我睇普選, 唔睇適唔適合, 我認為政治權利係人賴以生存的基本權利之一
又係o個句啦, 我唔認為綜緩戶教育水平相對低, 就唔"適合"普選, 就一定係適合搵個皇帝管佢
等於我地唔會問一個人有冇質素要求食飯權, 適唔適合有食飯權
其實, 你又可以話, 冇得普選唔駛死既, 我真係駁唔到你
咁人的確係每日有個麵包有杯水有件衫, 就唔駛死既
我又想問, 你覺得百幾二百年前的歐洲人, 知識水平夠唔夠我地高?
我都唔明點解成日要講選民"質素"
二十一世紀的香港已經近乎零文盲, 70年代以後的人全部最少讀完中三, 人均GDP係二萬三千蚊美金, 法律制度, 社會經濟通通健全
咁又叫冇質素
你可能唔知, 香港咁既水平竟然冇普選(1947年印度咁多文盲咁窮就有普選), 係政治學界好hit的研究議題
又係o個句啦, 政治學者都只係人, 你可以選擇唔信佢地既
乜有人可以o係陸地上面, 上幾年course, 掟落水就識游水咩?
你知唔知歐洲人搞過幾多次革命, 流過幾多次血, 承受左幾多痛苦, 至有今日?
民主從來唔係一件廉價東西, 你唔爭取, 當權者根本冇必要分權俾你
當權者梗係話循序漸進啦, 進到2017, 老曾挽下手死左咯, 佢睇鬼到
可能下手會同你講, 喂, 係上手老曾話循序漸進, 我冇咁講過喎
佢要賴皮, 咁你吹得佢漲?
選民質素, 從政者質素, 一定要有咁既平台至有可能發展
台灣而家就係行緊咁既路, 而且行得好辛苦
但係佢地從冇怨過佢地人民唔適合選舉 (你有留意台灣一定知我講乜)
因為人地真係經歷過幾十年的高壓統治白色恐怖, 知道冇政治權利係咩一回事
你去台灣搭下的士, 問下d司機要唔要普選, 睇下佢地有冇人答唔要?
民主唔係一種制度咁簡單, 唔係掟張票落個箱度就叫民主
入面仲有好多文化元素, 例如公民意識
呢d野一定要實踐, 實踐就要有平台
等於學校教d學生戴安全套, d學生其實唔實踐過自己戴過, 就永遠都唔會識
以上呢一點, 唔好意思, 又係好多年前已有既共識
Martin Lipset o係50年代的研究只係話高經濟水平比較有利民主, 從來冇話過高經濟水平"才適合"行民主
你又可以話, lipset只係一個人, 你可以唔同意佢既.....
補多句啦, d人成日話民主派成日要人派錢
梗係啦, 根本佢地冇機會執政, 佢開口要政府派錢ja ma
又唔駛成本, 又撈到票, 俾我都咁講啦
你試下俾佢自己當家執政, 睇下佢敢唔敢咁講
所以而家既香港政局, 根本係政黨政治受局限之下的畸胎
佢地冇機會執政, 就一定會迫政府做一d冇可能做到的事, 例如又減稅又加福利
因為佢地只有咁樣至能夠撈到票
但係呢, 冇普選平台, 冇執政機會, 就冇可能有政黨政治
咩等政黨成熟至搞普選, 根本係廢話
政黨連執政既機會都冇, 成乜野熟? 你估坐上個特首位, 第一日返工就乜都識做?
呢個係過程. 所以台灣民進黨民生搞到一pat屎咁, 就係咁既原因
執政能力唔夠, 咪下台囉, 第二個上囉. 有乜大不了
香港人太識計數了, 最好就人地做好哂, 餵俾佢地食. 人地歐洲搞革命流咁多血, 今日香港文明富裕唔駛搞革命, 就連行下街都俾人話係暴民
咩世界?!
by 政政柱男
Source: news://news.hkteen.org/43855435$1@news.hkpcug.org
(回應 "福利社會、階級鬥爭，你所欲乎?"一文)
