雙倒水別莊:扑人喝救人

因為消息是 tī 《聯合報》 ê 頭頁，所以我無法度即時確定 che 是 m̄ 是事實（M̄ 是我有偏見，是 chit 份報紙往過 ê 記錄去損蕩 in ka-tī ê 信用），nā 準 chit-ê 消息是事實，án-ne 我有影真不滿段宜康等人 ê 言論。

簡捷講，報紙頂 koân 所寫段--先-生 ê 意見是：「面浸桶主席游錫堃發表『中國人糟蹋台灣人』等言論，伊 beh tī 面浸桶中執會提案，要求黨 ê 政治人物發言 bē-sái 對逆『族群決議文』ê 精神。伊 koh 講面浸桶是 tī 無考驗 ê 情況來通過族群決議文，現此時是考驗 ê 時陣，外界 ē-tàng 檢驗 che 到底是面浸桶 ê 策略運作或者是真心 ê 信仰。」

Ku 怪--ah，原來咱台灣 ê 族群是分做「中國人」kap「台灣人」--oh，我 nah 一直掠準咱 ê 族群是「Hō-ló」、「客家」、「新住民」、「Pangcah」、「Cou」、「Puyuma」、「Paiwan」、「Atayal」.....等等--leh？

「中國人」kap「台灣人」kám m̄ 是「國家認同」ê 層次？Nā 觀看咱四箍輪轉 ê 親晟朋友，咱 koh ē-tàng 真清楚看著：「國家認同 kap 族群身份是相透濫，無一定 ê 關係--ê」，有足儕「Hō-ló 人」講 ka-tī 是「中國人」，mā 有「新住民」kan-taⁿ 講 ka-tī 是「台灣人」，chiah-ni̍h 簡單 ê 代誌，段--先-生 soah 看 bē 曉？

Tī 面浸桶《族群多元國家一體決議文》內底，確實是有講著「中華民國認同」ê 部份，m̄-koh 我無啥愛信講，段--先-生 ē m̄ 知「中華民國」kap「中國」tī 語言上有啥物精差；tī 國際法 ia̍h 法律上是一件代誌，nā mài kā 「中國」hām 「中華文化」 chit 款文化意義 sio 濫來 thiau-tî tìⁿ 戇，實際上，有出過國 ê 人，有國際觀 ê 人，無可能 m̄ 知「中國 / China」tō 是「中華人民共和國 / PROC」ê 基本語意。

Tī 《族群多元國家一體決議文》--ni̍h，現現寫講：「國家認同應建立在公民意識基礎上：經由民主化建立國家主權後，台灣已無外來統治問題，只有如何共同抵抗外來併吞的挑戰。國家認同應建立在並肩保衛民主成果、攜手開創台灣經驗的『公民意識』上，超越『省籍意識』。本黨深切體認並承擔此一典範移轉的歷史責任。」我相信連 gín-á mā 看 ē 出--來，決議文 ê 本義 tō 是強調「國家認同」khah koân 過「族群各樣」，mài koh kā 「往過 ê 歷史罪行」kap「國家認同」hām 「族群分 phēⁿ」koè 做夥，koh nā beh 「共同抵抗外來併吞的挑戰」，「國家認同」是絕對 bē-ēng-tit 閃辟 ê 議題，是定著 ài 去討論 kap liú-la̍k ê 大代誌。

進一步來講，游錫堃明明是 teh 強調「國家認同」kap「外敵介入」已經變做 chit-chām-á 政治運動 ê 重要因端--ah，是 án-choáⁿ 段--先-生 beh kā 硬拗做「族群議題」，m̄ 知段--先-生是「先」扑人才來喝救人，ia̍h 是頭殼 gông-gông 想了無真？

當然任何人攏 ē-sái 去批評游錫堃 tī chit 時陣去 lā 「國家認同」ê 問題，hō· 代誌 koh khah 複雜，策略 m̄-tio̍h，m̄-koh nā 有人講「國家認同」bē-sái 討論 bē-sái 去講，koh 硬 beh kā 「國家認同」議題花做「族群問題」，án-ne chit 款人有影真無良心！

姓名:
email:
URL:
	記錄個人資訊:
回應:
檢核碼:

雙倒水別莊

September 27, 2006

扑人喝救人

引用URL