抽少少
糖一湯匙，蜜糖 1 1/2湯匙
五香粉，紅椒粉各1茶匙(五香粉可用鹽代替，紅椒粉可用指天椒)
乾蔥茸，薑茸，蒜茸，各一茶匙
香茅一枝(拍扁，切段)
芫茜一蚊(切碎)
做法:
雞先用少少雞粉抹勻內外，將所有醃料拌勻，倒一部份入雞腔內，卒勻。
將雞放入保鮮袋，倒埋其餘醃汁落去，搖勻，間唔中拎出黎搖下佢佢，最好醃過夜。
焗前抹走醃料，D醃料連汁慢火煮滾，當沾汁。
