【台語小說】

　　白耳仔佮我　　　　　胡長松

　　　　1 

　　我毋知影妻是按怎會去買彼隻鳥仔轉來，她講：「佇夜市仔看著，感覺伊可憐，道給買轉來啊。」我給斟酌看，是白耳畫眉。鳥仔予妻囥佇房間頭前的陽台，一透早，唉道干那有心理病仝款，啾啾叫，叫袂煞，佇籠仔內khok-khok跳懸跳低，害我倒佇眠床頂嘛聽甲無張持緊張神經質起來。我給妻講：「妳敢會使叫彼隻有病的白耳仔莫閣khok-khok跳啊？若無，規氣給放放出去。」妻應講：「啊道是按呢毋才看伊可憐的嘛！閣再講，按呢的鳥仔給放出去，嘛乾焦是揣無吃、飫死一條路爾敢毋是？」妻真堅持，我只好繼續接受她佮鳥仔精神上的苦毒。

......憲兵隊的張隊長提一束花行入來。蔡秀美有小可緊張，雖然見過幾擺，毋過，遮呢近看張隊長的面，遂感覺一種特別的生份──卡正確講，她雄雄感覺張隊長是一個緣投的查甫人.....

　老鼠夾仔       /胡長松

　　　　１

　　我合高中好朋友林君ｅ家庭聚會，約值東海岸一個安靜美麗ｅ海灣旅店「藍灣」。旅店ｅ外牆是白色ｅ大理石合歸片ｅ玻璃窗，窗外是海湧、白砂質ｅ海岸合幾欉青翠ｅ椰子樹；日頭下，初秋清爽ｅ海風位海面白雲ｅ方向吹過來ｅ時，椰子樹影道輕輕仔搖顯起來。