史詩？小說？敘事詩？--論《胭脂淚》ê文體

 　　　／何信翰  中山醫學大學台灣語文學系助理教授
　　　　　　　林央敏評：史詩也是活的

摘要

     Tī文學研究內底，“史詩”、“小說”、“敘事詩”lóng ū家己特別ê體裁、形式kap內容ê方向。ㄧ般來講sī bē hō讀者分bē清楚。M-kó，文學ê創作變化chin-chē：tī世界文學內底，ū-tang-sî-á某chit ê文學作品ê外在形式kap內容mā ū可能分屬nng ê bô-kâng-khóan ê文體。Tī chit-chióng情形內底，判斷chit ê作品ê文體tioh變kap khah複雜。親像Lo-se-a ê文學家Phu-sih-kin ê作品《I-hu-kie-ni O-nie-kin》，明明全部lóng sī用詩ê形式寫作完成，m-kó，作者稱chit ê作品sī“小說”。另外chit ê文學家Ko-ko-li ê作品“死靈魂”，全篇用散文體寫作，m-kó hō lâng叫做“敘事詩”。Lie-hu Tal-su-thoi認為家己ê名著《戰爭kap和平》“m-sī史詩，m-sī小說，mā m-si敘事詩”。Chiah ê例lóng sī世界知名ê大作。 
     林央敏ê作品《胭脂淚》，雖然作者家己kā伊號作“史詩”，目前為止，所ū相關ê論文mā bô懷疑過chit ê講法。M-kó，就作品ê形式kap內容看--起來，猶原ū相當討論kap研究ê空間。 
    本論文tioh sī beh用“類型學”ê方法，研究《胭脂淚》ê內容kap形式，判斷tī嚴格ê文學研究內底，chit篇作品ê文體sī tó-chit-chióng。

關鍵字 ：   類型學，《胭脂淚》，史詩，小說，林央敏

1.1 研究動機： 
     2002-nî 9-goeh出版ê「胭脂淚」sī林央敏先生ê大作，mā-sī台語文學tī發展ê過程中nng chin重要ê chit篇著作。Chit-ê作品ê重要性m-nā tī伊比一般台語「詩體」作品koh khah chē chin-chē ê篇幅[1]，bô論sī tī題材、手路、語言特色chiah ê方面來看，「胭脂淚」mā攏ū伊ê開創性kap獨特性。
     Tioh因為「胭脂淚」高度ê重要性kap精采度，自chit本冊出版以後，台灣ê文學界tioh it-tit ū相關ê研究出現。Chiah ê研究，tùi語言、文學、文化等等各方面ê角度切入，kā「胭脂淚」ê結構、語言、修辭，甚至sī伊ê文化意義、歷史意義分析kap chin詳細。 
     M-koh,tī「胭脂淚」內底ū chit-ê問題sī tī台灣文學界m-bat ū lâng提出來討論ê：he tioh-sī「文類」ê問題。 
     Tī文學研究內底，親像“史詩”、“小說”、“敘事詩”等等各類ê文類，攏ū家己特別ê體裁、形式kap內容。Tīㄧ般ê文學作品內底sī bē hō讀者分bē清楚ê。M-kó文學ê創作變化chin-chē：tī世界文學內底，ū-tang-sî-á某chit ê文學作品ê外在形式kap內容mā ū可能分屬nng ê bô-kâng-khóan ê文類。Tī chit-chióng情形內底，判斷chit ê作品ê文類tioh變kap khah複雜。親像Lo-se-a ê文學家Phu-sih-kin(А. С. Пушкин, 1799-1837） ê作品《I-hu-kie-ni O-nie-kin》，明明全部lóng sī用詩ê形式寫作完成，m-kó bô論sī作者ā-sī文學研究者攏稱呼chit ê作品sī“小說”；另外chit ê文學家Ko-ko-li(В. В. Гоголь 1809-1852） ê作品“死靈魂”，全篇用散文體寫作，m-kó hō lâng稱呼做“敘事詩”。Lie-hu Tal-su-thoi(Л. Тольстой, 1828-1910）認為家己ê名著《戰爭kap和平》“m-sī史詩，m-sī小說，mā m-si敘事詩”。Chiah-ê攏sī世界出名ê「特別文體」ê例。
     林央敏先生ê作品《胭脂淚》因為作者tī出版ê時tioh kā伊號作“史詩”，目前台灣文學界所ū相關ê論文mā bô懷疑過chit ê講法。M-koh,tī現代ê社會內底，kám iáu-ū法度寫出「史詩」類ê作品？Tī嚴格ê文學「類型學」分類內底，「史詩」ê形式kap內容ê標準tī tó-ūi？「胭脂淚」就各方面來看，到底sī「史詩」ā-sī「敘事詩」、「小說」、「thàu-lām型ê作品」？Chiah-ê攏sī chin值得研究，m-koh tī台灣ê文學界自本tioh攏bô注意tioh ê問題。 
     所以本論文beh用“類型學”內底ê各種方法，研究《胭脂淚》ê內容kap形式，判斷tī文學研究內底，chit篇作品確實ê文體。

