步面已經進入21世紀，看咱台灣這塊互外來政權踳踏了四百冬的土地，總算莩出自由民主的花蕊矣。但是咱民族的大欉根、咱文化的大樹栽－－台灣話，猶原陷置漉糊仔糜裡，遭受西北雨一直摧殘，到今抑擱是「日頭暗，揣無路」，看濟濟蕃薯仔子變種做芋仔欉，我的心肝雖然真疼，卻是奈何不了這個大量異化去的現實社會，我嘛時常暗暗仔想，連上大的「賀佬族」都可能愛跟隨伊的母體台灣平埔族的尻脊後行入「滅境」，若安呢其他本土的小族群咁有法度在「苦境」留落喟絲自私求生。這種疼隨著北京話被所謂「新台灣人」認同做共同新母語的中國化現象愈闊就愈疼，對台語前途的悲觀就愈重。但是我擱吥願目睭未契就互疼心疼甲痲痺提早冷去，所以只好繼續做一支「蠟燭成灰淚始乾」的蠟條，替阿公阿嬤、阿爸阿母傳落來的母語「垂淚到天明」，當然，若誠實會凍燒到「天明」死嘛甘願。不過，我嘛映望有火金姑趕緊來鬥照路。
    真是令人歡喜，2002年我真正拄著一隻好心的火金姑矣，伊就是僑居美國已經30年的台語小說家崔根源先生。崔先生離枝飄泊異國，雖然也有「直把異鄉當故鄉」的修為，但伊抑是對台灣母土抱一份掛吊，老來尤其發覺只有台灣母語會凍牽引心靈「故國神遊」，所以1998年開始用伊互美國文學深深陶過的筆犁返頭來耕掘台語小說，寫出伊囥置心肝底的一片《水薸仔的夢》（2003出版）。彼年春天，我佮伊在南鯤鯓頭一次蹌拄蹌拄著（不期而遇），初談相印歡喜，同時我將對伊自願為台語文學掩名奉獻的欽佩囥在心內。舊年（2003）熱天，崔先生回台，阮兩人就互相約束踮我置嘉義故鄉的厝裡共染夜色，我用舊酒佮伊「一樽還酹」三更星斗。座中台灣心相照台語情，崔先生恟恟講著舊年回美國了後有將我對台語文學的「話」認真思考過，當時我有淡薄仔疑問，吥知伊是指佗一句？因為初語若鬥机，話屎就拭昧離，如今過半年，我已經昧記得真濟開講的話語。然後伊表示樂意助我給「空話」成養做「計劃」，這時我才想起阮舊年置話山話水的當中，有悲嘆著台語文學冊坎坎坷坷的出版身世，熱心的崔先生表示願意幫贊我未來的創作會凍順利現世，於是呢我順話尾講出我的「空夢」：（除了我以外）也希望有擱較濟好作品會凍被印刷廠包裝出來。想昧到崔先生血管連接台灣母親的疼心，有認真思考，而且願意吐劍光出一寡力量來「補破夢」，來催化身為台灣人的一點最深層的悲願，做台語文學的產婆，幫助擱較濟的好作品勇敢出世。就是這段緣促成「火金姑台語文學出版基金」置今年中正式伸跤出手拸(tiN,搌)目睭。置茲我順紲感謝崔先生代先撣落這塊給概念變做動詞的金磚，嘛映望擱有濟濟的「火金姑」（捐款）來充實這個基金。
    咱揣著民族生命的根源，就愛來催化文化生命的根源，互怹趕緊湠根大漢。火金姑雖然干單嬾弱的光，但若聚濟也會使助人寫字讀冊、照光暗路。咱希望「補助」優秀的台語文學出版，充實台語作品的美質佮數量」了後，會凍「促進台語文學發展，建立台灣文學的主體性，完成台灣的文藝復興。」這是「火金姑」基金的映望，也是宗旨。頭一年度（2004），「火金姑」總共贊助四本台語創作的別集，金額少少，只是盡一些仔綿薄的力量爾爾，較重要的是通過補助的作品，我想攏有一定的文學水準，這是「火金姑」所期待的，加強台語文學的光度。（2004/10/06，桃園龜山。擱刊置2005/7，《菅芒花詩刊》第7期）

【消息欄】
捐款請郵撥05196382林央敏戶頭　注明捐火金姑基金

一、火金姑台語文學基金2004年度通過補助名單及出版消息：

        1.陳廷宣（A-hi）散文集《葡萄雨》2005.07   金安出版社

        2.江秀鳳散文集《薰衣草姑娘》2005.07   前衛出版社

        3.楊國明散文集《枵饞囝仔的故鄉》2006.06另由國藝會補助，作者自印出版

        4.廖張皭散文集《我聽著花開e聲》

二、火金姑台語文學基金2005年度通過補助名單及出版消息：

        1.尤美琪散文集《若是相思仔花，照山崙》

        2.陳金順詩集《思念飛過嘉南平原》--2005.09出版   島鄉工作室

        3.王貞文小說集《天使》--2006.06  人光出版社

        4.朱素枝（清文）小說集《虱目仔e滋味》--2006.06 李江卻台語文教基金會

        5.江永進詩集《流動》--2006.06 時行台語文會

三、火金姑台語文學基金2006年度通過補助名單及出版消息：

        1.陳正雄詩集《失眠集》--2007.06南一書局

四、火金姑台語文學基金2007年度通過補助名單及出版消息：

        1.郭文玄（筆名福爾卡庫）詩集《台灣四季》