個人檔案
ＩＤ：viennawah
暱稱：紅孩兒
地區：亞洲
人氣指數
當日人次:
累積人次:
累積人次:
文章分類
- 零七年目錄 (12)
- 零八年目錄 (9)
- 零九年目錄 (6)
我推薦誰
誰推薦我
誰來我家
RSS 訂閱
贊助商
其它資訊
本部落所刊登之內容，皆由作者個人所提供，不代表 yam天空部落 本身立場。
檢視方式: 列表 摘要
June 19, 2009
今朝又要返贊育覆診，真係超無聊，尋日先黎過做糖水測試，今日又要返黎，都唔知點解唔同一日做哂，要我分兩次黎咁煩！尋日見好多媽咪都係上午做糖水測試，下午就常規覆診，幾好呀！今日係星期五，如果係下午覆診都無咁嬲，因為做完可以走得，直接返屋企，但係上午覆診，做完又無地方hea吓先，早左返公司又唔抵，麻鬼煩！
今日返去覆診，我唸都好快攪掂，我唸好完左之後去銅鑼灣行一陣，食埋飯兩點先返公司！
十點鐘，真係好快叫我個名，入到房見醫生，今次呢個醫生係正式嘅，唔係實習嘅！不過我都無唸過有咩問，最近touchwood又無咩特別咁，唸住又係講一兩句就按肚聽心跳就走人，點知一坐低佢又無端端問我知唔知自己胎盤低，原來佢係要講番上次超聲波嘅結果，我以為唔會講添，我話我知道，佢就又係循例講d叫我小心嘅野（呢d我一早都知！）我咪交代番上次入醫院嘅事，同交番醫院果封信俾佢做reference囉！佢都無咩點睇封信同份報告，好求其咁，只係問我上次照超聲波個醫生有無幫我約期再照，我話有，佢只係話咁再睇吓到時個報告係點先決定使唔使開刀。之後，佢就同我講我尋日做嘅糖水測試FAIL左，我唸都無唸過佢哋咁有效率，尋日做今朝就有報告？！我又唔係肥又唔係勁食野，我無唸過會pass唔到，我即時嘅反應都好大，衝口而出好大聲咁講，唔pass？！後面有個姑娘見到我咁大反應响度笑，我先知我幾失態！個醫生好冷靜咁話，係，你確診糖尿病！之後會有姑娘約番我見營養師同埋入醫院食餐做檢查，GOD！真係晴天霹靂！我聽到再做檢查呢個term，我即刻問咁使唔使再飲糖水，醫生話你已經「確診」糖尿病，唔需要再飲，聽到都安心少少，但係佢用左兩次「確診」呢個字眼，真係令我超難受！佢無解釋d咩，又無問我有無問題問，就咁叫我走喇！我唸都無唸過自己一日三餐正正常常，又唔係大食又唔“好”甜品都中招，一時間個腦都空白哂，咩都唔識問，儍吓儍吓就走左出房！
出到去再等叫名約期，約左我六月二十三日見營養師，七月三日覆診，七月八日返贊育留院一日食佢哋嘅餐驗血糖。出到門口竟然落大雨，我又無攞遮，贊育落番西環條路又斜，唸黎唸去，最尾都係截的士返公司，無得行街喇！
返到公司先有d清醒，即刻上網睇吓妊娠糖尿病嘅資料。睇完都down down哋，原來除左小b有機會做巨b之外，出世都有機會有低糖症，重有其他風險，而大人呢，雖然話呢d叫假糖尿，生完好多人都正常番，但都有人好唔返，同埋就算生完正常番，呢d有過妊娠糖尿病嘅人將來會演變成真正糖尿病嘅機會係比其他人高好多！