 1.2  研究ê目的：

     Chit篇論文ê研究目的分作理論kap實務nng方面：tī理論方面，希望ē-tàng確認台灣文學作品ê「類型學」分類，清楚定義「史詩」、「敘事詩」kap「小說」；tī實務ê方面，chit方面分析「胭脂淚」ê形式kap內容，chit方面確立chit部作品ê文體。

 1.3  研究方法：

     本論文主要運用ê分析方法sī「類型學」ê各種研究法。所謂ê「類型學」 tioh sī「用科學ê方法tùi chin-chē bô確定ê個體內底抽出1部分確定ê個體來當作類型ê標準，然後對chiah-ê確定ê標準進行觀察（……）分類ê功能sī beh為研究事物提供1個標準，當作觀察其他事物ê基礎，hō研究ē-tàng順利進行。」[2] tī「文學類型學」內底，tioh sī先chhōe-chhut各種文體ê代表作品kap chiah-ê作品tī形式kap內容nng方面ê特徵，然後訂出各種文類ê類型條件。最後按照’訂出來ê條件kā個別ê作品分類。

 1.4  文獻回顧：

 1.4.1 有關《胭脂淚》文類ê文獻

        Tioh親像頂kôan所講ê，tī台灣有關「胭脂淚」ê論文已經ū bē-chió。其中khah ū特色ê ū詩人葉笛tī 2005-nî完成，2006-nî發表tī「海翁台語文學」ê「談台灣第一部史詩《胭脂淚》」^[3]。Tī「談…」chit-篇文章內底，葉笛先講tioh英語、華語、以及日語「辭典」內底tùi史詩ê定義，koh再來討論「胭脂淚」ê內容kap形式，ē-sái講sī chin全面性討論「胭脂淚」ê chit篇文章。
     葉笛ê文章ē-tàng講sī《胭脂淚》研究ê基礎、ū it-tēng ê學術價值，m-koh,tī「文體」ê說明方面，因為葉文所用ê「辭典」畢竟sī一般ê辭典，m-sī文學專文ê辭典、百科全書，所以解釋khah簡單，甚至kā文學頂kôan雖然sio-oah,m-koh bô-kâng ê 2種文體：「史詩」kap「敘事詩」當作kâng-1種文體來解釋；tioh更加m-bián講tùi史詩ê內涵kap形式做詳細ê說明。 
     另外1篇對《胭脂淚》做多方面研究，mā ū探討tioh文體部分ê論文sī 梁瓊芳 ê「愛情 kap 語言 ê 變奏曲－論林央敏《胭脂淚》ê 意象美學」^[4]。梁文引用Lo-se-a重要ê文學家Pah-thin (М. Бахтин) tùi史詩ê論述，說明《胭脂淚》內底ê背景sī史詩ê背景。 
     《胭脂淚》ê作者林央敏先生，tī「我的史詩因緣」[5]it文中，引用tioh文評家Paul Merchant kap詩人Ezra Pond ê著作，講tī胭脂淚chin-chêng hiah ê所謂ê「史詩」作品，親像劉輝雄ê《島戀》、周明峰ê《台灣史詩》、鹿耳門漁夫ê《台灣白話史詩》、李喬ê《台灣，我的母親》，其實lóng bô算sī真正ê史詩作品。Mā說明sī-án-chóaⁿ《胭脂淚》chiah sī真正ê台灣tē-1部史詩^[6]。
     其實，téng-kôan chiah ê論文，以及其他探討《胭脂淚》ê論文lóng陷入chit ê盲點：自開始研究以前，作者tioh kā chit部作品看作sī史詩作品，而且tùi chit點完全bô懷疑。所以tioh算sī按照in所引用ê文論家ê史詩定義，《胭脂淚》並bô完全符合，in mā bē注意tioh。變成tī文體判斷頂kôan ē ū偏差ê情形。

