小慧貓竇

< 1 2 3 4 5 6 7 8 9 10 > 下一頁 | 最後一頁 1/54

檢視方式: 列表摘要

July 3, 2009

扭蛋玩具 >o<

tosiuwai 在天空部落發表於16:46:17 | 得意野

呢個係...驅蚊器呀
仲有得揀6小時，12小時同24小時
實在太強.. 非常可愛的貓貓哦
去戶外一定要帶住，多謝阿洲 !! ^o^

呢個係ear phone!
扯對手仔出黎就用得架啦!
panda非常可愛 !!!
多謝阿細，我一定會用的^o^

呢個係壽頭不倒翁，比阿細同阿洲遺棄而送上我手上..
多謝晒 -_-

人氣 () | 回應 (2) | 引用 (0)

July 2, 2009

我愛山寨機 ~ 大頭kitty 電話 ~

tosiuwai 在天空部落發表於11:21:15 | 得意野

我真係開心到想喊了
雖然我唔鐘意hellokitty
但呢個山寨機簡直係一見鐘情
見到就好想要了!!!
佢仲要係touch screen呀!問你死未？

呢個係閃石，鏡頭，同閃光燈

耳筒，電話繩，差電器，樣樣都有hellokitty logo
洗唔洗咁detailed!!! XD

仲要送一個手挽袋同電話袋...我真係投降了!!!

多謝送比我的人 ^o^
我實在太幸福! XDDD

人氣 () | 回應 (2) | 引用 (0)

June 29, 2009

表面上....

tosiuwai 在天空部落發表於11:39:40 | 得意野

表面上... 佢係一罐可樂....

實際上...
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
佢係一個speaker!!! XDDD

係7-11 買可樂加錢就有得換啦 !!!有三款比你揀的~~可駁ipod/mp3/電腦
我未試佢既音質，不過玩下都幾得意~~

人氣 () | 回應 (0) | 引用 (0)

June 23, 2009

頭痛到嘔...

tosiuwai 在天空部落發表於21:08:06 | 心情

尋晚臨訓前，頭一直痛...
乖乖咁早d訓，但求起身會唔痛..
點知都係好痛...仲要係偏頭痛.. -__-|||
痛到眼都痛....
勁辛苦..

懶健康咁飲左大杯利賓賓..
9點零都係好痛，就拍左粒panadol，仲要係extra0個隻
唔夠30mins就走入toilet 嘔了
嘔返d利賓賓出黎，好似嘔血咁...
嘔完之後... 無咁痛喎 +_+|||
仲有d爽既感覺...

我估大慨係呢排多野諗，再加上尋日嚇一嚇...
大吉利是都好耐無偏頭痛了..
多謝大家既慰問，我真係好好多了
應該唔係病.. 只係嚇親下..
情緒先係令人生病既原因呀 !!

人氣 () | 回應 (1) | 引用 (0)

June 22, 2009

難以想像既害怕

tosiuwai 在天空部落發表於21:35:48 | 心情

今日收到一個電話..
係我以前既男朋友打黎
大家都分開左5年.. 開頭大家都有聯絡
後來.. 佢除左搵我，仲會透過我媽米去知我既近況..
而佢對我既關心.. 越黎越嚴重.. 甚至令到佢當時既女朋友對我造成長達一年半既騷擾
0個時我仲做緊空姐..
成日係半夜收到唔出聲既電話.. 係我既blog亦時時收到好多奇怪既留言.. (我甚至因為咁搬左3次blog)
佢既女友搵人查到我既roster，對我既schedule瞭如指掌..
當時我好驚..我會唔會返返下屋企比人淋強水呢？!

好唔容易，我先淡化左大家既關係..而佢女友亦都無再騷擾我 (因為佢地都分開左)
我同呢個ex亦都只會係msn寒暄而已...

雖然分手，我同佢既好朋友都仍然有聯絡，而且成為好好既朋友
不過我呢個前男友.. 就好抗拒佢既朋友同我見面
甚至話搵人打佢既好朋友
而原因係 "阿慧話晒都係你既阿嫂丫"

我覺得好大壓力..
我認為，分左手都可以做朋友..
但我對佢既感覺係好恐懼..
我唔想再為佢既情緒負上責任了..