睇返d媽咪見完營養師，原來個個都係跟同一個餐單食野，一日得千八卡路里，suppose係夠營養嘅，但d媽咪話唔飽喎，重有d媽咪話唔係只係戒糖呀甜野呀，而係飯都要戒，總之係無啖好食喎，好多媽咪話跟餐食想重都好難，唔輕左都算好，所以呢個餐又叫減肥餐，唸起都慘啦！我四、五個月先叫食得到野開始重，重左十四、五磅，而家七個月又話我重得快，又要見營養師食千八卡，咁睇黎我都唔會重得去邊喇！樂觀d去唸，生完咪唔使點減肥囉！因為醫生話生完會即時輕返十幾磅喎！至驚嘅係八號入院食餐唔pass嘅話，d媽咪話要自己篤手指check，重要自己打胰島素針，一係打大脾，一係打落個肚度，真係好恐怖呀！
June 18, 2009
今朝要返贊育做「葡萄糖耐量檢查」，俗稱糖水測試，睇吓有無糖尿病。之前知道要做呢個檢查都驚架，事關見Ellen Law都唔使做呢個檢查，而自己又要做，不期然擔心係咪我重得太快，所以要驗吓。後來問過人又上過網睇，原來即使係公立醫院，做嘅產檢都會有唔同，有d公立醫院係唔會同你做糖水測試，除非醫生覺得你有potential啦，而贊育就將呢項檢查納入為常規檢查，即係人都要驗，咁我都安心d！
之前上網睇吓呢個糖水測試係點做，原來係要你之前果晚十二點後唔好食野，一早空住個肚就抽血，之後要你飲一杯超甜糖水，過兩個鐘再抽血，期間如果有嘔，就要再約期做過。上網d媽咪都話杯糖水勁難飲，而且之前果晚同朝早又唔俾食野，好多人都驚飲完會唔舒服，所以我都想老公陪我去，以防萬一，好可惜佢呢排無咩假，有都要留番我生嘅時候用，所以最尾我都係自己去。我平時一d都唔好甜野，唸起杯糖水我都好驚，求神拜佛千祈唔好嘔，如果唔係又要再飲過就慘喇，重要嘥錢又嘥時間驗過！
九點半已經抽完血，攞左杯糖水返位度飲，杯糖水其實exactly係一杯外賣凍飲杯大小，望落好似都唔太難飲哂。可能已經餓左好多個鐘啦，第一啖飲落去都ok，因為杯糖水應該加左少少檸檬汁，所以飲落有d似暖檸水咁，我登時個心都無咁謝，重有d開心，點知飲多兩啖就頂唔順，真係飲唔落，望吓其他人又好似無咩野咁，係咪我嘅問題？！其實飲果杯糖水都無人監住你，有一刻我心唸飲唔哂掉左都無人知嘅，好想即刻掉左杯野就咁等抽血，不過咁做又好對唔住小b咁，唯有頂硬上。成杯飲哂之後，即時覺得好飽，個胃好頂，我好驚嘔呀！我即時行近d厠所，驚一嘔就趕唔切，到時成地都係就瘀爆！坐左一陣，無嘔，不過都超難受！重要呆坐兩個鐘等抽血，又鬼死咁眼瞓，勁慘！果度又唔係幾收到電話，想搵人講吓電話都唔得，好彩呢個時候有廣播話樓上三樓有產前講座重有位，有興趣嘅媽咪可以去聽吓，我一個講座都無去過，咁難得有得去聽吓，消磨吓d時間都好，拿拿聲仆上去啦！果然，時間過得好快，講座都未完我就夠鐘落番去抽血喇，個講座都有d用，起碼都知道入院要攞d咩！
抽完血就走得，姑娘話有問題會响十日內通知喎，無電話即係無事！唔記得問十日嘅定義係十個工作天還是就咁數十日．．．．．不過，算啦，做完就算！
June 10, 2009