 1.4.2有關「史詩」chiaⁿ作chit-ê文類ê文獻

     有關「史詩」ê討論文獻tī台灣bô-chē，因為「文類」研究tī全世界ê文學研究內底本底tioh khah少lâng作；史詩相對小說、敘事詩來講，mā sī bô流行ê文體；koh再講台灣因為bô史詩傳統，對史詩ê研究更加欠缺。Khah ū代表性ê論文sī蘇美文ê《從史詩到敘事詩：看中國敘事詩的起源說》^[7]。
     蘇文圍tioh「sī án-chóaⁿ中國文學ê傳統bô史詩」leh seh，說明tī中國文學ê傳統內底，因為「抒情」傳統siuⁿ重，「敘事」ê傳統相對khah弱，所以中國文學bô史詩ê傳統。
    Chit篇文章雖然講tioh史詩ê「敘事」風格，m-koh mā-sī bô針對史詩tī「內容」kap「形式」頂kôan ê特色作全面ê紹介、分析。

 1.5  研究範圍：

 本論文以「海翁文庫」出版ê「胭脂淚：台語文學第一部史詩」為研究所使用ê文本。

 Tē-2章：史詩ê定義kap範圍

     有關「文類」ê研究，tī文學研究內底it-tit sī偏門，khah少lâng重視。M-koh,mā sī ū chit-kóa-á學者chin重視文類研究，kā伊看作文學研究chin重要ê chit部分。親像Pah-thin tioh強調講it般ê文學研究者「tī文學5花10色、鬧熱ê文學發展過程頂kôan，看bē-chhut影響文學kap語言發展命運siōng大、siōng重要ê關鍵」。按照Pah-thin ê觀念，ché sī因為大部分ê文學研究者lóng ka-nā看表面niâ-niâ。其實tī文學發展ê過程中，「文類(жанр)占tioh siōng主要ê腳色，思潮kap派別ka-nā ē-tàng排tī tē-2位、tē-3位」^[8]，主要文類ê改變，其實chiah sī文學演進主要ê原因。 
     文類，按照文學上直接ê講法，tioh sī kā「ū共同特色ê文學作品分作khah大ā-sī khah sè ê類別」^[9]。Chiah ê類別ê區分tī文學研究頂kôan其實lóng已經ū chin確定ê定義，因為tī文學發展ê過程中間，tùi過去múi-chit-ê時代所產生ê新文類ā-sī舊文類ê新變形lóng已經ū完整ê研究。按照Pah-thin ê講法，chiah ê文體已經sī「準備好好、定型ê客體，chin清楚、明確」。所ū ê文類（除liáu小說sī khah晚chiah出現ê以外），「tī古典時期ê歷史發展過程當中，lóng it-tit保持家己ê穩定性kap it定ê模式」。In所ū ê變體，lóng ka-nā sī「表面ê」，「bē影響in穩在ê文體骨架」^[10]。
     Tioh因為chiah ê文體ê分類標準sī chin明確ê，所以tng-tong ū-chit-kóa-á中國ê學者想beh變動「史詩」ê定義，利用新ê「史詩」定義來ho詩經內底ê某chit-kóa-á篇章ē-tàng符合「史詩」ê定義，好來反駁Hie-ke-li(Georg Wilhelm Friedrich Hegel)「中國bô史詩」ê講法ê sî，tioh ū學者提出「任何chit-ê理論ê提出，lóng sī tùi某種普遍ê現象來ê，「史詩」正sī tùi世界ê範圍內底bat大量出現過ê史詩作品ê總結kap概括」。Chiah-ê「連繫tioh特定內容kap形式ê觀念chit經過提出kap成立，tioh得tioh相對ê穩定性，後來ê lâng nā beh使用chit-ê觀念，tioh ài遵守（觀念背後ê）規則」^[11]。 
     所謂史詩「背後ê規則」包括chin chē部分，chiah ê部分sī史詩作品共同ê特色，mā sī史詩kap其他文類，親像敘事詩、抒情詩、小說…等等其他文類ê差別，所以絕對m-sī以歷史為背景ê長詩tioh sī史詩。