今日收到佢既電話..
佢扮左另一把聲.. 我完全認唔到係佢 ..
到佢表明身份時...我真係嚇到背脊都冒汗..
好驚..佢話想約我出去食野..
我只好推辭話再約再聯絡
之後佢就sms我話只係想見我，唔通分左手唔做得朋友咩...

我有諗過其實佢都無對我做過d乜野傷害既事..
只係我知.. 一但見佢.. 佢就會成日搵我..
如果唔出黎，佢就會係咁sms，email，msn我..
我知佢既模式係咁...
我唔介意大家做返普通朋友..傾下計食下飯..
不過.. 我感覺真係好大壓力..
我知咁樣既逃避都係好小人既行為
但我知道佢太多野.. 我嘗試幫佢.. 但一段時間後，只要稍為無時間陪佢..
佢就會埋怨..埋怨再埋怨...

我真係好驚..
點解我會咁驚一個我曾經愛過既人... -_-

人氣 () | 回應 (6) | 引用 (0)

June 21, 2009

Easy Sex?!

tosiuwai 在天空部落發表於22:38:09 | 心情

係forum睇到一個thread，睇完之後有d難過..
有個女仔，有一晚佢上左bf屋企睇dvd
2個人睇得好地地，突然bf個電話響左2次，都係sms
個女仔覺得有d disturb，就睇下係邊個啦，點知係一個無save既電話號碼
內容係 "0個晚..多謝你"
追問之下，bf話0個個係佢既ex..

bf繼續講，話有一晚，佢ex係半夜打比佢
話要自殺，話好唔開心，又要生又要死
bf情急之後就飛的去睇佢ex
阿ex一見到個男仔，就攬實唔放
話好掛住佢，仲好鐘意佢
(佢地已分手2年，分手係因為個ex有第三者)
咁之後佢地就有sex了..

個女仔聽到呢度，難過到連眼淚都流唔出
靜靜地換返衫離開
而bf就一直尾隨，不停話自己知錯，唔會再contact ex...bla bla blah..
個女仔上左taxi就返自己屋企了..
當然佢bf不停打比佢，但個女仔就閂左電話..

呢種傷心.. 係痛到絕望..
今日佢可以咁易同ex上床..
第二第三日佢都一樣可以同其他人有sex..
就算自己有幾愛對方，有幾易心軟.. 呢一關真係絕對唔易過
係一條刺再加一個唔會好返既傷口
可能d人會話個ex好毒，咁樣去勾引個男仔
但牛唔飲水點gum得牛頭低..

有d女仔確實好姣..好flirty好horny..
但如果係我，我最在意係個男仔既反應..
如果個心只係容得下一個人，係唔會有把持唔住呢d藉口的..
將心比己.. 個男仔又會唔會接受到自己女友做同一件事..

祝福0個一個女仔，可以遇到真正令佢幸福既人...

人氣 () | 回應 (0) | 引用 (0)

June 18, 2009

我愛凍水涼

tosiuwai 在天空部落發表於14:06:42 | 心情

我真係好怕熱，出汗唔緊要，但出完汗個人痴笠笠我真係好唔得
所以乜野止汗劑呀，爽身粉呀，我一定會搽左先出街的
又一定會帶毛巾仔抹汗(因為我實在太大汗了，加上咁樣環保d)
我諗我前世一定住係d好凍既地方
因為無論天氣點凍，就算落雪，我都唔怕的
我唔使著好多衫出街都ok
我係超級怕熱唔怕凍

近2個月我都係仲凍水涼，出完街返黎沖個凍水涼真係好爽呀!!
3x度我真係無可能仲用暖水...
宜家即刻就想去沖個凍水涼了... @@''

人氣 () | 回應 (0) | 引用 (0)

June 17, 2009

產品試用第一擊 BIOTHERM AQUASOURCE溫泉水感系列

tosiuwai 在天空部落發表於12:51:10 | 護膚

感謝Ztyle 同 Biotherm 比我呢次試用 Biotherm AQUASOUORCE 溫泉水感系列既機會! 去羅試用品時好surprise，竟然係貨裝! 哈哈!! 實在太高興了!!!