出左醫院幾日，開始喉嚨痛，真係邪！唔睇醫生由至可，一睇就開始咳同流鼻水，重要係一發不可收拾，邪上加邪！攞左日病假，乖乖响屋企食藥，d藥一食左唔夠半個鐘就超眼瞓，好似就黎暈咁，係收到鼻水，不過唔知點解瞓唔到覺，好辛苦！返左一日工，係咁咳，雖然有戴口罩，都唔係幾好意思，咳到我個肚都扯住痛，頂唔順都攞多一日no paid病假休息，醫生本來俾兩日我架，不過成日病假又唔係幾好，又無錢，所以都係休息多日就算！奶奶叫我睇中醫，我成日覺得中醫慢d，啱調理身體，有病都係西醫快，不過半推半就又睇中醫又睇西醫咁，西藥又唔敢食太多，所以都係臨瞓前先食，中藥就夜晚食，攪到亂哂，都無起色！最後都放棄兩様都唔睇！
咳左成個禮拜，好辛苦，日日都要响公司戴口罩，又扯住個肚，都係就去睇多次中醫啦，唔得就算！點知好神奇，食左一、兩次藥已經好得七七八八，所以今次好神心咁乖乖執多幾次藥快d好番，咁小b就唔使成日俾我嘈住哂啦！
June 4, 2009
之前响醫院嘅時候小b都大幅度郁動，大力左好多，但係出左院又靜左好多，唔知係咪响醫院驚驚先至狂郁，返到屋企就定哂，安樂哂就係咁瞓？！等左幾日都係無之前咁活躍，算啦，有郁就得啦！
點知呢排我又feel到小b郁得唔同左，佢响我個肚入面寫大字呀！即係佢唔知手定腳會撐或者踢我嘅肚皮然後滑左去第二個位度先停，全個過程我都feel到，所以感覺好似小b响肚入面寫大字咁！好得意！
唔知佢想寫咩字呢？
May 31, 2009
前兩日去完Mega Box知道三十一號荷花荃灣分店有張床仔做特價，我哋就唸住佢一開門就入去買喇！不過奶奶就叫我哋早d去，始終都係限量，又平咁多，會有人排隊喎！我哋都唔係好信，排隊？會唔會電視台走黎影架？！我哋唸平時荷花d野出名都貴，都唔係好多人去，重要forum都無咩人講荷花嘅孕婦BB節，咁即係唔太多人有興趣啦！所以就唸住最多早三個字去到就算！後尾奶奶又話佢又去，叫我哋唔好食早餐九點出到去，見到無人排就去食早餐，有人排就排隊輪住去食，咁都好嘅，反正都早，出去食都唔係好遲！就係咁我哋就九點鬆d出到愉景新城。放低左奶奶，我哋去泊車，點知奶奶打黎叫我哋去食早餐先，原來已經有人排緊隊，真係估唔到！咁我哋去左麥記食野，我食完個開心樂園餐竟然都重未覺飽，好得人驚！老公換左去排隊，奶奶黎食早餐，跟手幫我買多個漢堡飽先夠，我都係第一次食咁多野咋！食完上去會合老公，一上去，發現我哋已經係排第十個，我都打左個突，好彩真係早d出黎，原來真係有人會排隊架！我哋就開始擔心前面九個會唔會唔止買一張呢？荷花又好似無限每人買一張喎，會唔會去到我哋就無哂呢？我哋後面都重有好多人，佢哋又係响度數黎數去自己排第幾，氣氛都幾緊張！後尾我哋留意到九點九、十個字嘅時候，已經排到去二十，所以如果我哋真係早三個字先到，真係好大機會買唔成！
十點鐘，荷花開門，d人開始有d混亂咁行入去，因為荷花無staff睇住，我哋都驚行行吓入去俾人打尖架！之後有staff出黎話黎買床嘅就跟住入，買其他野嘅人可以隨便入内購物喎！佢都傻架，咁早又排哂隊咁，唔係黎買果張限量特價床，真係咁神心黎買其他野咩？又唔係平過人！結果咪又係全部人黎買床，混亂中行哂入去排囉！好彩都無俾人打尖！不過，我哋前兩個位有個呀叔呢個時候先打俾屋企人報告果張床仔嘅尺寸顏色，重聽到佢問電話裡面嘅人買唔買，真係俾佢激死！黎得排隊嘅人應該之前都好似我哋咁已經睇中左，知道哂details先會黎架麻，佢唔係咁啱經過見人排隊佢又排埋一份吓嘩？！