 2.1史詩ê內容

     有關史詩ê內容特色，tī A-li-su-to-te-le-su(Αριστοτέλης，英語sī “Aristotle”）ê《詩學》內底tioh已經ū講tioh。針對史詩ê內容，伊除liáu講包括史詩在內，所ū ê文學作品lóng sī對現實生活ê「模仿」之外，koh提出史詩特別ê原則：史詩ê情結應該「seh-tioh某chit件行為來敘述，chit ê行為必須ài圓滿、完整、ū開始、ū中段、ū結尾，tioh親像chit-ê完整ê生物機體」，而且「bô親像歷史ê結構hit-khóan」^[12]。 
     所謂ê「歷史ê結構」sī kóng tī真實ê歷史上，kâng-chit-ê時間ū chin-chē tài-chì ē發生，chiah ê tài-chì大部分lóng sī bô-siá-mih關聯ê。M-koh好ê史詩應該sī選擇性ê模仿，「盡量模倣單線ê行為」^[13]。 
    综合頂kôan ê敘述，A-li-su-tho-te-le-su認為史詩tī內容方面ê特色sī 1. 史詩sī tùi現實生活ê模仿 2. 史詩ê內容所描寫ê，sī單it ê事件，kap chit-ê事件bô直接關聯ê tài-chì，儘量m-ài khg tī作品內底。 3. 史詩所描寫ê內容應該ài chin完整。
     「歷史」chit-ê詞，m-sī hiông-hiông 出現tī A-li-su-tho-te-le-su tī tùi史詩內容要求ê敘述內底，tioh親像lán m-sī bô緣故tioh kā chit-ê專有名詞翻譯作「史」詩kâng-khóan：chit部史詩作品ê內容bô可能描寫「現代」（創作ê時代）發生ê tài-chì。Mā bô可能kā主要ê背景設定tī「外國」甚至sī「外太空」。Chit部史詩，描寫ê it定sī某chit ê民族ê「歷史」── koh khah精密ê來講，史詩ê背景設定it-tèng ài hō讀者感覺sī tī chit-ê民族ê歷史頂kôan ē過去。雖然tī真實ê歷史頂kôan bô-it-tēng bat發生過chiah-ê事件，甚至tioh算事件ū發生mā kap史詩所描述ê過程bô kâng-khóan，m-koh史詩ê描寫手路tioh ē-hō讀者認為伊ê內容真正sī chit-ê民族ê歷史。Hie-ke-li(Georg Wilhelm Friedrich Hegel,德國ê文學家、哲學家）bat講「荷馬kap赫西俄德替Ko-lie-su ê lâng創造in ê神」^[14] tioh sī chit-ê道理：藉tioh荷馬kap赫西俄德ê史詩，大部分ê lâng lóng相信古早ê特洛伊戰爭ê過程tioh sī親像史詩內底講ê án-nē，tioh連hiah ê神mā-sī chin-chiaⁿ ū--ê。Mā因為án-nē， bô可能出現「世界」ê史詩，ka-nā ū「某chit-ê民族」ê史詩，tioh親像印度ê「羅摩衍那」、「摩訶婆羅多」；Ko-lie-su(Grace)ê「伊利亞德」、「奧德賽」；藏族ê「格薩爾王傳」…等等。 
     另外chin值得注意ê，sī史詩內容所描寫ê「歷史」kap所謂ê「歷史小說」ā-sī lán it般所講ê「歷史」並bô sio-kâng：it般定義上ê歷史sī指過去發生ê tài-chì，kū-nî發生ê tài-chì tī it般lâng講起來，tioh已經sī完完全全ê「歷史ê tài-chì」loh;歷史小說所描寫ê背景雖然mā ū 限定sī khah早期ê歷史，m-koh總是背景lóng sī「歷史時代」ê歷史，tioh sī已經ū文字記載ê時代。史詩tioh bô-kâng：史詩所描寫ê歷史，lóng sī「史前時代」ê歷史，tioh sī iah-bô文字記載ā-sī文字記載bô發達、bô普遍ê時代。Chit-ê重點區別tioh 史詩kap歷史小說以及其他以歷史為背景ê大部分文學作品。
   Pah-thin bat講「作為chit種固定ê體裁，史詩ū 3-ê基本特色：1）史詩所描寫ê客體，sī hit-ê民族美好ê過去，sī（…）『絕對ê過去』。2）史詩ê歷史來自民族ê傳說（m-sī來自個人ê經歷ā-sī以個人經歷為基礎ê虛構創作）。3）史詩ê時代離當代chin hng，ā tioh sī講離歌手（作者kap聽眾）chin hng，中hng隔tioh絕對ê史詩距離」^[15]。
    Tī chit篇研究史詩chin重要ê文章內底，Pah-thin續落來說明liáu siá-mih ho-choh「絕對ê過去」。伊講史詩內底所描寫ê世界sī「民族ê英雄過去，sī民族歷史『創立』kap『高峰』時期ê世界」，mā sī「父輩kap祖先」ê世界。「Chit-ê世界sī屬於過去ê──ché sī史詩作為chit種文類tī形式上ê基本特色」[16]。 
     特別ài注意ê，sī tī現代ê文類學分類內底，並m-sī所ū ê「過去」，所ū ê「歷史」，lóng ē-tàng chiaⁿ-chó sī史詩內容ê過去。因為目前世界上所存在ê史詩tī chit開始tioh sī民間ê走唱詩人呵咾民族早期過去ê作品，伊內容所描寫ê時代背景it-tēng sī 1. 民族草創ê時代：史詩所描寫ê時代，bē-tàng離作者ā-sī讀者siūⁿ-近7，nā-bô tioh bô-hoat-tō產生「史詩ê距離」。因為史詩ê chit種特色sī bē ho讀者tùi史詩所描寫ê時代ū參予感（góa sè-hàn mā經過hit-ê時代；gún a-pa/a-bu/a-kong/a-má bat ka góa講起hit-chun ê tài-chì等等），讀者只有sī ē-tàng藉tioh史詩內底ê描寫來認bat內底ê世界。當然，完全脫離經驗ê作品sī bô-hoat-tō hō讀者產生共鳴，所以史詩oah靠ê，tioh sī「民間傳說」。雖然讀者完全bô史詩背景時代ê生活經驗，m-koh藉tioh民間傳說，史詩kap讀者ê經驗連結做夥。2. 發生戰爭ā-sī某chit-ê牽涉全民族命運ê事件ê sî代。規模siuⁿ-kòe-sè ê事件bē-tàng chiaⁿ-cho史詩主要ê內容背景，影響層次bô夠大ê個人/家庭/小區域英雄，mā bē-tàng chiaⁿ作史詩ê主要角色。因為史詩ài hō-lâng聽liáu ē感覺「Á！ Ché chin-sī lán祖先壯闊ê時代！」。「史詩it般」來做宣傳ê電影，lóng sī大場面ê戰爭片，溫暖ê家庭片，it般ê動作片絕對bē用「史詩it般」來做宣傳tioh sī chit-ê道理。