我所揀選既係for 油性肌膚既3-steps，當中係有添加針對性礦物 “銅” 因為銅可以調節油脂分泌，淨化肌膚，令毛孔更加細緻。

溫泉水感控油潔面霜 BIOSOURCE Oil Free Purifying Mousse

好易就起到好多泡啦，泡沫都幾濃密，氣味帶點花香

清潔度好足夠，感覺皮膚好乾淨

但過水後感覺有點乾澀… 洗完面之後最好可以立即搽toner同lotion

溫泉水感控油潔膚水 AQUASOURCE Oil Free Purifying Water

潔膚水既樽口有封口，好貼心

氣味都係帶點花香，唔太濃的

用化妝棉上面，感覺都好濕潤，幾易吸收

有清爽既感覺

溫泉水感控油乳液 AQUASOURCE Oil Free Clarifying Hydrating Gel

直立式樽身，唧出黎好方便，而且唧既分量亦好易控制

一樣係有淡花香味的

搽上面後，無乜負擔，頗易吸收，質感亦相當補濕

試用左7日了，感覺好補濕，用落亦好舒服

我將toner放係雪櫃凍左先用 :p

平時訓覺開冷氣，醒左之後，好多時都發現塊面好笠..同有d油

但呢個week我醒左摸塊面都好乾爽下!

我亦無敏感無出粒粒

呢個系列比我一種好溫和補濕既感覺

再一次多謝ztyle同biotherm 比我呢個試用機會!大家有興趣可以去呢個website睇下，玩下game就可以有試用裝架啦! 就算買貨裝宜家都有promotion呀 :)

http://www.biothermaquasource.com.hk/

人氣 () | 回應 (0) | 引用 (0)

June 17, 2009

Perfect Whip

tosiuwai 在天空部落發表於12:18:35 | 護膚

如果去開台灣不妨真係買多幾支返黎呀，我覺得好抵用，我唔係好記得價錢，但我諗應該只係hkd30-40咁上下啦! 小慧推介

Perfect Whip呢支洗面膏係0係台灣買既，因為見好多網友都有提過，咁就買左黎試下 (後來發現citysuper都有得買的，不過當然賣得貴d)

都用左半支了，每次唧少少出黎就可以起到好多泡泡呀，完全唔使用起泡網都可以起到好濃密既泡，好有滿足感 J

將d泡泡係咁捽上面，泡泡都唔會話好易就散晒，沖左水之後，塊面不單止好乾淨，仲要好柔軟，一d都唔乾的!!!

人氣 () | 回應 (0) | 引用 (0)

June 16, 2009

雙妹嘜雪花膏

tosiuwai 在天空部落發表於19:13:10 | 未分類

雙妹嘜雪花膏，其實無諗住買，不過見佢細細樽，買黎試下啦，我記得呢個都係雙妹嘜既皇牌黎架! 我買呢個細細樽先好似係十零蚊

望見佢係好似夏士蓮雪花膏咁既樣啦，以為笠笠地，點知試上手好快就吸收晒喎，摸下，好乾爽喎!!我既皮膚係夏天都算係油性，搽呢個雪花膏係完全地唔笠呀!我自己就覺得佢唔會太補濕，但如果搽佢之前有搽左toner既話，咁再搽佢係可以keep到d水份架! 氣味就係雙妹嘜既玫瑰味… 我自己就好鐘意聞羅 :p 搽上面好似有dd白色的，但唔太明顯的!! (我記得睇forum有網友講過，張玉珊有教過用夏士蓮雪花膏當foundation咁用，調色又護膚，我覺得咁都唔錯，反正佢本身就係護膚品，如果只係落下街既話，可以只搽雪花膏呀 )