我哋一路擔心到我哋嘅時候會無哂，著數嘅野通常都無我哋份！原來話限量二十張，但响倉得七張深木色，七張白色，無哂嘅話就無得即時提貨，之後先有得攞，好好彩，我哋咁啱係第七張白色，可以即日取貨。我哋後面有個女仔好鬼煩，成日响後面大大聲話要買白色，又話深木色好“leung”，好大陸B咁，都唔怕得罪其他人，佢一聽到我哋果張係第七張白色，咁佢哋即係唔可以即刻提貨，佢哋又專程揸左車黎買床仔，個女仔就好大聲講左句SHIT，我心都涼哂，哈哈！
終於都買左床仔，白色有bear bear架！好開心！唔知小b開唔開心呢？！
May 29, 2009
响醫院出黎，抖左一、兩日，都係忍唔住出街。無法啦，都唔係好瞓到，响屋企又無野好做，好悶架！有時候，我覺得自己有左之後成日都好想出街，以前就算响屋企hea都唔覺悶，而家叫我放假响屋企就周身都唔安樂。會唔會係我潛意識覺得生左之後就無咁free可以周圍去，所以而家成日心思思要出街？定還是知道左胎盤低之後，成日驚遲d可能無咩機會出街，而家就去番夠本先？真係唔知！不過今次入院之後，唔知老公係咪意識到我會早產嘅機會幾大，又或者呢次係我入醫院嘅序幕，所以突然間就好有決心去買床仔！
之前去左尖沙咁睇，今日去Mega Box行吓，又順便睇埋床仔。平時星期六、日去Mega Box反而無咩人，今日係平日，唔知係咪近lunch time，幾多人吓，都未見過呢度有咁多人，哈哈！
去左荷花，唸住用張金咭VIP coupon去睇吓有無野買，點知去到佢咁啱做緊孕婦BB節，係人都唔使用VIP咭或coupon都可享金咭會員價，所以去到又係比平日多人少少。之前同老公都睇過呢度嘅床仔，老公都好鐘意，其實床仔張張都係差唔多，分別係大d同細d，平d同貴d，都睇唔出有d貴响邊！老公可能覺得荷花d野信得過,，張床都係千六蚊，standard價，又係佢鍾意嘅深木色，所以成日都念念不忘荷花嘅床仔咁。係我成日唸住等埋一田或者吉之島特價先買，唸住張張床都係千六、七咁上下，一田或者吉之島特價時會有八折，都差幾百蚊，所以老公鍾意荷花嘅床都唔俾買住。今日去到睇床仔，唸吓唸吓都係算啦，唔等喇！如果早產就真係麻煩，都唔知等唔等到八月做BB節嘅時候買。我哋都差唔多決定要買，老公鍾意深木色但我鍾意白色，我哋就唸黎唸去買咩色！唸吓唸吓，無意中睇吓頭先派嘅leaflet，竟然見到有張床仔做特價九百幾，咪多口問吓個sales即係邊張，佢竟然話即係我哋想買果張！原來荷花嘅孕婦BB節係日日响唔同分店都有唔同嘅指定產品限量特價，而我哋唸住買嘅床仔原來會响三十一號荃灣分店做特價，限量二十張！我哋緊係即時唔買住啦，差成六百五蚊喎！好慶幸無啦啦見到張leaflet同埋多口問句咋，如果唔係就白白買貴左！我哋即時決定三十一號去荃灣分店，十點鐘一開門就入去買果張床仔喇！
yam天空部落 建置維護 © 1999~2009 webs-tv inc. All Rights Reserved.