 2.2 史詩ê主角

     史詩ê主角ū 2-ê特色：1. 伊it定sī英雄人物 2. 伊ê角色特性kap伊ê性格lóng sī定型ê，自頭kàu尾lóng bē變ê。 
     有關史詩ê主角sī英雄人物chit點，tī頂chit-ê小節ê lō尾部分已經ū sió-khóa-á講tioh。Tī chit ê所在koh再詳細說明。
     A-li-su-tho-te-le-su tī-leh敘述伊出名ê「文學tioh sī對現實生活ê模仿」ê理論ê中間，ū講tioh文學作品內底ê人物對現實生活人物ê模仿。伊講「既然模仿ê lâng必須要模仿實際ê人物，chiah ê（實際ê人物）必然sī優秀ê，ā-sī khah差ê」。優秀kap khah差ê差別sī chiah ê lâng「nā-m sī比lán khah優秀，tioh sī比lán khah差」[17]。A-li-su-tho-te-le-su認為文學作品ē-tàng按照作者ê心性kap作品ê主角分作2種：「khah穩重ê詩人往往模仿高尚ê行為kap高尚人物ê行為，khah輕浮ê詩人tioh來模仿卑鄙小人ê行為」[18]。 
     史詩，chit點á tioh bô疑問，sī屬於thâu-chêng hit種。既然史詩ê主要目的之it,sī beh歌頌「lán ê」民族開始ê時代，自然bô可能kā主角寫作chit-ê小人、惡霸；mā bô可能sī bô-siá-mih ê it般lâng。因為thâu-chêng hit種sī「諷刺作品」所beh模仿ê；後面hit種文學作品根本上ài kàu chiok後壁（相對史詩ê時代）chiah ē出現。
     按照目前世界公認ê史詩作品來看，主角lóng sī王子、國王，bô tioh sī領軍ê將軍，siōng強ê武士等等。Chiah ê角色m-nā所做ê tāi-chì lóng si ē影響民族ê tài-chì（更換國家統治權等等），更加重要ê，sī chiah ê主角lóng表顯出比it般lâng koh khah kôan ê道德kap精神層次，mā ū比it般lâng koh khah大ê能力。親像chit種對「英雄人物」ê敘述，tī 2種模仿方式（高尚kap卑鄙）內底，sī屬於ē-tàng hō聽眾、讀者產生嚮往，產生「lán mā tioh ài án-nē」ê情緒。
     M-koh,tī「現代」ê世界sī bô可能產生「英雄」chit種人物ê，因為chiah ê lâng離lán siūⁿ近，伊所ū ê缺點lán lóng看kah chin清楚。Ché tioh sī所謂ê「近廟欺神」。只ū離lán ū chin-hng ê歷史，久kah lán bô-hoat-tō體會ê時間，chiah ē產生英雄。Ché mā-sī ūi-siá-mih史詩ê時間kap現代ê時間總sī ài隔tioh「史詩ê距離」。 
     Soah落來sī史詩主角ê tē-2種特色。Pah-thin tī 《Ta-su-ta-ie-hu-su-ki ê詩學問題》（Проблемы поэтики достоевского）chit篇文章內底，將小說ê形式按照主角ê特色分作「單聲調小說」kap「複調小說」2種。相對複調小說內底人物ê個性ē隨tioh情節ê進展產生變化，chit開始善良ê lâng mā ū可能做pháiⁿ-tài-chì，chit開始ê pháiⁿ-lâng mā ū可能改邪歸正；tī 單聲調小說內底，「主角sī封閉ê，伊ê思想ū嚴格ê範圍限制：伊ê行為，感受，想法kap意識lóng bē-tàng超過伊本底所ū ê，ā-tioh sī講限制tī伊本底固定ê形象，伊bē-tàng bô作伊家己，bē-tàng離開家己本底ê性格，特色，氣質，bē-tàng破壞單聲調小說作者tùi伊ê構思」^[19]。Ia-tioh-sī講，tī單聲調小說內底，角色ê性格、特質it但設定hó-sè，自作品chit開始it-tit kàu作品結束，lóng bē-tàng改變：好lâng永遠sī好lâng，pháiⁿ-lâng永遠sī pháiⁿ-lâng。史詩正sī chit類文學作品ê代表。所以史詩ê主角自頭kàu尾lóng sī英雄，ū崇高ê道德kap理想，永遠bē改變。Ché mā-sī史詩ê特色。

 2.2史詩ê形式

    有關史詩ê形式，tī文學史ê演進過程，mā已經經過chin-chē討論。親像史詩ê長度，A-li-su-tho-te-le-su堅持「必須要hō lâng ē-tàng自頭kàu尾chit kái ū-hoat-tō看liáu」，長度差不多sī「chit-kái游藝會悲劇ê篇幅」，差不多sī萬5 kàu萬6 choah ê長度^[20]。當然，隨tioh múi-chit-chióng語言bô-kâng ê特色，bô-it-tèng ài符合古早Ko-le-su ê ê史詩長度，m-koh,siūⁿ短ê作品確實mā bô-hoat-tō chiaⁿ作chit部史詩作品。 
     另外chit ê關係tioh史詩ê形式ê問題sī格律ê問題。針對chit點雖然A-li-su-to-te-le-su ū講tioh 「用別種格律ā-sī thàu-lām kúi種格律來寫」史詩，lóng sī「bô適合ê」。Ka-nā單it ê「英雄格」ū適合史詩ê格律，因為伊sī所ū ê格律內底「siōng宏偉ê」^[21]。所謂ê「英雄格」tioh sī六音步長短短格，伊sī西洋詩格律ê chit-chióng，tī古Ko-le-su語hit種「重音節ê母音念ê長度sī非重音音節ê 2倍時間」ê詩作內底，sī講múi-chit ê詩句lóng sī由1-ê重音音節加上2-ê非重音音節，然後koh sī 1-ê重音音節加上2-ê非重音音節ê 6-ê音節做基礎所構成ê。Nā-sī用「－」來代表重音節，「U」來代表非重音節，所謂「英雄格」ê六音步長短短格ē-tàng用「－UU-UU」來代表。當然，為tioh beh組成chiah-nī長篇ê作品，tī格律siōng it定ài ū變化，親像「－UU-UU-」，「U-UU-UU」等等，lóng sī ē-tàng接受ê。Chit-chióng格律ê特色sī「長」、「慢」、「莊嚴」。比較chit-má西方詩chiap用ê 2音部長短格（－U)kap 2音部短長格（U-），六音步因為長，所以念起來節奏tioh khah慢（m-thang bē記得，史詩chit開始sī走唱詩人「唱」hō大家聽ê作品）。節奏khah慢，tioh ū khah莊嚴ê感覺，適合描寫史詩ê英雄時代。
     當然，親像頂面講ê，bô-kâng ê語言特色ē產生bô-kâng-khóan ê文學，包括格律kap押韻ê格式lóng ē bô-kâng。Nā-sī用台語來看，nā beh達到kâng-khóan ê「長」、「慢」、「莊嚴」ê效果，tioh ài用「七言」以上，chit句內底字數khah chē ê格律。

     其實，史詩ê「內容」、「主角」、「形式」ē-tàng講sī 3位1體：用高雅ê形式來描寫民族初創時期ê英雄人物。Chit 3種特色tī史詩頂kôan做liáu密切、完美ê結合。

 Tē-3章：《胭脂淚》sī-m-sī史詩作品？

     按照頂kôan史詩ê 3-ê要素來看，lán tioh ē-tàng看出《胭脂淚》到底tī嚴格ê文體學內底，sī-m-sī史詩作品。Chin-chē 甚至sī ū經驗ê文學家，lóng ē kā「史詩」kap「敘事詩」ê定義lām作夥，soah來認為「寫tioh歷史ê敘事詩」tioh sī史詩。事實上，nā-sī照文類學ê講法，「史詩」、「敘事詩」、「抒情詩」、「小說」、「散文」、「喜劇」、「悲劇」等等ê文類，lóng ū「形式」kap「內容」2合1 ê特色。Bô 2種文類ê「形式」ā-sī「內容」sī 完全kâng-khóan--ê。所以，tī-leh分別文類ê sî，ài tùi「內容」kap「形式」2方面落手，詳細分析chiah ē-tàng完全確認chit篇文本ê文類。下面tioh sī以文類學方法tùi《胭脂淚》ê分析。

 3.1 內容

     《胭脂淚》ê背景設定，sī tùi 1919-1992年，經過日本統治kap國民政府統治2-ê時期。中hng穿插tioh男、女主角ê前世（1841-1859），sī大清帝國統治ê時期。根據頂kôan所講，史詩ê必要條件sī 「史詩ê距離」。《胭脂淚》內底，ē-tàng符合久kap bē-hō-lâng ū相關ê記憶koh ū-hoat-to產生英雄ê時代，sī男、女主角ê「前世」，ā-tioh-sī台灣開墾ê時代，「張丙」、「王得祿」ê時代。M-koh,tùi chit-ê時代ê描寫，並m-sī作品內底主要ê部分。講起來mā ka-nā 13章內底ê 2章niâ。日本時代sī目前年歲khah大ê lâng lóng ū親身生活kòe ê時代，國民政府時代sī台灣múi-chit-ê lâng lóng生活過ê時代，bô-hoat-to ho讀者產生「史詩ê距離」。Iā-tioh-sī講，親像leh看小說kâng-khóan，讀者對作品ê內容chin親切，ū-hoat-to tùi時代、風物產生「感同身受」ê感覺。Ché並m-sī要求「封閉ê完整時代」ê史詩特色。所以，「噍吧哖起事」，「霧社事件」，「反抗國民政府」等等ê事件，嚴格講起來並bô適合當作史詩ê主要題材。 
     Koh來sī「壯闊」：史詩除liáu ài「夠久」以外，內容ài ū-kàu「壯闊」。「史詩」m-nā-sī「以歷史為背景ê詩」。Tī《胭脂淚》內底，ē-tàng勉強用chit ê形容詞來形容ê段落，應該sī描寫張丙起事kap王得祿以及月眉、麻寮鬥爭ê故事。M-koh,chiah ê事件tī作品內底，kā-nā占1章──tē 9章（tē-10章mā-sī講男、女主角「前世」ê tài-chì，m-koh已經轉來講in私人ê tài-chì，kap族群ê歷史bô siá-mih關係lo)。其他章節主要描寫男、女主角ê相處kap愛情故事。Chiah ê男女ê事件tùi史詩來講siuⁿ過「狹隘」，m管2-lâng ê愛情成功ā-sī失敗，lóng kap kui-ê台灣ā-sī大部分ê台灣lâng ê命運bô關係。顛倒愛情ê題材，sī chin適合「敘事詩」ê題材。

 3.2 主角

     《胭脂淚》ê主角sī陳漢秋kap伊ê前世陳文湖。Bô論sī讀冊lâng陳漢秋ā-sī 做長工ê陳文湖，lóng sī 大環境內底chin普通ê it般人物。雖然陳漢秋bat參加反對國民政府ê運動，m-koh並m-sī內底起決定性作用ê角色。陳文湖更加m-bián講，自頭kàu尾（其實伊主要mā-sī ka-nā出現tī tē 10章niâ，chit開始只sī講tioh伊殉情ê tāi-chì）bô做siá-mih ē影響甚至sī 2-ê家族ê命運ê tài-chì。主角ê前後世lóng sī「受tioh大環境、道德、理法等等，外在因素ê影響kap壓逼，soah來向命運tìm頭」ê lâng，in ê角色lóng 離所謂ê「英雄人物」chiaⁿ-hng，kap史詩所要求ê，「改變民族命運」ê角色tú好toh-péng。

 3.3 形式

    《胭脂淚》ê長度ū 9千chōa左右，雖bóng比A-li-su-tho-te-le-su所講ê萬5至萬6 chōa khah少chit-kóa-á，m-koh親像頂kôan所講ê，隨tioh每chit種語言bô-kâng-khóan ê特色，史詩ê長度mā ē bô-kâng。Tī chit點來講，《胭脂淚》確實達到作為史詩ê條件。 
     以格律來講，《胭脂淚》ê格律相當多樣化，親像作者所講，「結合詩經、駢體、唐詩、宋詞、西洋史詩劇場、台灣南管音樂、民間七字仔，乃至台灣現代詩諸流派的語言格律kap形式」^[22]。以文本創作ê角度來看，chit-ê特色確實sī chin bô簡單ê：作者必須清楚liáu解chiah ê文類ê格律，並且tī作品內底巧妙結合chiah ê格律。Tī台灣文學史面頂，ū-hoat-tō結合chiah ê格律tī kâng-chit篇作品內底ê，kàu-taⁿ mā ka-nā chit部作品。M-koh,照史詩ê角度來看，因為形式kap內容必須ài it致，所謂「形式表現內容，內容決定形式」，史詩莊嚴、盛大ê內容必須ài用khah「莊嚴」ê形式來表現。Koh再講，史詩內容ê單純（主角個性kap特質自頭kàu尾lóng bē變，情節ê主線mā相對單it)必須透過「單純ê形式」來表現。所以tioh親像頂kôan所講，史詩lóng ē選擇「chit種」「莊嚴」ê格式，親像西方ê「英雄格」（包括chit種格律ê變體）。 
     《胭脂淚》 thàu-lām ê形式表現出內容ê多樣化。Ē出現chit種格律mā-sī chin自然ê──格律配合作品ê內容。M-koh chit種形式並m-sī適合史詩ê格律。
    综合頂面所講ê，bô論tùi形式ā-sī內容來講，《胭脂淚》並bô算sī chit部史詩作品。Ē-tàng講，包括《胭脂淚》kap鹿耳門漁夫號做「史詩」ê作品、「台省民主歌」等等，台灣目前iah-bô真正ê史詩。

結論

    其實，台灣文學內底bô史詩並m-sī siá-mih kiàn-siàu ê tài-chì，mā m-sī講bô史詩tioh表示chit ê民族ê文學傳統khah薄，khah ló。Ū chin-chē國家、chin-chē民族mā bô流傳後世ê史詩作品，m-koh chiah ê國家ê文學tī世界文學猶原占tioh重要ê地位。親像Lo-se-a、美國、中國…等等。
     史詩作品其實tī chit-má ê時代ē-tàng講已經bô-siá-mih機會koh hō-lâng創作出來。Tioh ka-nā文章內底ê「史詩距離」tioh sī創作chin大ê阻礙，koh m-bián講sī其他ê複雜規則。Koh再講，tioh算真正創作出正káng ê史詩，讀者甚至sī文學家tùi chit-ê作品ê興趣可能bô-tōa，tī台灣文學頂kôan ê價值恐kiaⁿ--ī mā bô kài大，畢竟史詩chit-ê文體tī世界文學上公認sī已經死亡ê文體。世界文壇tùi創作chit部史詩作品mā已經bô-siá-mih興趣。Tioh連民族自尊心chin強，認為「別lâng ū lán mā-tioh ài ū」ê中國文壇，面對Hie-kie-li「中國bô史詩」ê講法所採用ê方法，mā m-sī去「創作」chit